أيها الزائر قبري .... أتل ماخط امامك

Thursday, March 02, 2006

تعليقات على تعليقات البوست السابق

أثارت التعليقات على البوست السابق ردود أفعال واسعة المدى (عندي أنا بس طبعا) لأنها تركت انطباعا أني أتحدث عن مشكلة شخصية ومعاناة واقعية حدثت لي بالفعل ... فخرج البوست عن هدفه الأصلي وهو محاولة متواضعة لتتبع أسباب انهيار المؤسسة الصحية في مصر على حلقات , وتحول الى صفحة للشحاتة واتبرع ولو بتعليق ..لأن تعاطفك لوحده مش كفاية
لهذا سأضع بعض النقط على الحروف قبل مانرد سوا على التعليقات التي أشكركم عليها بشدة لأن واضح ان فيه ناس غير الأطباء تهتم بهذا الموضوع المؤلم المنيل الغارق في البنج والبتدين
بعض النقط على الحروف: - 0
لاعلاقة لي بقصة الدكتور المشتاق لأن نصفها الأول لم يحدث لي .. ونصفها الثاني لم يحدث من أصله ... أنا بالفعل لازلت في مرحلة التكليف .. وبالفعل اكرهه لأنه مرحلة انعدام هوية للطبيب لكني - غير بطل القصة تماما - أحب الطب وأفكر في تخصص ودراسات وأفلام سودة أخرى .. ثم اني لم أبني أحلاما على سلم وعود زيادة الأجور ,ولا أعمل بصيدلية ولا مررت بأوديسا الخطوبة المريرة ولاأقرأ الأهرام الرياضي ولاأشرب سجاير أساسا, ولم أهرش مؤخرتي لحظة كتابة البوست (عشان تكونوا في الصورة يعني) لكن تلك الشخصية يوجد الكثير منها في الواقع .. صعب اتجاهلها وأتكلم عن الدكاترة المرتاحين الملظلظين بشدة والذين (تعرف في وجوههم نضرة النعيم) 0
ردود على التعليقات :- 0
دكتور مع وقف الشغل والنفاذ ... بتحرجني بذوقك وتعليقك على كل البوستات , يارب أفضل عند حسن ظنك
بالنسبة لل plab
هو حل معقول لكن (اذا كنت بتفكر فيه) لاتنسى انه لايضمن فرصة عمل في انجلترا , ولاتنسى امتحان اللغة الأسطوري الأصعب من الاختبار الأصلي بمراحل وتنتهي صلاحيته بعد سنتين فقط ... الزمالة البريطانية أفضل , وياسيدي (بلاب) الله واسعة
اّدم المصري ... شد حيلك وماتفكرش في موضوع الشغل دلوقتي لأنك بكدة ممكن تكتئب وماتخلّصش الكلية اصلا ,صدقني دي أرزاق فعلا وبتاعة ربنا ... نفخ الدكاترة للطلبة دة سياسة عامة .. شكرا على تعليقك , وشكرا على اللينك .. بس انت ليه معتبرني غلبان؟
داليا فؤاد ... متشكر جدا , لكن برضه ماردتيش على الأسئلة اللي في نهاية البوست ... هل المرتبات هي الحل ؟ هل التفتيش هو الحل ؟
صاحب الأشجار ... وأنا سعيد بتعليقك , لكن هل مايحزن هو التدوينة أم الواقع الذي اتحدث عنه؟ مافهمتش بصراحة
فنجان قهوة ... زي ماقلت فوق .. انا مش بصرخ وأقول أريد حلا لي أنا ... الموضوع أكبر من دكتور مشتاق .. دي مشاكل مؤسسة من مؤسسات بلد الله يستر عليها
افريكان دكتور ... أعتقد انه مش مناورة قدر ماهو تصريح غير مدروس بكفاءة ... احسبها انت .. ازاي يزود أجور كل الأطباء(حديثي التخرج والمعتقين) بالشكل اللي ذكره (من 200 الى 800.. ليه يعني؟!!) واديك شايف حال البلد؟ ويعني ايه مراهن على العنصر البشري ؟ هوة احنا بننتج ونبيع ونكسب؟ معروف ان مشروع الصحة من المشروعات الشفاطة للفلوس يعني يحتاج لدعم الدولة مش مشروع قادر على تحقيق الاكتفاء الذاتي ... الا لو يقصد ان تحسن مستوى الصحة هايزود معدل الانتاج والنمو فيرفع مستوى الدخل والأجور بما فيها أجور الأطباء ... وساعتها يبقى برضه كلام غير مدروس لأن دة يبقى ضمن خطة طوييييييلة المدى لبناء هرم الاقتصاد و حفر قناة الانتعاش للدخل القومي وان الله مع الصابرين
كل الناس بتقول ان الحل في السفر ... جميل ... لكن حل ايه بالظبط؟ هو حل شخصي يعود بالنفع على الفرد... أنا مش بتاع شعارات ومصر هي أمي وماتقولش ايه ادتنا مصر وأغاني الابتزاز العاطفي السخيفة والفاشلة ... اللي عايز يترك تلك المقبرة يتركها .. حقه بكل تأكيد وملعون أبو من لايقدّر ظروفه وأحلامه ... لكن برضه المشكلة داخل البلد ستظل قائمة لأن العقلية المدبرة والنظام المتحكم في كل المؤسسات (مش الصحة بس) تحتاج الى تعديل جذري وخطير ...أرجع لأسئلتي وراجع ردي على داليا فؤاد (هوة فيه 100 داليا؟) 0
ياسيدي أنا الأسعد ...ربنا يوفقك .. ومتشكر على اللينكات ... كويس والله انك عملت لنك تهافت الدكاترة لأنه ذهب عندي الى الأرشيف
شكرا للجميع ... وربنا يوفقكم جميعا ولايكون من بيننا أمثال صاحبنا المشتاق المتعلق بقشاية

