أيها الزائر قبري .... أتل ماخط امامك

Wednesday, September 05, 2007

فقاعة النت الأخيرة ..... وبيضة ميلودي

في انتظار انتهاء الداونلود

لاأعلم تحديدا ... ماذا سيحدث لخدمة الانترنت اعتبارا من سبتمبر الاسود


لازالت الأمور امامي غير واضحة عن مستقبل التصفح والتدوين والتحميل في تلك البلاد التعيسة ... كثيرون يخبرونك عن السعة المحدودة التي سيبتلى بها المستخدمون .... ماذا سيحدث عندما تستهلك حصتك الشهرية من حنفية الانترنت (ال2 جيجا المباركة) .... هل نتوقع ظهور عبارة باللون الاحمر تردد بشماتة ... عفوا .. لقد نفذ رصيدكم ؟

حتما سيخيب امل كل هواة التحميل من على الانترنت ... مساحات لامحدودة كانوا ينعمون بها مليئة بخيرات الكتب وملفات الموسيقى والبرامج و الالعاب والافلام المجانية .. البريئة منها , وغير البريئة

عندما تعيد تأمل الامور ... تكتشف ان الحكومة النظيفة المباركة قد ساهمت (ربما من حيث لاتعلم ) في ترسيخ ذاك الهاجس القديم لدينا والمعروف ب(هاجس اخر الشهر) .... ذاك الالم الغامض الذي يمزق كبدك كلما اقترب موعد سداد الفواتير والايجار , الكهرباء ... الغاز ... المياه ...فاتورة التليفون ... كروت الشحن ... وصلة الدش .. وصلة السايبر ... الزبالة ... دروس العيال ... التموين الشهري ... صيانة اجهزتك المنزلية التي تتلف بانتظام ... ياللهول !!! ... كل ذلك ازاء موارد متناقصة تدريجيا باسلوب الساعة الرملية الشهير ... وتنتظر في صبر اول الشهر حتى يدركك الغوث ... الان صارت ساعات الانترنت المتبقة امامك عنصرا هاما يضاف الى مكونات الساعة الرملية ... وصارت بالتالي سكينا زائدة تغرس في قلبك كلما لاح في الافق .. بريق اخر الشهر المرعب

ياترى كم تبقى لي من رصيد الانترنت؟

نفس الهاجس , حرك اصبعي اليوم لكتابة بوست اخر بمناسبة سبتمبر الاسود ... الحق اني بحثت في صفحات الانترنت (ايام ماكان عندنا انترنت) ... على صورة او كاريكاتير غربي غير متداول يعبر عن موقف شبيه بحكاية ( النت ابو 2 جيجا واذا كان عاجبك) .. الصور تتحدث عن بطء الخدمة احيانا ... هوس الشراء على الانترنت ... فقد السيطرة على صغار منفتحين على شبكة معرفية غير محدودة ... المواعدة عبر الانترنت ... اضرار الجلوس الطويل امام الويب ... الخ ... لكن صورة واحدة (اثناء بحثي) .. لم اجدها لتعبر عن ذلك المأزق محدود الكمية ... هنيئا لمصر اذا هذا السبق المتميز

