أيها الزائر قبري .... أتل ماخط امامك

Wednesday, January 25, 2006

صباح الخير ياكئيب


لاحظت منذ فترة...وبمساعدة بعض الأصدقاء...أني صرت متشائما كئيبا سوداوي النزعة ....بداية من اسم المدونة الهباب 0(حفار القبور)0 ...مرورا بالقالب الأسود (خلاص يعني قفلت في وشي) ...حتى البوستات بعناوينها ومحتواها الذي يجعل أي قاريء للمدونة يقول ...هوة ماله دة؟
لا والله ...البداية من قبل كدة كمان....مرة قلت لواحدة بنت حلال...يابنتي...الحياة مش أبيض وأسود...الحياة اسود بس درجات.....ورغم انتقادها لمنهجي التشاؤمي الا أني فوجئت بها بعد فترة تردد نفس الحكمة وتتمسك بها
لم أعد أنتظر الخير في أي شيء...صرت باحثا عن الخوازيق في كل موضوع ولم أعد أخشى العفريت لأني مؤمن انه في كل خرابة , وأنه هايطلعلي هايطلعلي...هاتروح فين ياحلو؟
لكن النهاردة - والنهاردة بالذات - طقت في دماغي اقف مع نفسي على تلك الافكار الهدامة وأشخط لنفسي شخطة قوية قائلا..جرى ايه ياض؟...ماتتعدل...مع ان النهاردة لم يحدث أي شيء يغير مجرى الحياة بالنسبة لي...لم تصبح الأمور أجمل أو أفضل ...ولم احصل على صدمة قاسية تفيقني من وهم السواد...لم أقرأ كتابا جديدا يقول لي (تعلم التفاؤل بدون معلم) ...لكنه ملل , ونسبة مواد كيميائية بالمخ , ومزاج متقلب كمزاجي ومزاج مواليد برج الجوزاء عموما...كلها أسباب ربما أدت لحالة الخواء والهدوء التي احياها اليوم كأني لم يعد لدي أعداء...الناس طيبين قوي...ان أحدا منهم لم يسيء الي...لا أشعر بنقمة تجاه أي شيء أو أي أحد
يخرج فجاة عفريتي الأسود ليقول في ملل:0
هانعيش كتير في اللون البمبي دة ؟
بس ياواد خليني أركز...مبررات الكاّبة والقرف والأحداث اللعينة في الحياة موجودة وفعالة وكلنا نتعرض لها ...الفكرة تكمن في استجابتنا لها...هذا مايفرق الناس الى ناس حلوين مبتسمين دوما ومنظرهم مهندم , وناس عكرة نهارها غامق وناسية السوستة مفتوحة لأنهم متعجلين ع الفاضية والمليانة
تدخل أختي مرتدية فستانا جديدا وتسألني:0
حلو الفستان دة؟(فستان وايشارب مكونان من لونين ..ابيض وأسود فقط)0
الله ...جميل جدا....مع أني- أيام حمى الكاّبة - قلت لها عندما رأيتها في فستان مشابه:0
ايه الفيلم العربي القديم اللي انتي عايشاه دة ؟
اللونين معا..في منهى الشياكة لكن ماذا تفعل لمدمن سواد وسخرية بلا سبب؟ ...طبعا التهكم والانتقادات جزء لايتجزأ من عملية التشاؤم , كان عندي قناعة أن الشخص المتفائل هو شخص رخم ثقيل الظل , عايش في يوتوبيا وهمية صدقها وبدأ يبخها في وجه من يقابله ..وأمثال هؤلاء كنت استمتع دوما بصدمهم وأنا أغني كسعاد حسني ( الحياااااة بقى لونها كحلي)0 ...ياعم اخرج من مجلة ميكي اللي انت فيها دي...أحيانا أخرى كنت أتفهمهم بل وأوافقهم ايضا...فالتشاؤم عملية سلبية تفني صحتك وتستهلك تفكيرك على كلام فارغ..كلام عجزة جالسين على قهوة السماحي ويستمتعون بالشيشة والضومنة والكلام عن ماضي مجيد ..وأيام ولت..وأيام دلوقتي اللي زي الزفت..ثم يسبون لبعضهم بالدين لأن دور الضومنة انتهى وقد خسر الفريق الأكثر تشاؤما
تدخل أمي بنظارتها الجديدة التي تجعلها ترى الناس أقصر من الطبيعي:0
لازم تحضر معانا الفرح...الناس تقول علينا ايه؟
انا هاحضر عشان خاطركوا انتوا بس
مع أن حضور الأفراح من أشق الأمور على نفسي..فهو يوم طويل يبدأ بكوي قميص و سنتفة بدلة وتلميع جزمة قديمة شبه محتضرة..ثم اتصالات مع أصحاب تذهب معهم ...تجلس على مائدة تضم أفراد عصابتك القديمة التي تتساءل في بجاحة...هما هايفتحوا البوفيه امتى؟ ...ثم نرقص على أغاني (سوق الجمال) و(طب ليه بيداري) ولابد من صديق وسطه ملبن بكرش نلتف حوله ويقوم احدنا باخراج منديل ورقي يقوم بتمزيقه ونثره على الراقص الأوحد في المنتصف ( قال يعني بينقطه)ثم نسلم على العريس ونبوسه ...شد حيلك..لو عوزت حاجة احنا ع القهوة...زفة العربيات ...نودع العريس مرة أخرى ثم نتوجه بربطة المعلم لالتهام بعض الفطير في محل ابن حلال ...ثم ننام نوما بلا أحلام
هذا لو كان الفرح لصديق..أما لو لأحد الأقارب..فالموضوع أكثر املالا ...سنجلس مؤدبين دون تعليقات أبيحة فلا يوجد أصدقاء نتبحبح معهم في الحديث..كلهم أقارب يعتقدون أنك مؤدب والعيبة لاتخرج من فمك لأنك لا تستطيع نطقها..وأنك من الاّخر تحفة وساذج ( وهو بصراحة انطباع أستمتع كثيرا بأن أجعلهم يعتقدونه)0
على كل حال...حالة السلام العادل الشامل التي أحياها مع نفسي اليوم حالة مؤقتة ...فحتما ستعود ريما لامحالة ...وسأعود الى حالتي المتشائمة المعهودة خلال أيام ...يمكن النهاردة بالليل ( دي في حد ذاتها نظرة تشاؤمية..لكني أقول هذا من منطلق أني أعرف نفسي جيدا) ...وحتى ذلك الحين , سأستمتع بحالة التراخي والوئام تلك حتى النخاع...و سأشاهد أي فيلم عربي سخيف حتى نهايته .. ولو جابوا بكار هاغني مع محمد منير ...وهاحضر الافراح كلها رغم كونها تقليدية وأقرب للتمثيل ...وهاشوف كل الفساتين حلوة حتى لو كانت عبايات سوداء لزوم المياتم ...وهاكمل هذا البلوج لاّخره رغم ان النت هنج أكثر من مرة والجهاز نفسه تعطل وعمل ريستارت لوحده دون أن أحفظ ماكتبته سابقا...ولو قابلني واحد وقال لي...انت بتشتغل نفسك؟ هارد عليه ببرود وأقول له مقولة أبو طه صديقي :0
مش عاجبك .....اشتكيني

