أيها الزائر قبري .... أتل ماخط امامك

Thursday, February 23, 2006

حكايات من مستشفى أبو جهل التعليمي 2


الحلقة الثانية
كلفني ع الفودافون

لمزيد من التفاصيل ... راجع الحلقة الأولى وقاتل بكيانك مع أبو جهل
وتستمر الحملة المقدسة لتعمير مؤسسات الصحة في البلاد
(تتر ضمير أبلة حكمت) ...............
بعد شوي الأطباء حديثي التخرج على شواية الامتياز ... دخل الجامعة مرة أخرى من دخل (كنواب في المستشفى الجامعي) .. وذهب للصحة من ذهب ( وهؤلاء انقطعت أخبارهم , وذهبت ريحهم ) 0
لقد بدأ عصر التكليف
(موسيقى شمس الزناتي) ..............
والتكليف - أدام الله فضلكم - هو محطة الترانزيت التي يمر بها الطبيب تمهيدا لتخصصه ... باطنة , جراحة , أطفال , أشعة , اجهاض وترقيع ...كل حسب ميوله
عادة يسعى الدكتور الطازج (أو االنص سوا بعد الامتياز) ليكون تكليفه بالمدينة ... في المستشفى الفخيم ... والنعيم المقيم ... وقانا الله واياكم شر الطريق , وشر الوحدات الصحية... فالأطباء المكلفون هناك يقاسون السواد , ووجع البعاد .. عليهم لعنة الله والملائكة , والمجلس المحلي
تقدر تعتبرها عقوبة نفي جماعية ... سواء كنت مؤيدا للنظام , أو من المناضلين العظام .. ذو نباهة أو ذو ريالة .. ثوريا كنت أو دلدولا....فالكل في التكليف سواء
تعال يامحترم ننظر لتقدير الدولة لموظف بدرجة طبيب في مستشفيات وزارة الصحة ...المرتب الأصلي + الحوافز + البدلات (بدل عدوى .. بدل طبيعة عمل .. بدل ماحد يلهفهم ...الخ) كله كله قد يصل الى 250 جنيه مصري أبا عن جدا ...مقابل تلك المرتبات (المغرية) يشترط تواجدك بمقر عملك يوميا من 8 صباحا الى 2 مساءا ..بالاضافة الى النوبتجيات ياحزين ... النوبتجية 24 ساعة ..تسلم زميلك التالي 8 صباحا , واذا لم يحضر فستضطر اّسفا لقيام الليل والنهار والعصرية وشمس الأصيل حتى يبان لك أصحاب
اذا فأنت ممنوع من ممارسة العمل الخاص الذي يدر بعض النوى لسند الزير ... فالمستشفى (مالية عليا حياتي) ...ووقتك كله ملك معملك وأبحاثك وتجاربك وحيواناتك المنوية
ان فاتك الميري ... خد الميري اللي وراه
واحد يسأل ... ايه سر الخنوع الرهيب دة ؟ همة بيروحوا ليه أساسا ياكبدي ؟!!! 0
أقولك ... 0
رر 1- هو جزء من الخضوع الجمعي الجماهيري المريب لشعب لم يتعلم الاعتراض خوفا من الكرباج والفلكة والخازوق والكهرباء في الأماكن الحساسة
رر 2- هو جزء برضه من تفكير أجيال لم تتعلم أن تقرر لأنها لم تتعلم أن تتأمل لأنها لم تتعلم ان تفكر لأنها (شوف النكتة) لم تتعلم من أصله (الظاهر أننا نعيش في اشتغالة ضخمة من زماااااان) 0
رر 3- حتى تضمن تواصلك مع اسلافك في تلك السلسة الغذائية .. طبيب امتياز .. ممارس عام ... نائب ... أخصائي ... استشاري .... ويمكن ربنا يفتح عليك وتترقى وتبقى فيل