15 comments:

shady said...

هى يعنى المؤسسه الصحيه بس اللى خربانه
أشمعنى يعنى عاوز المؤسسه الصحيه يبقى حالها عدل ماهى كل حاجه خربانة المؤسسه التعليميه متنيله بنيله المؤسسه الثقافيه ولعت المؤسسه الإعلاميه أخر رياده والحمد لله
المشكله أنه فى مرحله معينة من الخراب ما ينفعش إصلاح بعدها لازم تهد وتبنى من الأول وهو ده المطلوب

bluerose said...

انا مش عارفة اقول موضوعك رائع ولا محزن
كل اللي اقدر اقوله انه حقيقي

Dalia Fouad said...

مقدرش على زعلك وهارد على أسئلتك
يمكن المرتبات تكون جزء من الحل لأن بطبعنا كبشر نحب نلاقى المقابل المادى المعقول بالنسبة لتعبنا
انما الأكيد ان مش التفتيش هو الحل وانت سيد العارفين
انت طبيب صغير فى السن ولسه معلوماتك حاضرة فى ذهنك وعندك طموح كبير فى المجال العلمى والدراسات العليا والنجاح والتفوق
أما التفتيش فبيكون من طبيب ممارس عام وبييجى فقط علشان يوزع الجزاءات على الدكاترة اللى بتشتغل واللى بيزوغوا ويروحوا الشغل الخاص محدش بيحس بيهم لأن كله بيزنس
فتخيل التفتيش من هذا الطبيب والذى هو ممارس عام ولكنه ترقى فى المناصب الادارية ويأتى يحاسبك هل مضيت حضور أم لا وهل تلبس البالطو أم لا ولكنه لا يسأل عن مهاراتك الطبية أبدا
هذا هو الحال يا صديقى وللعلم أنا صيدلانية وكنت أعمل بمستشفى قبل اتجاهى للدراسات العليا وأعلم بصحة ما أقوله والذى بالتأكيد تعلمه أنت أيضا
هل تريد صراحة أكثر من ذلك؟

ادم المصري said...

وشكرا ليك انت كمان

انا الذي يمشي في الظلال said...

بما انك دكتور و في نفس الوقت حانوتي

مش حفار القبور هو برضه الحانوتي

شوف دي




http://img395.imageshack.us/my.php?image=thanksdoctor9cw.png

451 فهرنهايت said...

شادي
أعتقد ان وضحت في كلامي اني لا أستثني مؤسسة ما من اللبخ والعوء ... لكني أتكلم عن تفاصيل فضايح المؤسسة الصحية بالذات لكوني أكثر احتكاكا بها , وطبعا الحل شامل لكل المصالح والهيئات مادامت أسباب الانحدار تقريبا واحدة

بلوروز
قصدك انه حزين لأنه واقعي (هوة عاد فيه شيء واقعي يفرح؟)

داليا فؤاد
ربنا مايجيب زعل ..
عندك حق .. المرتبات ممكن تعطي نتائج ايجابية , لكن برضه الفئات اللي يتحصل على مقابل مادي متميز في مصر لاتستثنى هيئاتها من البلاوي والاهمال والفساد
اذا الموضوع أكبر من مجرد تقدير مادي , وأكبر من خطة الجزرة والعصاية (التفتيش)
بالمناسبة.. التفتيش بيقوم بيه برضه موظفين بالمجلس المحلي (يعني مش الدكاترة بس) .. طب دة يقيّم فنيات العمل ازاي بالذمة؟!! وعلى رأيك اذا كان الدكتور اللي بيمر مش في دماغه..جت على دة يعني؟

اّدم المصري
العفو ياريس ... لسة برضه شايفني غلبان؟

أنا الذي يمشي في الظلال
حفار القبور أقصد به شيء اّخر هاوضحه في المستقبل (بس مش الحانوتي اللي في بالك)
الصورة قمة في السخرية .. أكثر قوة من الشكوى ورفع القضايا

حائر في دنيا الله said...

