أيها الزائر قبري .... أتل ماخط امامك

Friday, September 01, 2006

النخلتين ... لما توعد

خلاص ... قررت كسر قشرة الروتين والمشاغل ونويت أوفي بالوعد الذي قطعته للعزيزة بعدك على بالي اللي أرسلت تاجا جميلا عن المدونين واللي بيدونوه ... راجعت النص الأصلي للأسئلة من مدونة أحلام ... وهي فكرة جيدة اذا كنا نتساءل عن جدوى التدوين وتعبئة أجولة الكاّبة والاحباط والأفكار العجيبة على أرفف المدونات , وتدريجيا يتحول الأمر الى عادة أو ادمان يقتحم روتينك ويعيد بناء شبكة معارفك وتواصلك مع اّخرين لم تكن تتخيل وجودهم , أو تتعايش معهم كما تفعل مع أصدقائك الموجودين في عالم الواقع
طريقة الأسئلة حسستني زي مايكون بيتعمل معي حوار من عمرو اديب أو محمود سعد أو على الجزيرة ... اسمحولي أتقمص شخصية جناب الكومندا المهم الذي يتناوب عليه المذيعين ... وبسم الله , نفتتح الحلقة
هل أنت راض عن مدونتك شكلا وموضوعا؟ (سؤال مليان تأنيب ومذيع الجزيرة بيقوله وهو مكشر) 0
بصراحة (أعتدل في الجلسة) المدونة مالهاش ذنب ... أنا فعليا غير راضي عن أدائي أنا كمدون ... الأمر الذي يتضمن الانتظام في الكتابة , الاخلاص في المتابعة ... يعني مشكلة ان اكتب بمعدل بطيء نسبيا رغم وجود حوافز كثيرة للكتابة وموضوعات أكثر للمشاركة والعرض , ومشكلة عقدة الذنب التي تنمو عندما تعجز عن استمرار التواصل ومتابعة الاّخرين ... المدونة نفسها أقول ايه عنها بس؟ قالب اسود واسم مهبب .. دة يرضي ربنا بالذمة؟
هل تعلم اسرتك الصغيرة بأمر مدونتك؟
والدتي فقط ... لحسن الحظ أنها لاتعرف سوى ان تفتح جهاز الكمبيوتر عن طريق الضغط على الزر المستدير الضخم في سرة الجهاز فيبدا الزمجرة ... عدم قدرتها على الوصول للمدونة يعطي براحا أكثر في الكتابة ... خصوصا كتابة السطر السابق
هل تجد حرجا في أن تخبر صديقا عن مدونتك ؟ هل تعتبرها أمرا خاصا بك؟ .. اتوترت كدة ليه
(أضحك بعصبية)اجد حرجا في أن أتكلم عن المدونات أساسا .. الناس في الشارع لاتسمع عنها أو تعتبرها مصطلحا جديدا وافدا لايثير الانتباه .. طبعا هي أمر خاص بي ... أرتاح لفكرة ان يقرأ لي اّرائي أناس لايعرفوني اصلا ... لأن معرفة الناس بك تدمر الكثير فيك وتوقعك مسبقا في فخ التنميط والمصادرة (يعني من يقرأ هنا قد تروقه بعض الأمور التي قد يرفضها أو يسخر منها اذا وردت على لساني لمجرد معرفته الشخصية بي ) ... انها الهالة المقدسة لذلك (الشخص الغامض الذي يكتب على النت) .... صديق أو اثنان فقط أعلمتهم بأمر المدونة طمعا في ضمهم لصفوف المدونين
هل تسببت المدونات في تغيير ايجابي لأفكارك ؟ وضح اجابتك بالرسم
استفدت جدا مسألة قبول الاّخرين ... رغم اختلافي مع منهجهم أو اّرائهم ... منهج التعصب والجمود مرفوض لأنه نابع من غرور شخصي واعتداد قد يكون غير مبرر بالنفس .... أغرب الاّراء والمواقف احب سماعها ومحاولة تفهمها دون السعي لانتقاد الاّخرين ورفضهم دوما في محاولة بائسة للاحساس بأني افضل او أنني (أكثر منك مالا وأعز نفرا) .... طبعا تبدا المشاكل عندما أتحاور مع واحد من أصحاب توكيل الحقائق والأخلاق والدين ... بكلامهم الغليظ المليء بصيغة اخرس انت بقى اللعينة .. متهيألي حكاية الرسم دي صعبة شوية
هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
أحاول اكتشف المزيد ... لكن المشكلة كما قلت ... الاستمرار في المتابعة