رر 4- ميكانيزم السلم الخلفي : (النقطة دي مهمة ياجماعة) .. حيث أن النظام ضاغط بطبعه فهو لم ينس عمل فتحات لتنفيس البخار ... وميكانيزم السلم الخلفي أقصد به حالة الارتخاء الحادة والاهمال الشديد في المستشفيات والوحدات (بمعنى أنها نتيجة وسبب أيضا) فأنت فعليا لن تلتزم بالحضور يوميا , وعملك سيكون بمعيار (على أد فلوسهم) , وتعاملك مع المرضى سيكون مرهونا بحالتك النفسية التي هي غالبا (تعبان .. طهقان.. متضايق) ... والوزارة والمديرين والموظفين عارفين كل هذا ... لذلك تجد التركيز الاساسي على الحضور والانصراف والمباني والشكليات الخارجية داخل علبة الكرتون الفارغة تلك ... فان أتاك مرور عابر أو تفتيش مفاجيء يوم الأربعاء 9 صباحا وكنت متغيبا فتحقيق اداري وجزاء يسفر عن خصم من الراتب وتسجل في ملفك الوظيفي , وان كنت حاضرا فأنت شاطر وتستحق نجمة في الكشكول (لا أقصد مكافأة طبعا ... كفاية انك أفلتّ من التحقيق) لكن أحدا لن يسألك عن مستواك العلمي , كيفية تعاملك مع الناس , اهمالك في علاج الحالات ... فكل هذا كلام فارغ لايرقى الى مستوى الدفاتر والعهدة والروتين المقدس... وبالتالي تزداد انت استهتارا , فتزداد المستشفى سوءا , فيزداد التفتيش توحشا ,........ وهكذا في حلقة مفرغة
رر ....... وقال في صلابة : انت من الأحرار ياعلي ... فرد علي بلهفة : يعني ممكن أروّح يافندم؟
البعض يعترض على تلك النعمة ويخلع بنطلون الميري المقدس ... يستقيل من الوزارة , هنا يحصل على لقب ( طبيب حر) ... وهو - لعمري - وعيني وعافيتي للقب غالي ... فهو يعفيك من الانتظار في طابور المكدسين لتسجيل الدراسات العليا فأنت لم تعد على ذمة الصحة وتسلسلها الوظيفي .. أنت الاّن حر ياعلي ... لكنك بدون البنطلون الميري ياحسرة , هنا يلجأ الخريج الحديث لحل شيطاني اّخر ... ميكانيزم أهل الخطوة
ليه تستقيل من الصحة لما ممكن تبقى بروحين ؟ ... بمعنى أن يقوم الممارس العام في بداية تكليفه بضرب شهادة طبيب حر (خليك بجح وقول تزوير) وهي شهادة تفيد أنه مستقيل من الصحة ,يقدمها المحروس الى الجامعات المصرية لقبول تسجيله بالدراسات العليا ... في نفس الوقت فهو لازال على ذمة الوزارة يمضي الحضور والانصراف ويكشف على المرضى في المستشفى أو الوحدة ويقبض راتبه بانتظام , وتوقع عليه الجزاءات أيضا ... ويحضّر دراساته العليا كمان , وكدة احنا في السليم , كل هذا في نفس الوقت ... اّمنت بالله
مش بقولك أهل الخطوة ؟ ... فيه بركة أكتر من كدة ؟!!! 0
طب ماهو شيء طبيعي جدا في مجتمع يتتبع الرخص (نؤمن ببعض الكتاب ونكفر ببعض) و يهتم بالشاسيه الخارجي للانسان ... الأصول ... الناس تقول علينا ايه ... اكنس الأرض وخبي التراب تحت السجادة ... اللهاث خلف وهم كليات القمة ... الحجاب للمومس عشان الزوج الباحث عن بنت مؤدبة ومتدينة وبوليفونيك ... مخاطبتك لأي ابن وسخة ذو سلطان بسعادة البيه وسعادة الباشا وفخامة عظمة نيافة جناب اللي جابوا أهله , خليك واطي ولذيذ ... م الاّخر هو كوكتيل من رهاب السلطة وتعويض النقص في الفشخرة الاجتماعية وخضوع لأوامر صاحب الحمار السايب دوما ... اعمل كل دة في عجينة وصبها في قالب (أسطورة الشعب المتدين) .. ويصبح لدينا مواطن مصري معبأ ومغلف اّليا (فيه منه بالعجوة أو سادة) 0
حكاية الدكتور المشتاق :- 0