10 comments:

Zeryab said...

الله يكئبك كمان وكمان يا مولانا

شريف محمد said...

ولو اني مش عارف ايه اللي كئبك في المدونة غير الصورة ...انما شكرا على مرورك

Ahmed Shokeir said...

مدونتك الساخرة جميلة ومحتاجة نقرا بوستاتك تاني كويس

إستناني كده إسبوع لما أفك حالة الحداد وأرجعلك ياجميل

شريف محمد said...

الله يخليك ياباشا...
شكرا لمرورك ... البقاء لله
بالمناسبة ..أنا معجب بمدونتك جدا (حكاوي اخر الليل) انما كنت باقرا بدون ماأعلق ودة خطأ سيتم تداركه قريبا باذن الله

Admin said...

انا مبسوط جدا بالمدونين الجدد انهم بيبعدوا عن الفذلكة في كتابتهم و بيكتبوا كلام حلو كدا...بس علي فكرة يا فهرنهايت لازم تعيش التفاؤل و لو علي سبيل التجربة و بعد كدا تشوف انهي الي مريحك و تعمله

شريف محمد said...

بالنسبة للتفاؤل والتشاؤم فهما بالنسبة لي مش منهج حياة قدر ماهما حالتين مزاجيتين تطغى احداهما على الأخرى أغلب الوقت....يعني الموضوع مش تجريب لاختيار الانسب , دة شيء حاسس انه غريزي مفروض علي
شكرا على تعليقك .. وانا ياسيدي مبسوط أكتر ان مدون قديم يدخل ويقرا ويعلق
ومن غير فذلكة برضه

Anonymous said...

رائع كالعادة يا صديقي

Anonymous said...

ana aheb ashtaghal el 3alam elly fashkha bo2ahaaa sobh we leel dy!!!
we fee33lan reeehom te2eel mooot!...sefa beyashtarekoo feeha koolohom!!
bab2a nefsy afham fashkhet el booo222 dy masdarhaa eeeh??
mat2oolsh 3aysheeen fel SWEED esmalaah!!!

we ba33d ma yekhalassooo kol el kalam elly beybararoo beeh 3la wogoodhom bestemrar fe megalet micky...we ye2rafoo menak we men nazretak elly hatgeebak we tegeeb kol el balad wara!!

yedoook ba2a el hetta el mateeena... we yensahook be enak te2arab men rabena!!!!!
sa3etha bass..FE 3ENEEK KOL EL SHAWARE33 CERAMIC..WE ATFAAL MADARESSNA BEYNAAMO EL SA3A 8 ...3SHAN 3ANDOHOM TAMREEN KAMAN AW FLUTE EL SOBHH!! WEL SAMA HATEB2A ZAR2AA..TAYER FEEHA BAGHBAGHANAAAT!!!..MOSH EL 3ASAFEER EL RAMAAADY EYAHA !!!...WE etc..etc

bab2a nefssy sa3etha a2ool kelma wahda basss!!! mosh 3arfa el kelma dy ba2et fe bo2y 3la tool leeh??!!!
radwa

رفقة عمر said...

واضح ان الاكتئاب بيخلق مبدعين
صلاح جاهين كان زعيم المكتأبين في مصر
بس كان مبدع جدا
انا بجد مبهورة بكتاباتك
شكلك هاتكون زى دكتور مصطفى محمود مبدع كطبيب وكاتب

kawkaw321 said...

nice post ya man ,go on u r real talent

;