ماذا يعنى لك عداد الزوار.. هل تهتم بوضعه فى مدونتك؟ (دي أكيد هالة سرحان) 0
في البداية وضعته على سبيل الموضة ... من المفيد أن يشعر الانسان أن معدل التوافد يتزايد ... لكن بعد ذلك نسيته تماما وظل العداد كوحمة بيضاء في ذيل الصفحة
هل حاولت تخيل شكل اصدقائك المدونين؟ اعترف (دة محقق من رعب الدولة شكله كدة) 0
دة أكيد ... لازم لما ييجي اسم لمدون ما (حتى لو مش صديق) أقوم فورا وبدون وعي بوضع معادل بصري للاسم ... ودة مع الوافدين الجدد ... فمن باب اولى أن يكون للأصدقاء طبعا ... وهوة دة اللي حصل بالضبط يافندم ... بس مش عارف أنا موفق في تصوراتي ولا لأ
هل ترى فائدة حقيقية للتدوين؟ .. اشرب العصير الأول (واضح انه قلب على محمود سعد جدا) 0
ر (اطفح العصير على بق واحد)هذا يتوقف على تعريفنا للفائدة ... هل هي منفعة شخصية للفرد (السعادة , التطهر , متعة المشاركة , رغبة أثيرة في الروشنة ) ... أم المنفعة العامة ( تغيير حقيقي للواقع , نشر أفكار ومباديء أو تنمية وعي معين أو تدمير معتقد فاسد , تحقيق اي مطالب شعبية عريضة عن طريق الضغط المستمر ) ... انا متأكد من مسألة المنفعة الفردية ... اما العامة ... فالمشكلة أننا - غالبا - نكلم بعضنا فيما اتفقنا عليه ونعيش لذة اجترار الأمور (يعني برضه قلبت بمنفعة شخصية) لاأقول مافيش فايدة , ولنذهب جميعا الى ترب الغفير ... لكن المحاولة نفسها محترمة ومطلوبة ... خاصة اذا كان نشاط التدوين في مصر يعتبر وليدا نسبيا (رغم مساحة الوعي العجيبة التي يلمسها الانسان من خلاله) 0
هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
انا اصلا اعرف الواقع وأتابعه من خلال المدونين وكتاباتهم ... يعني الجرايد ونشرات الأخبار تكون صدى لأمر عرفته هنا أولا ... حتى المدونات التي تبني العالم الافتراضي الجميل الخاص بها , حتى في خضم محاولاتها للهروب .. شديدة الاقتراب من الواقع ... لا .. لاأعتقد أنها منفصلة على الاطلاق
هل يزعجك وجود نقد بمدونتك ؟ أم تشعر انه ظاهرة صحية؟ (عمرو اديب على مايبدو) 0
نفس منهج تقبل الاّخر ...كيف أدعو لشيء وأرفضه اذا مسني ... احترامي لرأي الاّخرين أيا كان أعتبره جزءا أساسيا من احترامي لذاتي ... وهو ظاهرة صحية والا فان البديل الرسمي الصريح للنقد هو التسنيج
هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
وليه أخافها؟ ... مسألة الاعتقال متوقعة لأي معارض عموما في بلدنا ... جت على المدونين؟
هل فكرت فى مصير مدونتك حال وفاتك؟
السؤال دة عجبني جدا ... يمكن أكتب قصة أو تدوينة عن هذا الأمر ... بس مافكرتش لسة ..اصلي بفكر في مصيرها وأنا لسة عايش أصلا وشكله مصير مش ولابد
آخر سؤال : تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟ (لأ بس هية الست اّمال فهمي فعلا ) 0
ماليش في الأغاني الصراحة ... ممكن مقطوعة لوسمحتي ؟ .. ميرسي جدا ... فيه مقطوعة جميلة اتعزفت في نهاية فيلم شفرة دافنشي .. الموسيقى للعبقري (هانز زيمر) ... الراجل دة مفتري عموما ... فيه كذلك تيمة قائمة شندلر للعظيم (جون ويليامز) ... ممكن برضه ... طب خلاص عشان وقت البرنامج
اكتب اسماء خمسة مدونين ليقوموا بهذا الاسقصاء بعدك
طب اجيب خمسة منين دلوقتي؟ ... نشوف وأرجو مايكونش حد من اللي هاقوله يكون عمله
حائر في دنيا الله , اياكش تولع , كلبوزة وسمباتيك , ابيتاف , شغف
يارب مايكسفوني .. نزل التتر يابني

