أيها الزائر قبري .... أتل ماخط امامك

Wednesday, February 15, 2006

مش عارف

(ليس للعنوان أي علاقة بأغنية مروى)

مش عارف ليه أصبحت أخشى النظر في المراّة فأكتشف أنني لازلت انسانا وعلى قيد الحياة ...؟ مش عارف ليه باستمتع بتعذيب نفسي وتجريحها , بس أكره من يساعدني على هذا ...؟ 0

مش عارف ليه دايما خايف من بكرة, مع ان كلامي بيقول ان بكرة دة مش في دماغي وان امبارح كان يوم سيء وان النهاردة خلص من قبل مااّخد بالي ؟

مش عارف ليه بأصلّي وأنا سرحان , ووعيي يرجع لما اّجي أدعي .... ؟ مش عارف ليه بيجيلي احساس بالذنب حتى وأنا في عز المصيبة ؟

مش عارف ليه حاسس اني جيت الدنيا مع ناس تانيين سابوني ومشيوا؟... ومش عارف همة هييجوا ياخدوني امتى؟

مش عارف ليه بحب الأعياد مع اني أقضيها لوحدي؟ .... وليه بكره يوم السبت مع اني اتولدت فيه؟

مش عارف ليه كل ماأتعلق بشيء أو بشخص , يختفي فورا وبلا رجعة؟

مش عارف ليه الدنيا بتمطر وأنا عندي مشوار مهم ؟ ... و ليه دواء البرد ماعدش بيجيب نتيجة ؟ ... وليه حاسس ان فيه حاجة مهمة عايز أقولها ومش فاكرها ؟

مش عارف ليه باخاف اشتكي ... وبعدين أقوم الفجر أكتب البوست دة؟

وأخيرا ... مش عارف ايه علاقة كل اللي فات بكابوس كنت أبحث فيه عن نصفي الاّخر , فلم أجد سوى مغارة مليئة ببيض النمل الأبيض؟

11 comments:

radwa osama said...

وانا مش عارفه ليه انا حبيت البوست ده

Eman M said...

:))))))))))

shady said...

تصدق ولا انا
بس على فكرة مادامت عندك الاحاسيس دى فى بلد ذى دى يبقا انت انسان سوى
اما لو عندك احاسيس انشكاحيه فهى دى المشكله

Ahmed Shokeir said...

أحلى مافي كلامك إنه مغطي نواحي مختلفة وتساؤلاتك دي مخزون فترة مش قصيرة
بس الجميل إنك عرفت تطلعها

:)

دكتور مع وقف الشغل والنفاذ said...

يا باشا انا مش عارف ليه ما عرفتش البلوج ده من زمان

Dalia Fouad said...

بوست جميل جدا جدا
احساس عالى جدا
البلوج كله هايل
الى الأمام

sonia said...

وأيه اللى فوقك .....مانتا كنت ماشى زى اللى ماشيين ..ليه وقفت الوقفه دى مع نفسك.......بس بجد كلامك بيريح

عشقك ندي said...

لو كل كل ده حصلك يبقي انت اكيد في مصر

451 فهرنهايت said...

radwa & eman
متشكر جدا ... ويارب البلوج كله يعجبكم
شادي
الحمد لله اني اطمنت على نفسي .. حتى لما بانشكح كلامي كله بيبقى سخرية ومرارة .. أعتقد ان دة كمان طبيعي
شقير باشا
ربنا يخليك يازعيم وتفضل على طول منور البلوج
الدكتور اللي في المؤبد
مش عارف أقولك ايه؟ متشكر قوي ويارب البلوج يعجبك دايما
داليا
ربنا يخليكي ... على فكرة , موضوع انفلونزا الطيور بتاعك كان في الجون وجه في وقته
سونيا
مش عارف انتي زعلانة ليه ؟ أي انسان طبيعي جدا انه يروّش ويسرح ويعربد ويهرتل ويتأمل ويرجع لربنا ويعيش حياته كل دة مع بعض.. عادي ... كل لحظة ولها مبرر ... ماحدش يقدر يبقى قناة موحدة الارسال الا لو بيفلتر أفكاره وينقي منها موجة واحدة دايما
المهم .. الحمد لله ان الكلام عجبك , مستني تعليقاتك دايما .. وعلى رأي دريم "أوعى تغير البلوج"
عشقك ندى
صدقني اللي مخوفني اني أبطل ألاحظ أو أتألم ... ساعتها بس ... يبقى انا فعلا في مصر

Taher said...

مش عارف ليه بأصلّي وأنا سرحان , ووعيي يرجع لما اّجي أدعي .... ؟ مش عارف ليه بيجيلي احساس بالذنب حتى وأنا في عز المصيبة ؟

مش عارف ليه ضايقتنى الجملة دى وفكرتنى بحاجات كتير

ومش عارف ليه ان انا شلكك لا متأكد ان كلامك معظمه واقع بحاول اهرب منه
دا انت جيت على الجرح

Anonymous said...

I love your website. It has a lot of great pictures and is very informative.
»

;