هوا لأني جاي متأخر وبعد ما المسلسل خلص
يعني مش فاهم حاجة
فدا معناه إني بس أمسي
على الناس الميتين
أقصدي على دكتور الناس الميتين
سلام

kalam said...

نفسى اعرف فى ايه فى كليه الطب بيخليكوا موهوبين للدرجه
فى حياتى ما قابلتش اديب او كاتب من اللى مستواهم بالسحر ده
الا لو كان دكتور بشرى يمكن الاستثناء الوحيد رحاب بسام
بجد مهما كان الوسط المنيل فى مصر سواء فى الدراسه او الشغل بس بجد من غير المعاناه دى ما كنتش بقيت كاتب هايل كده
انا بقالى ساعتين ولا حاجه ما اتنقلتش من قدام المدونه لحد ما خلصتها
مش هاعلق على الموضوع ده تحديدا لانى ما علقتش على اللى قبله
بس اوعدك انى ابقى ضيف دايم هنا ان شاء الله

ادم المصري said...

لا والله مش حكاية غلبان او مش غلبا ... بس بصراحة انا لما جيت اعمل اللينك .. مكنتش عارف اعمل ايه

ولقيت مواضيعك في الكتابة قريبة من مواضيعي

وبما ان انا غلبنا يبقي اكيد اللي زيي برده غلابة

وما تزعلش هغيرها

Anonymous said...

SOMETHING ONE CANNOT UNDERSTAND
A COUNTRY WITH SUCH CARING AND INTELLIGENT PEOPLE LIKE YOU HOW COME IT COLLAPSES IN THIS INCREDIBLE WAY?I AM NOT AN ARAB BUT I AM A FAN OF YOUR COUNTRY.IT IMAKES ME SAD TO HEAR AN LISTEN TO ITS DETERIORATING CONDITIONS.THERE SHOULD BE SOMETHIN TO BE DONE.IT FALLS UPON CITIZENS TO BUILD A NEW LIFE.DEEDS NOT WORDS ARE REQUIRED.YOU CANNOT ESCAPE YOUR RESPONSIBILITES.NO ONE IS REALLY TO BLAME BUT YOURSELVES.I TRY TO FOLLOW WHAT WORLD PRESS SAY ABOUT YOUR COUNTRY.READ CAREFULLY ...IN THIS SITE WHICH I FOUND HANDY
http://wakaup.to/computer
HEJI

Taher said...

موضوع جامد جدا وواقعى
لو غيرت الدكتور وخليته مهندس
والمستشفى خليتها مصنع
وطبقت باقى الكلام حتوصل لنفس النتيجة
احنا الحمد لله ناس منظمة
العك اللى بيطبقوه فى طب هو اللى بيطبقوه فى هندسة نفسه اللى بيطبقوه فى البنوك شرح اللى بيطبقوه فى شركة مصر اوروبا للنظافة
ربنا يحميك من البهوات والباشوات ويكتر روشتتاتك ويشغلك فى مستشفى استثمارى

451 فهرنهايت said...

حائر في دنيا الله
يادي الاسم اللي جايب لي المصايب ... انتوا ليه بتربطوا بين الطب واسم المدونة؟
مساء الفل ياعم الكل .. كنت اتمنى تشوف الحلقة الأخيرة من المسلسل

كلام
والله ياسيدي أنا ماستاهلش ربع الكلام اللي انت كاتبه .. متشكر أوي

اّدم المصري
شكرا جزيلا يااكسلانس ... وطوبى للغلابة

anonymous
a usual reaction for such a dark sinking situation , decision makers aren't -always- ignorant stupid people as we like to immagine to justify our disability and failure
u can complain about (them) .. and think u r another poor innocent citizen
we r all included.. me, caring people,decision makers,and any distressed guy who insist to stay in victim's position
i accuse myself first for using words not deeds... so iam the one to blame befor i start throwing stones on any criminal in leaders's position
thanks

طاهر
عندك حق ..
واللهم اّمين

Anonymous said...

Super color scheme, I like it! Keep up the good work. Thanks for sharing this wonderful site with us.
»

Anonymous said...

Hallo I absolutely adore your site. You have beautiful graphics I have ever seen.
»

انوشه said...

بلوج جميل اوي وكل معاني كتيره صعب اوي توصل لها من اول مره وياتري كل اولاد قابيل زي قابيل ولا لا يا ريت ترد علي مع ان انا عارفه ان تعليقي متاخر اوي لاني لسه مكتشفه البلوج ده قريب بس يا تري حتي لو لو كل نسل قابيل زي ابااااااه ده ينطبق عليه من شابه اباااااه فما ظلم وبالشكل ده نلتمس العذر لكا انسااااااان زي قابيل بس في ناس كتييييييير اوي طالعين لعمهم ولا يشبهو ا ابوهم في حاجه مثلا انت مثلا اكييييييييييد طالع لعمك هابيل مش ابوك قابيل وياريت دايما كده تمتعنا بكلامك الدرر ده ياعم الدكتووور

;