30 comments:

Anonymous said...

صديقي وانت تريد تقولش هيكل يولاد مع محمد كريشان وهما بيتكلموا عن تجربة الثورة :)
بس مع الاسف انا منزل التتر الاسود مع نفسي من فترة وقرفان اخر قرف ومش هقدر البي دعوتك الكريمة ولا حتى ع العشا
معلش صاحبك مخنوق اليومين دول

Veeeva said...

طيب انا عندي سؤال زيادة

تحب تقابل مين من المدونين؟ و لا متحبش أصلا؟

سؤال كمان
ليه سميت مدونتك الاسم ده؟

NoOR said...

طريقتك في اعادة صياغه الاسئله والاجابه عليها رائعه

Anonymous said...

اولا ايه المقطوعة الموسيقية اللي شغالة في الدونة دي
؟؟

دي جميلة اوي ماشاء الله

ثانيا بقي انا كنت باضحك والله من طريقتك المبتكرة في الحوار ده ههههه
واشرب العصير

ثالثا بقي
انا بقي باشكرك جدا جدا علي دعوتك
بس الحقيقة بقي انا كنت سبقت وعملته
بس انا ممكن اعمله تاني عشان حضرتك يعني يا باشا
:))))

كل تاج وانت طيب

رابعا: مش ح اعلق ع الاجوبة الجميلة دي..ربنا يوفقك

Anonymous said...

I am sick of this life and all pain it causes.
I am sick of this pain and all of these losses.
I am sick of these losses and all of these tears.
I am sick of these tears and the shame of my fears.
I am sick of the shame and the hurt and the needs.
I am sick of the breaking and taking an pleads.
I am sick of this heart set to break at a touch.
I am sick of this soul that does not add to much.
I am sick of this face that has gotten me spurned.
I am sick of these lessons I'm supposed to have learned.
I am sick of the way I get stabbed in the back.
I am sick of the way I seem always to lack.
I am sick of trying to live up to you,
So I'll just forget it, give up, I'm through.

admelmasry said...

اخيرا عدت

اهلا بيك ومرحبا نورك مغطي ع الكهربا

بعدك على بالى said...

استمتعت بإجاباتك وسافرت مع نشيد المقبرة الى اماكن أكثر رحابة من عالمنا هذا.... منحتنى كثيرا من الشجن ساهم فى تضميد الكثير من جروح النفس....

احييك على اختيارك الذى توافق معى الى حد التطابق...

فهل يمكن ان تدلنى كيفية الحصول على النص كاملا...

شكرا على التاج، و مزيدا من الشكر على المرور والسؤال... لاتغب عنا فنحن نفتقدك كثيرا بيننا..
تحياتى

Veeeva said...

