أيها الزائر قبري .... أتل ماخط امامك

Thursday, January 05, 2006

اكليشيه

أي مذيع يفتتح برنامجه ب(أعزائي المشاهدين)وابتسامة زي العسل بتخر منه....مع أنه يرد عليهم في التليفون من طراطيف مناخيره
أي أغنية دينية يكون فيها سحاب وناس لابسة أبيض وشوية ايشاربات بترفرف ولونها أبيض برضه...هية الألوان بتثير الغرائز؟
أي انتخابات(اتحاد طلبة أو غيره) ..يسقط فيها الجماعة دول , وينجح الجماعة التانيين ويطلع الجماعة دول يتهموا ويستنكروا كل مرة على طريقة (احنا متفاجئين)0ياأخي بيقولك لايلدغ المؤمن...مش الأخ مؤمن برضه؟
أي بياع تشتري منه انشالله بيجامة كستور وشايفها معفنة...ويحلفلك انه واخد لنفسه حتتين الصيف اللي فات..مع ان الكستور تقيل زي البلوة في الصيف , ثم ان حتة واحدة كفاية اساسا
أي واحد نحس دخل الجامع ونسى موبايله مفتوح..ورن في ثاني ركعة...هايطلعلك خمسة ستة بعد الصلاة يحمروا عنيهم ويقولوا كلام كبير عن الشوشرة و والفتن و لاتنس المحمول مفتوحا يامستهتر ....ماهو لو كان افتكر الموبايل ماكانش هايرن من الأصل ياأذكيا
أي فرح أو خطوبة يجييلك حد من قرايبك ويقولك " اتجدعن بقة انت كمان" وطبعا لابد يكون الرد" عقبالك ياعمو...قصدي في حياتك"...طبعا نفس الكلام سيقال لو رزق حد في العيلة بطفل وانت لسة متجوز امبارح...هو المفروض انك مقصر وخالي من الجدعنة على طول الخط ومحتاج اللي يسخنك؟
أي رمضان يسألك فيه كل الظرفاء "صايم ولا زي كل سنة"وطبعا ترد بنصاحة "زي كل سنة " أوعى تقع وتقول صايم...شفت الافيه..مابتضحكش ليه؟
أي واحد تايه بيدور على عنوان بيت قرايبه وانت رحت موصله لغاية عتبة البيت ...يبتسم بود ويقولك "طب اتفضل اتغدى معانا"...ماتجرب تقول "يزيد فضلك" وتطلع معاه
أي حارة في التلفزيون يكون فيها جزارة الأمانة.. و صالون النزاهة...وبقالة الحكمة....مافيش مرة سايبر (ليالي زمان)؟
أي طبيب في المسلسلات (برضه)يكشف ع الواحدة من دول ثم يزف البشرى(مبروك..المدام حامل)دون ايضاح الطقوس الغامضة التي مارسها هذا الجهبذ للوصول للتشخيص بدون تحاليل أو أشعة...أكيد مد بوزه في قلب الرحم وشاف الجنين...ووجده يقول نعم لمبارك ( برضه)0
أي ست يرجع لها زوجها من الشغل وتسمع صوت المفتاح وتكة القفل ورزعة الباب ومع ذلك تتساءل بكل بساطة..(محمد..انت جيت؟)...انا لو مكان محمد..أخرج تاني وأخبط ع الباب بكل أدب وذوق واصيح بصوت أجش 0(الزبالة يامدام)0
أي شاب لذيذ شايفك ماسك كتاب ويسألك بتعمل ايه وتقوله ( أنا باقرا) ..يقولك ( أنت بقرة؟) , وكركركركركركر...احمد ربنا انك مش مرشد سياحي لأنك هاتبقى مضطر تقدم نفسك للناس طول الوقت على انك(تور جايد)0
أي كاتب يصف شابا رأى حبيبته قائلا (رقص قلبه طربا)...أو قاعد على لحم بطنه قائلا ( الجوع يعتصر أحشاءه)...أو عكشه مخبر في موقف مخل بجملة ( تجمدت الدماء في عروقه).....لو أنه كان في ضيافة حبايبنا الحلوين ..ماهي الأعضاء التي يتم انتزاعها قبل أن يقول الكاتب (فقد أعز مايملك)؟

4 comments:

Anonymous said...

عاوزة تتنشر ف الدستور

Anonymous said...

يخرب عقلك هلكتني من الضحك.. دمك خفيف قوي انا اول مرة ادل عندك بس بيتهيالي مش هتبقى اخر مرة

shady said...

لذيذ البوست ده
يامساء الروقان

رفقة عمر said...

اخيرا بوست يضحك وبرضه فلسفى وناقد
عجبنى موضوع اتغدى معنا
ومبروك المدام حامل
ياريت تكتر من بوستات السخريه دى جميله بجد

;