دكتور عادي جدا ... شخصيته شبيهة بالموبايل النوكيا ال 3300 المعفن الموجود مع طوب الأرض (يعني صاحبنا دة مش متميز كي يكون بطلا للقصة) ... تخرّج , وتأمتز (أي مر بطور الامتياز المعدي) , وتم تكليفه بالريف الحزين ... ياخسارة السبع العجاف في الكلية ... الراتب يغطي مواصلاته والأهرام الرياضي وسيجارتين فرط .... نوبتجيتيتن في الأسبوع ... ويعمل بصيدلية بجوار منزله يومين اّخرين ... حبه للطب كحب صلاح جاهين للدنيا عندما قال (لادخلتها برجليا ولا كان لي ميل) ... لذا صار التخصص بالنسبة له ترفا , والدراسات العليا هراء مثقفين .... تاقت نفسه للزواج كأي بغل في سنه ... تقدم للخطبة مرتين مراهنا على لقب الدكتور والوضع الاجتماعي ... اتضح ان أفضل وضع هو الوضع الراهن ... وان البيوت بتشتري راجل بس بالضمان... وكان هو طبعا منتهي الصلاحية (ايه يعني دكتور .. هية البت هاتتجوز ولا هاتتعالج؟) .. (الشهادة دي تحطها لامؤاخذة في .... دوسيهك) ... بدأ اليأس يتمكن منه ... وبدأت الاضاءة تخفت في مسرح حياته
____ (لحظة تنوير ... المؤلف عايزها هنا) ___
"مافيش ياأخي ... بيقولك بس هايزودوا مرتبات الدكاترة" ... لعب الأمل في عبّه ... ظل يتصيد الخبر في التلفزيون والجمهورية وأخبار الحوادث ... الموضوع شكله بجد ... أخيرا صار للتكليف معنى ... المرتب قد يصل الى 800 جنيه ... الأحلام اللذيذة تراوده يوميا , يتخيل الامبراطورية الاقتصادية المخيفة التي سيكونها ويرثها أحفاده وأحفادهم ليوم الدين , صورته بالنيولوك اللائق بمكانته الجديدة , اسمه المشهور, والكبار الذين يجرون خلفه بالمشوار , والحسناوات اللاتي ينظرن اليه باعجاب وأمل ... كل هذا وهو يهرش مؤخرته باستمتاع غريب .. لقد صرت من الأعيان يادكترة... تقدر دلوقتي تتجوز وانت رجل على رجل وتحط صباعك في ... دوسيه التخين
___ (محمود المليجي والعقدة وكريشندو باتجاه الكليماكس) ___
لقد زاد نشاط محاكم التفتيش المعروفة باسم المجلس المحلي ... مرور وتشطيب وجزاءات بصورة يومية مقرفة ,بدأوا في كتابة مذكرات في الدكاترة المتغيبين والمتأخرين والمشتاقين كصاحبنا ... وفي يوم أسود أبلغه المدير ( بعيون محمرة وهو يكح ويتبلغم ويمضي اجازة لزميلته الحامل وعلى وشك الوضع) أبلغه ان الوزارة ستقوم برفد الدكاترة المهملين في القريب العاجل وأن المذكرات المكتوبة على يد محاكم التفتيش ستؤخذ مأخذ الجد ...(اّسفة أرفض الطلاق) ...والله حرام , بعد التلويح بالنعمة تخطفوني من أمامها.. مش معقول , ان بالأمر لاشتغالة محكمة ... لكن الاشتغالة أخذت صورة تحقيقات جدية غليظة ونظرات لم يعهدها من قبل من السادة المحققين... أكيد من قادوا الثورة الفرنسية وأجروا محاكماتها كانوا من التفتيش المالي والاداري.. مثلت أمام عينيه صورة لقطيع من الحمير الوحشية تطاردها لبؤة نشيطة ... القطيع طويل عريض لكنها تنقض على واحد بالذات .. تهبشه من رقبته وتجره لعرينها , ثم تهدأ الجلبة ... وتعود الحمير لترعى في المستش........ في السهول
___ (نهاية مواربة ... عيب نسيبها مفتوحة) ___
صاحبنا صار قمة في الالتزام (يقال أنه ترك السجائر وأدمن خطب وجدي غنيم) , هاجس الرفد يؤرقه , وحلم المرتب يداعبه .. الظاهر ان الحسنات لايذهبن السيئات في الوزارة ... المرور لازال على أشده .. والمدير لازال يتوعد ويكح , وزميلته لازالت حاملا ... متى يحمل الرجال؟ ... لا اله الا الذي اّمنت به بنو اسرائيل ... الاّن اّمنت رر
___ (لابأس من نزول التتر) ___
رر
تفتكتروا صاحبنا دة مصيره ايه ؟ هل تعاقبه الوزارة وتحرقه محاكم التفتيش ؟ هل تسري عدوى الالتزام لباقي القطيع ؟ هل تصدق حكاية المرتبات ؟ ولو حصل كل هذا ... هل ينصلح الخلل بمستشفى أبو جهل ؟