كلام كثير موزع كالشائعات تسمعه عن خطة الحكومة الجهنمية للتحديد من نشاط التدوين ... كان التدوين منذ اكثر من عامين مصطلحا غير ذي بال ... يكاد يقتصر على مجموعة محدودة من مستخدمي الانترنت ... المجموعة التي لم يعبأ بها النظام انذاك لأنها كانت اقل جندا واضعف نفيرا ... اليوم صار التدوين اقرب للموضة المستشرية ... .. مدونات سياسية , اجتماعية , دينية , ادبية ... وشخصية .. مساحة الوعي تتزايد .. الكل يدون الان ... العيال كبرت يارمضان ... صار نفير التدوين اعلى من ذي قبل .... ربما لهذا يكون امرا طبيعيا في بلادنا ان يصيح انصار حزب الكبت والتلطيش من مالكي السلطة اعتراضا على تلك الحنفية اللامحدودة ..... اقفل الحنفية ياجابر
هل الحل البديل هو ابتداع حركة انترنتية غامضة وخطيرة ولها اسم متمرد على غرار (نت بلا حدود).. أو (سايبريون للأبد)..أو اي ماقد يخطر ببالك ... ويصبح شغلهم الشاغل هو التحايل على المساحات المحدودة والتلاعب بالنظام ؟ .... فلنصنع ثقبا ضخما في كرش الانترنت , ولنشفط منه كيفما نشاء
انتبه .... يتبقى لديك واحد جيجا بايت وثمانمائة وعشرون ميجا بايت وبعض الفكة
هههع .... اساطير الأولين
انطلق كالمجانين لأحمل فيلما ما ببرامج التورنت .... اشرب اشرب .. ولا يهمك ... النت لايزال في جيبي
قرارات غبية كثيرة وتصريحات اكثر غباءا تطاردنا يوميا من السادة الغير مسئولين ... النت محدود , ورمضان القادم مع المدارس ... لا لتأجيل الدراسة ... تأجيل رمضان اكثر منطقية ... تلك هي الحقائق الجديدة ... صار الويل ويلات ... وصارت النفقات مضاعفة هذا العام ... من استطاع الصمود , فليكمل بالجولة الثانية ... واما من ابى وانتحر ... فالبقاء للأقوى ... هذا هو منطق الغابة المصرية الجديد ... ايها المغفلون , اننا نساهم في تقوية مناعتكم ... قانون الانتخاب الطبيعي سيخلق اجيالا اقوى ... واكثر برودا وتناحة ... المجد للحلاليف
ياأرعن ياأهوج ... يتبقى لديك جيجا وخمسة عشر ميجا بايت .. انت حر
يبارك الله في القليل .... بعض الكيلوبايتات مثلا تسمح بتصفح كل الجرائد القومية والمعارضة والصفراء والخضراء والسوداء
نميمة عظيمة تنتشر وتتعاظم تتعلق بصحة الريس ... متقال يعني .... هاهو يشد حيله ايها الحاقدون ويفتتح المصانع ويقابل الوفود ويمارس دوره الابدي في عملية السلام الدودية ... ويل للمعارضين .... تلاحظ شريط الاخبار الاحمر وهو يكرر اسم الريس ... متقال يعني ... وهو يقابل فلان وعلان وترتان من جميع انحاء المخروبة ... وفود ومبعوثون ورؤساء وزارات ... ولازال واقفا شامخا بصحته وهندامه وبذلته الوحيدة التي يخصصها للخروج والمقابلات والتصوير ..... الاعلام يركز على معلومة واحدة من كل هذه العناوين البيضاء على الشريط الأحمر اللانهائي .... الشائعات مجرد اونطة ... كذب المعارضون ولو صدقوا
ياعبيييييييط .... يتبقى لك سبعمائة وخمسون ميجابايت ... شد الحزام قليلا
تذكرون اعلان ميلودي افلام ....وذلك السمج الذي يستمر في اطلاق النكات المستفزة ويضحك ضحكات اكثر استفزازا .... ضحكات لاتقل سخافة عن كل التصريحات الغبية والهراء الاعلامي المستمر ... بيقولك مرة واحد حدد النت , طلع ضيق عليه .. (ضحك هستيري) ... بيقولك مرة تلات طماطمايات بيعدوا قدام موكب الريس ... واحدة قالت للتانية حاسبي الرييييي ... طك ... التانية قالتلها الريس ميييي؟ ... طك ... التالتة قالت الريس ... متقال يععععع ... طك (ضحك هستري وترجيع) .. وهنا يظهر فتى ميلودي المربرب المتوحش ذو الشعر المنكوش .. وبالطبع لاتعجبه النكت ... فيضع نظارة المعارك امام عينيه ليرى الأمور على حقيقتها ... انها فقط بيضة عملاقة تتلو كل تلك النكات والتصريحات , وتردد كل هذا الهراء
يابن ال(...) ... يتبقى لك اربعة عشر ميجابايت .. وتدخل السجن
طمعا مني في استغلال اخر فقاعة انترنت في ذلك الشهر الفضيل (سبتمبر يعني) ... نشرت هذا البوست مبكرا على غير العادة ... احساس غامض بأن بحبوحة النت السابقة قد ذهبت ودخلنا عصر الظلام ... اخر فقاعة لأخر نفس شهري في صدر الرصيد المتناقص ... رصيد الانترنت , رصيد السعادة , رصيد الاحلام , (رصيد) نمرة خمسة , رصيد الصبر لأناس صامتون مغيبون , رصيد الكرامة المهدرة يوميا في الشوارع والاقسام والمستشفيات ومختلف المصالح الحكومية , رصيد المسئولية التي يحلو لنا دوما الفرار منها والقائها على اقرب رصيف .... من اي تأتي الشرارة الملهمة التي تغير مسار الاحداث ؟ ... ماذا يتبقى لنا عندما نستمر يوميا في ممارسة فن الاستربتيز الخاضع المتنازل تدريجيا ؟ متى تأتي لحظة الاشراق السينيمائية المنتظرة ؟ .. هل نحتاج الى بطل عظيم ملهم ؟ .. ام اننا لن نتخلى ابدا عن انتظار المعجزة و تكنيك (الاله من الالة) ؟ ... اقرأ التفاصيل المثيرة وقاتل مع نور وفريقه من اجل ال......... 0
.................................
عفوا ..... لقد نفذ رصيدكم لهذا الشهر