سؤال تالت
انت ليه دايما تكتب عناوين ملهاش علاقة بالبوست؟ و لا انا اللي مابفهمهومش؟

المواطن المصري العبيط said...

بجد أنت ممتع يا دكتور في طريقة حكيك ... تحياتي

abdallah ahmed , عبدالله احمد said...

ممتع و صادق وبسيط

أحمــــــــدبــــــــــلال said...

أتابع البوست دائماً
و أرغب بالسؤال عن نفس الشئ
لماذا تبدو العناوين كأنها لا علاقة لها بالبوست نفسه

على فكرة المدونة فى قائمة أصحابى

أعجبتنى اجاباتك المبتكرة و أعادة صياغة الاسئلة
قرأتها فى مدونات أخرى و لكنها أكثرها روعة


تحياتى

ملحوظة:
لا تتغيب فى التدوين كثيراً

بعدك على بالى said...

على فكرة اقر واعترف انا الموقعه ادناه انه لو البلوج عندك هنج حاكون انا المسئوله لانى بفتحة كتير علشان اسمع المقطوعة الساحرة دى، فمن مصلحتك وحفاظا على السلامة واتقاءا لاى كوارث لاقدر الله، بنصحك ترجع بسرعة وتكتب لى اسمها واجيبها منين(مش حاقولك تبعتها ياعم ، يعنى مفيش داعى للغرامة بس اذا مصر اوكيه مش حازعلك )
تحياتى

BaTresYa said...

فعلاُ نشيد المقبرهـ دا تحفه انا فتحه الصفحه أسمع فيها بجد
وانتظر البويت الجديد بتاعكـ

mohamed hassan said...

hei nice blog still

شريف محمد said...

حائر في دنيا الله
ولايهمك ياعزيزي ... أنا عارف المود لما يحكم .. أرجو فقط أن يكون مجرد مود وتظل دايما بخير ... ربنا معاك

اللي لسة بتتنفس
مالحقتش أخلص الامتحان الأول واّدي ورقة اسئلة كاملة منك
أولا ... والله أحب أقابل أي مدون دخل عندي وتركت انطباعا جيدا عنده ... (بجد مش مجاملة على طريقة بحبكوا قوي الله أكبر عليكوا بتاعة هاني شاكر)
فيه مدونين لايعرفوني أهتم بمتابعتهم ورغم ذلك لاأترك تعليقات لديهم ... وأحب أشوفهم دون أن يروني كالشخص المعجب بممثلته المفضلة الحسناء التي لايجروء حتى على ارسال بوكيه ورد بسيط لها ... ويكتفي بصورها في المجلات أو على الشاشة
خايف احدد أسماء فيعتقد الباقي أني لاأهتم ... بصراحة أي شخص مر علي وأصبح زائرا دائما (ربنا يكتر زياراته) للمدونة , نفسي أقابله واتكلم معاه بعيدا عن الأسلاك والشاشة المشعة

ثانيا ... اسم المدونة ... يمكن لأني مؤمن أن ماأكتبه مجرد حالة تعبير أو فضفضة لاتضيف ولاتعدل أمورا ولاتجعل الحياة أجمل ... مجرد حفر للقبور ... مجرد وظيفة يدمنها صاحبها كما أدمنت أنا التدوين ... وعلى اعتبار أن المواضيع غالبا كئيبة باردة كالجثث .. من غير فلسفة فارغة أنا أراه اسما روشا أحيانا

ثالثا ... العنواين .. عنوان التدوينة دي كان شعار اعلان سمنة النخلتين اللي لما توعد بتوفي ... وكتابة هذا التاج كانت تلبية للوعد الذي قطعته للعزيزة بعدك على بالي ... مجرد عنوان قد يبدو غير مألوف عندما نتحدث عن تاج ... أي عنوان أكتبه عموما يكون غالبا لأول جملة تدور في ذهني ساعة التفكير في موضوع ما ... وقد لاتكون وثيقة الصلة في نظر البعض
رابعا ... نسيتي تكتبي في ذيل الورقة ( مع تمنياتي بالنجاح )
:)
شكرا على اهتمامك

