أيها الزائر قبري .... أتل ماخط امامك

Saturday, December 31, 2005

ياعزيزي كلنا.....كباتن

ارخم واسخف وارذل حاجة ممكن تعملها في حياتك هي قيامك في يوم من الايام مضطرا لأخد دقنك وشين...بل وقيامك بهذه العملية اللعينة على فترات متقاربة كلما تشابكت شعيرات ذقنك والتوت واصبحت جديرة باثارة الشبهات حول انتمائك الفكري (حاجة سخيفة جدا والله)..انما ده قدرنا بقة....هانعمل ايه؟ نكفر يعني؟!!!على ان اكثر مايغيظني شخصيا هي ان حلاقة الذقن عندي تقصف من عمري عشر سنوات على الاقل وتسخطني بقدرة قادر الى وغد مراهق حليق يخاطبه الناس دوما بلقب كابتن.....قوم ياكابتن..اتاخر ياكابتن...الساعة كام ياكابتن...كابتن... معاك كبريت؟ ...الخ
والحق ان هذا الموضوع اصابني بعقدة نفسية من ايام المراهقة _ او الكبتنة _ الاولى حتى هذه الايام وكان اسعد ايامي هو اليوم الذي يناديني فيه احدهم بلقب ( استاذ) او (باشمهندز)..فهي تعلمني عن ارتقائي درجة جديدة في سلم التطور..لكني مع الوقت تعلمت ان الحصول على لقب (باشا) مثلا.. يرتبط ارتباطا وثيقا بالمادة..اللحاليح....وانت في اي مصلحة حكومية , مصالحك في التمام والمعاملة عظمة وسعادة البيه وسعادة الباشا ..كله مضمون ..فقط اذا برزت الفلوس لمن يرى...يعني السن والذقن - ساعات - مالهمش دعوة بحمى الالقاب..احيانا كنت انال لقب مثل البيه دون ان ادفع مليما ...واحد شحات عشمان في قرشين وطبعا لازم يتمحلس ويعيط وينف نفتين وهو منظر على فلوسك ...فان اعطوا منها رضوا ...والا فانه سيسارع بسحب اللقب ويشيل منك الدبورة وينظر لك بقرف قائلا : "ماهي بلد وسخة اصلا"..عندها اعلم ان مرحلة البيه كانت مرحلة وعدت وانني قد رجعت مرة اخرى بسلام الى زمرة الكباتن
ورغبة مني في الحصول على لقب استاذ (مالبشوية ماعادتش جايبة همها) كنت اتعمد اهمال اللحية وكنت ازداد سرورا وهي تتحول الى جدائل ومجموعة اغصان متشابكة الى ان يقابلني احد الاصحاب قائلا .."ايه يابني اللي انتة عامله في نفسك دة؟" او اخر يتسائل في نصاحة " هما استقطبوك انتة كمان؟" احيانا كنت اطنش وودنين من عجين لكن كلما بادرتني نظرة قرف من بنت رقيقة في الميكروباص او مزة معدية في الشارع كنت اسارع فورا لحلق الذقن وتغور الاستذة وتولع الالقاب كلها بجاز...وطبعا بعد الذقن الحليقة اتحول مرة اخرى الى كابتن وانا حاسس اني عملت واجبي تجاه البشرية..بس برضه ياأخي نظرة القرف في عيون البنات لسة موجودة... حاجة تخنق
يارب....امتى اكبر بقة وابقى حاج؟

;