20 comments:

Anonymous said...

خدت الكلمه من على طرف لسانى، بوستى الجديد كان هيبقى "حمل هذا الثور
لانى فعلا باتعامل مع الانترنت الايام بنفس منطق حنفى و صورة مرفت امين-يعنى اللى بلاقيه فى سكتى باخده كتب مبحباش لغات مش عارفاها اصلا، اغانى سعد الصغير مثلا أىىىى حاجه...

محمد أبوغرارة said...

رائع كما العادة..
كل شيء تكتبه يخرج رائعا بالفعل..!

سخريتك تذكرني بشدة بالدكتور أحمد خالد توفيق.


على العموم نحن هنا في ليبيا ..منذ البداية كان النت محدود الجيجات..!

تحت شعار"على قد جيجاتك مد رجليك"

أنتم اللحاف ظهر مؤخرا فقط ...ربما بسبب قدوم الشتاء...تعرف الحكومة تخاف عليكم من البرد...!!

نحن احتطنا للبرد منذ البداية واللحاف موجود..!

هشام علاء said...

صديقى العزيز

احييك على البوست الجميل

و احب اقوللك ان فى حاجة انا مش فاهمها و عايز اعرف هما الاتنين جيجا دول داونلود و ابلود و لا ايه النظام لان المعروف ان الداونلود سرعته غير الابلود فالابلود دايما بيكون اقل فى السرعة و الباندويدث

و تخيل مثلا ان الواحد ييجى يحمل البوست فيلاقى الباندويدث بتاع الابلود مش مكفى فتقعد تقلل الكلام عشان يكفى
:)

ما علينا

المعروف ان الضغط يولد الانفجار و لكن الحقيقة العلمية دى تغيرت على يد الشعب المصرى فاصبح الضغط يولد المزيد من الانكسار و مش عارف احنا هنفضل ساكتين لحد امتى

تحياتى

Anonymous said...

يخرب عقلك والله سكر حلو اوي العد التنازلي عامل زي اللي بيحتضر وبيشوف كل حاجه ادامه علي فكره انا لسه جديده اتوصي بيا ويا ريت ما تحرمنا من كلامك اللي هو احنا بنقوله علي لسانك كل سنه وانت طيب وسلااااااااااااااااااام

Anonymous said...

خلاص مهنه الطب بعد ما كانت مهنه انسانيه وبعد ما كان الدكتور في الافلام الابيض والاسود هو المنقذ دلوقتي خلاص بقي اللي يشوف دكتور يروح يستخبي ولنا الله يا دكاتره خلاص دي بقت مهنه الاخطاء الدائمه بس برده انا لسه بحترم المهنه دي جدا وبعتبرها من اعظم المهم الانسانيه بس والنبي ابقي خلوهم يعلموكو في الكليه ما تحدفوش الاكلام في وش المريض يعني لو المريض عنده كانسر مثلا تقوله ياااااه ده انت كويس خالص ده انت بمب وعال العال مش تقوله الله يعوض عليك ويجعله عااااااااااااااامر

Manora said...