26 comments:

دكتور مع وقف الشغل والنفاذ said...

ايه ياعم انت خليتني مدمن كلامك اللي عامل زي الطلب الكامل
....
بقولك ايه سيبك من العك ده كله وحضر الplab
او اي بتاعة بالشكل ده وجرب حظك

ادم المصري said...

احب اقولك يا عزيزي
كلنا في الهوي سوا

علي فكرة انا في هندسة بس لسه ما خلصتش


واحب اقولك ان احنا كقسم الكهربا في حلوان

واخد سمعه حلوة عن باقي الكليات

والدكاترة مستحلياها نفخ فينا لحد ما قربنا نفرقع

انا حاسس
اني لو اتخرجت اني مش هشتغل لاني خريج حلوان بالذات

ان الله مع الصابرين وحسب الله ونعم الوكيل

Dalia Fouad said...

انا كنت هاموت من كتر الضحك على كلامك ده
بوست هااااااااااااايل
وعلى فكرة الحال من بعضه فى البلد كلها

عمرو غربية said...

أول مرة أوصل هنا عن طريق الطبيب الأفريقي. مع أن التدوينة تحزن، لكتي سعيد أني قريت لك.

فنجان قهوة said...

تدوينة ممتعة جدا
ومش عارفة اقوك تعمل ايه بصراحة
دى بلد زبالة

African Doctor said...

الوزير الجديد يعد بالفعل بزيادة المرتبات، يقول أنه يراهن على العنصر البشري
هل ترى أملاً ؟ أم أنها ليست إلا مناورة أو وعود في الهواء؟
هل الحل فعلاً في السفر؟ plabو مثيلاتها؟
سعيد فعلاً بمدونتك

Gesteckt_Schmetterling said...

بصراخه انا حبيتك و على فكره انا بامثل النهايه التراجيديه لقصتك لانى انا بقى اترفدت فعلا لتكتمل الكوميديا السوداء

الست نعامة said...

عجبتني فعلا التدوينة.
أهلي من جيل الأطباء القديم دفعة 72 من زماااااااان جدا يعني، أعتقد ان ده آخر جيل محترم من الأطباء، مش قصدي حاجة يعني، بس قصدي حظهم انهم اتعلموا على الأقل معنى أن تكون طبيبا.

حاجات ومحتاجات said...

واقع ماسف
لكن السؤال هو بتدخلوا طب لية يا جماعة؟
يعني انا شخصيا كنت حابة جدا اني ادخل طب من فرجتي على المسلسل الرائع ER
يا سلااام كان جايب الاطباء دول ناس عندها قيم ومبادئ.بتتعاطف مع المريض وتعاملة باحترام. دة غير المستشفى النظيفة جدا اللي كانوا شغالين فيها كانوا مطلعينها مستشفى حكومي مفهاش امكانيات هههههههه
لكن بصراحة لما سمعت شهادات الاطباء المصريين عن وجع القلب اللي بيعيشوة صرفت نظر

لكن اللي عندهم شجاعة ودخلوا زي حضرتك كدة ربنا يوفقهم بجد :) ويقدروا يغيروا واقعنا المؤسف
تحياتي :)

Anonymous said...

Your are Excellent. And so is your site! Keep up the good work. Bookmarked.
»

Anonymous said...

Nice colors. Keep up the good work. thnx!
»

muhajjirah said...

i'm a 6th yr student and i'm about to commit spiritual suicide! my parents always talk of a promising future but when confronted with the facts they just deny it.. what u write maybe sarcastic but it vibes fear of the insecure fate of young doctors in egypt. kol sana wentom tayebeen. ya Rab ,tawala amrana.

radwa a. fouad said...

hillarious!!! !!!

انوشه said...

عايزه تقولك ان انت بتملك الغه بكل انواعها يعني الفصحه والعاميه والابيحه كماان (لا مؤاخذه) بس جميييييل اوي كلامك وبيوجع اوي مع ان الواحد بيحاول ينساه بس اديك بتفكرنا يالا بجله اللون الاسود المهبب اللي انت حطه ده بس علي فكره الدكتور المشتاق ده بكره المرور ينساااه ويشوف غيره وحكايه المرتب ده احنا بنسمع عنه بقالنا سنه ولا شوفنا ابيض ولا حتي رمادي وبالفرض يا سيدي لو المرتي زاد واخدت الالف جنيه المزعومه وحياتك هتاخدوهم باليمين وهتدعهم بالشمال زي الجزمه لا مؤاخذه انت فاكر هيسيبوك تتهنا بيه لااااااااااااا الاسعار هتزييييييد وهتبقي شطه يوووووه فكرتنا واحنا عايزن ننسي ونبقي زي النعام انا ببص لنفسي كل يوم في المرايه واقول انا مش قصير قزعه يوه قصدي انا تمام انا فل ربنا يخلي لنا الحكومه ونتربي في عزها ويجعله عامر

Anonymous said...