نور , المواطن المصري اللي مش عبيط , ابراهيم , كنوز , باتريشيا بس بالسين ,الفنان الجميل عبد الله أحمد

ربنا يخليكوا لي ... متشكر جدا

ابيتاف
دي تيمة قائمة شندلر اللي قلت لكم عليها... أنا أعتبرها من أجمل ماسمعت عموما
وبرضه حصل خير ... اصل التاج بيوصلني متأخر ياجماعة فلاأجد أحدا نرسل له الدعوة ... شكرا

الأنونيموس
متشكرين جدا ياأخ ايمنيم ... هانتصل بيك ونحدد معاد

اّدم المصري
مرحب بيك ... كل مابتقولي اخيرا عدت أحس بالذنب لعدم انتظامي ... واضح انك بقيت جزء مهم جدا من ضميري
:)

بعدك على بالي
الشكر لك أنت ... نص الأسئلة في لنك كلمة أحلام ... يعني أنا مالعبتش فيها كتير يعني
أما المقطوعة ... كما قلت لابيتاف فهي
schindler's list - main theme
ممكن ابعتهالك لو تأمري على الايميل
مع العلم أنها أصلا بامتداد mp3
ومساحتها 4 ميجا وشوية فكة
تحياتي لك دوما ... ادخلي براحتك ولاتقلقي من حكاية التهنيج ... المدونة دي هاتهنج فقط لو بطلتي تدخليها
:)

أحمد بلال
ألف شكر ياصديقي ... وراجع ردي على اللي لسة بتتنفس ... موضوع الغياب والانتظام مش بيدي ... المشكلة اني مسافر حاليا بعيدا عن الكمبيوتر المنزلي لقضاء فترة النيابة ... دة ممكن يقلل انتظامي كثيرا انما سأحاول قدر الامكان ... شكرا لك مرة أخرى

بعدك على بالى said...

دائما رائع كالعادة... اشكرك على كلماتك الودوده .. فدائما ما تسعدنى وتؤنسنى..

(بجد خلى عنك .. ليه التعب ده.. انت برضه مصر.. طيب خلاص براحتك.... متشكرة جداااا تعبتك والله.. ) حوار تخيلى فى هذا العالم الافتراضى الفضائى... بصدق لااحب أن أتعبك بالجلوس امام الشاشة تحمل المقططوعة لترسلها(مش عاوزاك تدعى على) خاصة واننى فهمت انك غير متواجد أمام جهازك الا على فترات متباعدة بسبب انشغالك بالنيابه اتمها الله بخير ووفقك للخير دائما، ولكننى بالفعل لااجيد التعامل مع تلك المواقع الخاصة بهذه المقطوعات، فلو تمكنت من ارسال اللينك ليسهل تحميلها اكون لك شاكرة جدا ، او على اقل تقدير اكتب لى اسم الموقع لانى حاولت ادخل ففشلت، وبصدق (وقد يتعجب البعض) احتاج لأن تحتوينى تلك المقطوعة التى لعبت دورا مؤثرا خلال الايام الماضية ولاتزال...

احييك مجددا ودائما

Veeeva said...

الأجابات دي متاخدش أقل من 10 علي 10

أنا برضه قلت هترفع راسنا!

المواطن المصري العبيط said...

انا شفت التاج ده في أكثر من مدونة، ولكن كالعادة أجدك الأفضل في طريقة عرض الأسئلة والطريقة المثيرة في الاجابة التي لا تخلو من مؤثرات أشعر بأنها مرئية ومسموعة أكثر من كونها مقروءة

أحييك كالعادة، وأعتذر لانني لم اداوم زيارتك في الأسابيع الأخيرة

... said...