يا فندم طول عمرك ساخر فوق العاده
بجد موضوع النت ده شىء فوق الوصف يعنى لما يكون الوزير المسئول مش فاهم يعنى ايه جيجا اصلا علشان يحدد حاجه غريبه زى 2 جيجا فى الشهر دى على اساس يعنى انهم يكفوا يوم و نص و الباقى تقضيه بكروت هو يمكن غار من شركات الموبيلاات الى شغاله على ودنه و قالك ما اكسبلى شويه ياولا و نقضيها كروت بدون اى ضرايب السعر بتاع الجيجا هتاخده كروت ويا حلاوة!!

Neno said...

continuing the path where we got used to leave our rights, and convince ourselves that we should be satisfied and content
ur words came directly to the aim of everything
the core of the issue, u releaved it so simply and so clear
as usual ur way of writing are more than wonderful and expressive
i hope u dont let the monster affect ur posts
keep posting..

Anonymous said...

breathtaking SHERIF ...as u always do..

رفقة عمر said...

كل سنه وحضرتك طيب
رمضان كريم

Anonymous said...

كل رمضان وانت طيب

واحلى حاجة نكتة الطماطم

واعلان ميلودي ده بيضحكني كتير
وبيخليني افكر اخد توكيل النظارات دي
واوزعها مجانا يمكن الناس تفوق لما تشوف الامور على حقيقتها


بالمناسبة
مقالاتك جديرة بالنشر الصحفي

د.أحمد

محمد العدوي said...

هههههههههه

تمتعني تدويناتك كثيرا ..


عاشت مصر نظيفة مباركة ..


كل سنة وانت طيب .

عين فى الجنة said...

ظريف ومطرقع

Anonymous said...

وانت الصادقعاشت مصر جميلة مباركة.
كل سنة وانت طيب يا راجل يا طيب

Unknown said...

ايه يابني ده
انا ماكنتش اعرف انك مشهور كده و ايه الكلام الجامد ده
طبعا انت عارفني
سلام بقي

على باب الله said...

بوست جامد جداً

بس هما للأسف مصدرين لينا الطرشة

محدش بيفكر ياخد رأي الشعب قبل أي قرار

إحنا دايماً شعب مفعول به

admelmasry said...

ههههههه
انتي مستني من اي حد يقولك رايه في اللي انت كاتبه مثلا ؟
.
.
.
لو كدا فعلا يبقي انت بتهزر
.
.
.
دلوقتي بس اكتشفت ياعني ايه الواحد بكتب بوست
ويظبطه كل شهر قبل ما ينشره
.
.
.
صدقني
انت عبقري

Moustafa` said...

انا على فكره متابع ليك من فتره ..والى شدنى ف اسلوبك انه ساخر ..وكمان انك طالع من دوامه الكبت الطبى..نيجى بقه للموضوع ..هو اسلو بحلو ..والفقرات متماسكه والموضوع حيوى ..بس البوستات القديمه كانت هادفه عن ده شويه ..انا حب الهادف اكتر..مش مجرد سشاخر وخلاص؟...فين الفكره اللى وصلتها .او فين التأثير اللى أحدثته..مستنى جديدك دائما يواريت تمتعنى كالعاده

maro said...

دولسينا
صديقى العزيز دون كيشوت
والله العظيم انا زهقت بقالى شهر بستنى بوست جديد لكن مفيش فايدة كدا كتير يا دكتور عاوزين بوست جديد انت عارف انا كنت قولتلك رائى فى البوست دا اول ما نزلته فبيتهيألى مالوش لازمه اقوله تانى كل اللى انا عاوزاة بوست جديد و متغيبش عننا كتير اوى كدا انت عارف ان البوستات بتاعتك بنستناها بفارغ الصبر ولا لازم نتحايل عليك عشان تمتعنا بكلامك الجامد دا
و كل سنه و انت طيب
عيد مبارك و نظيف و شريف
وكله سرور و جمال و كمال

فخفخينا said...

eah ya doctor enta 3'aeebt awy el mara dy ,2ala2tena 3aleek

3ayzeen postaaaaaaaat

Rain_Drops said...

أسلوبك رائع بس يا ترى ممكن تقب تاني على وجه الأرض ولا هما قررو يقطعو النت عنك لوحدك عشان تحرم ؟

;