هايل والله اسلوبك رائع عيشتنى فى جو المسرحية البايخة اللى انا عايشها فعلا اسلوبك جميل وسهل ورائع

Anonymous said...

هايل والله اسلوبك رائع عيشتنى فى جو المسرحية البايخة اللى انا عايشها فعلا اسلوبك جميل وسهل ورائع

زعقوقة said...

كلام في الصميييييييييييييييييم

ض/خالد said...

طيــب :)

Anonymous said...

الله ينكد عليك زي مانكدت عليا

ياسمين-المحلة said...

انت زي السكر
بس ارحمنا
كفاااااااااااااااااااية
جورج اسحق

ياسمين-المحلة said...

دكتور مصري قابل مرة دكتور اسرائيلي قاله انتو بتاخدوا مرتباتكم كام؟
الاسرائيلي قاله : أنا باخد حوالي 1500 دولار بدل سكن و ييجي 1200 بدل مواصلات و1000 بدل عدوى و900 بدل طبيعة عمل ده غير الحوافز والنوبتجيات , يعني كله كده بتاع 5000 دولار
أمال انت بتاخد كام؟
المصري قاله : باخد 250 جنيه
قاله دول بدل ايه؟؟؟
قاله بدل ماشحت
هاهاهاهاهاهاهههههههههه

Anonymous said...

متقلبش المواجع
التكليف لسه واجع
والمرتب اللى بناخده ضايع ومش نافع

Anonymous said...

كلام مظبوط أوىىىىىىىىىىىىىىىىىى وكلنا حسينا بيه جدا
لكن ياريت ما تستخدمش ايات من القرءان فى النصف

Anonymous said...

هاها يا ابن الجنيه يا لعيب...كل المدونة على بعضها عسل .. ده أنا كنت فاكر ان كل الدكاترة اللي بيشتغلوا في غرف العمليات المغلقة مالهومش غير في النكت الأبيحة لا مؤاخذه والحاجات اللي بالي بالك وبيخرجوا منها مايفكروش برضه غير في الأكل والشرب وبرضه اللي بالي بالك وانت قاريني بقى .. أتاريكو انتو كمان فيكو ناس بتفكر وبتحس ... سبحان الله .. وبتحس .. والأغرب من كده ألاقي حد بعير حلو ... يا ابن الإييييييه دي مصر ولادة ياولاد ... والله مصر ولادة..
وباللغة العربية الفصحى : أنت أكثر من راااائع
وباشكر الأخ اللي فبلي لأنه رغم انه مابيعرفش عربي إلا إنه كلف نفسه وزار المدونه وساب حاجة بتعبر عنه وعن ثقافته وأكييد أكييد خير .. ماتحذفهاش بقى ... هاها

Anonymous said...

طالما فينا هذا النمط الساقط من التعقيب على الأحداث سنظل تحت وطأة هذه الظروف نئن من آثارها . و انا بصراحة لم أجد أحد يمتدح انسان يخلط الفصحى بالعامية بالاسلوب القبيح و اللغة الهابطة سوى هنا و على فكرة التدوينة تعج بكلمات يشعة تخالف الشرائع السماوية هذا بفرض ان من يقرأها قد يكون فيهم غير مسلمين كالنصارى و الا فهناك مخالفات جسيمة و صريحة للعقيدة الاسلامية و الأداب الشرعية.
اما بالنسبة للتعليق الذي يشكر صاحبه هذا الشخص الذي كتب بغير العربية و كلف نفسه بزيارة المدونة فارجو من صاحب التعليق ان يتكرم و يضع النص المكتوب بالصينية فى مترجم جوجل أو أى مترجم آخر (ليجد أنه ليس الا اعلان عن مواقع و صور اباحبة و شات اباحي و بيستغلوا جهل الغافلين منا)

Anonymous said...

نسيت انت حاجه مهمه اوي.اوعي تكشر في وش العيان احسن م يخفش.و التفتيش ساعتها برده مش هيرحمك.

;