تعرف اول مرة احس بلذاذة الاسئلة
علشان طريقتك فى عرضها تجنن
واجاباتك اكثر روعة
معلش اتأخرت
انا عارفة انك بتيجى تهوى الدكان كل شهر فقلت اكيد لسه قافل

ربنا معاك ويوفقك دايما فى كل حاجة يا صديقى العزيز جدا جدا

أُكتب بالرصاص said...

اسلوبك حلو
اضفت امتاعا إلى امتاع الاسئلة

اهنيك الصراحة

وانت عارف
الصراحة راحة ....

شغف said...

أهم ما في الأمر اني عرفت انت اسمك كده ليه

معاك حق - للأسف

و شكرا على التاج ، و يظهر اني كده شريرة خالص لما يجيلي من ناس كتير و ما أعملوش ، بس تفتكر مهم ان الواحد يجاوب يعني؟

لازم أدخل الامتحان ده يا أستاذ؟

بعدك على بالى said...

خفار الصديق الرائع

امتلك الان سيمفونيتك الساحرة.. اشكرك

Veeeva said...

كل لما أجي و الاقي أنك لسه مكتبتش حاجة جديدة بيجيلي احباط

أنت فيييييييييييييييين؟؟؟؟

كلبوزة لكن سمباتيك said...

متحرمش منك يا فهرن يا خويا
طول عمرك غالي
بس انا عملت الاستسقاء ده و طلع عندي ناقص ملح
بعنوان تاج البلوجرية ابقي تعالي خد فكرة و اشتري بكرة

و اكيد في وقت تيجي تهبدنا بوست كل اسبوع كده
متوحشناش
:)
بجد شكرا ليك علي انك افتكرتني

رمضان كريم

shady said...

عملته بشكل لذيذ

... said...

كل سنة وانت طيب ورمضان كريم

سلى صيامك وابقى طل على البلوج لحسن قربنا نحمض

:)

شريف محمد said...

(عطسة قوية) .... يرحمكم الله


اّخذ نفسا سريعا للرد قبل معاودة رياضة الغطس الاجباري
اسف جدا على التأخير ...مش بيدي اطلاقا

رمضان كريم ... سامحوني لعدم قدرتي على التواصل ... انا مذنب ياسيدي القاضي

قولوا لبعدك على بالي مبروك عليكي المقطوعة ... ارجو ان تكون بجودة صوت افضل مما في البلوج

قولوا لشغف ان الامتحانات كلها اختياري والمصححين طيبين والدرجات نهائية
قولوا للمواطن المصري اللي مش عبيط ان انا اخر واحد يعتذر الناس له عشان أنا اللي مش قد مسئولية التواصل وأخجلتم تواضعنا

قولوا للي بيكتب بالرصاص متشكرين مهللين .. ومافيش أريح من كدة صراحة

قولوا لشادي كل سنة وانت طيب وانا وانت والعواطلية بخير

قولوا للي لسة بتتنفس أنا مش قد زعلها ... انتظرونا قريبا

قولوا لحلم ربنا يخليها والبركة فيها لأن الشورة شورتها والاسئلة من بيتها ... وكل عام ورمضانك بخير وربنا يكفينا شر الحموضة

قولوا للكلبوزة السمباتيك ولايهمك .. قريت الاستسقاء يافندم وكان زي العسل .. ورمضان كريم دوبل

قولوا للجميع كل عام وانتم بخير , وشي منكم في التراب ... ربنا يسهل وتستقر أموري قريبا , ادعوا لي حتى لو ماأستاهلش

محمد أبوغرارة said...

ردودك الاميز بين ما قرات في ردود الاخرين ..!

..........
ورمضان كريم..:D

shady said...

قولوا لعين الشمس ما تحماشى

ايه يا دكتور الغيبه الطويلة دى يا راجل

Alkomnda-الكومندا said...

هلا

;