أيها الزائر قبري .... أتل ماخط امامك

Monday, July 31, 2006

مهلبية ... حزب الله ... ردود مؤجلة ... وأشياء أخرى ... resurrection

تتقدم أسرة البلوج (أنا يعني بس باترسم) بخالص الشكر لكل الأخوة الهاربين من التربة (وغير الهاربين برضه) والذين شاركوني يتعليقاتهم ودعمهم في البوست السابق ... لم تتغير الدنيا بعد لكن مشاركتكم كانت كقبلة الحياة في الجسد الغريق ,أصبت بنزلة برد , و جرحت لساني, وجربت تذوق فتة الكوارع ... لكن لازلت حيا ...أحبكم و أحييكم جميعا وأهدي لكم أغنية كاظم الساهر في فيلم العقبة الكئود ..هوة دة ..أيوة دة ... الحب الحقيقي
___________________________
انتي رقيقة قوي ... بتفكريني بمدرب التايكوندو بتاعي (جملة قالها صديقي للفتاة التي يحبها ... الله يرحمه بقى) 0
___________________________
مش لابس البالطو ليه يادكتور ؟ ( قالها واحد معقد نفسيا من بتوع محاكم التفتيش على المستشفيات) 0
___________________________
أنا مش بتاع حلول ... يمكن أكتفي بالفضفضة والدعاء على الخاين وابن الحرام , اعتقد ان نجمع همومنا المشتركة في شوال واحد وندفنها سويا يعطي احساسا بالتطهر وأنك لست وحيدا في نفق مظلم ( ردا على العزيزة تمر حنة في البوست السابق ) 0
___________________________
موقف الحكومات العربية من حزب الله مفهوم وغير مدهش أو صادم ويتفق مع مانعرفه عن حكامنا من شجاعة ودعم وتعريض ... للقفا يعني .... بس أحيانا يكون سكوتهم أفضل .... عزيزي الحاكم .... اذا بليتم , فاستتروا ... وان لم تستح , فاصنع ماشئت
___________________________
وأنا قاعد .... الهوا رمى دي عليا (يمد يده بورقة) 0
دي ورقة جمع تكسب بتاعة الشمعدان
ماهو دة اللي الناس فاهماه
أمال معناها ايه ؟
جمع جنود ... تكسب المعركة
(حوار في عيادة الأمراض النفسية)
___________________________
لويز دي واحد صاحبي ... الله يرحمه ... ماشوفتيش فيلم الناصر صلاح الدين ؟ (ردا على اللي لسة بتتنفس ) 0
___________________________
أمال نتيجة النيابات امتى ؟ (بلهفة مغلفة بالوقار) 0
تعال أول الشهر (بلا مبالاة ) 0
هوة أنا بتاع الزبالة ياولية ؟
(حوار دار بيني وبين موظفة بوزارة الصحة ... طبعا قلت الجملة الأخيرة في سري هوة أنا اتهبلت ؟)
___________________________
بعد العديد من التدوينات اكتشفت اني لاأفهم في تصميم صفحات الويب وعاجز تماما عن وضع لنك صوت كما يفعل باقي خلق الله ... هاتساعدني .. هاتساعدني أروح مكان ممكن يعالجوني فيه؟
___________________________
قلبك جامد ؟ ... أعصابك حديد ...؟ لماذا اذا تنهار أمام صورة الأطفال الخارجين من تحت الأنقاض؟
___________________________
صفقوا أيها الأصدقاء ... لقد انتهت المهزلة ( بيتهوفن ... على فراش الموت ) 0
___________________________
لقد شفيت الاّن تماما (من فيلم ممنوع اسمه البرتقالة الاّلية ) 0

14 comments:

admelmasry said...

بحبك
بحبك
بحبك

والف سلامة عليك يا غالي
بجد كنت واحشني موووووووت

حمد لله بالسلامة علي رجوعك

هراءات منطقية said...

عم فهرنهايت باشا(اللى بقالى شهر كل ماحاول أرد عالبوست-الرائع- اللى فات بتاعه،أو على الرد بتاعه عندى فى البلوج ألاقى صاحب النت كافيه بيقوللى شطبنا)

ايه دة يا عم...انت كنت بتصيف؟

بخصوص النيابات (انا باتكلم عالنيابات الاستثنائية لدفعة 2004).....فدى حتطلع يوم عشرة-يوليو (اللى فات دة) انشاءالله

... said...

فهرنهايت

حرام عليك

والله قلقت عليك زى ما باقلق كدة على اخويا الصغير لما كان بينزل الشارع لوحده

واضح ان الكوارع دى تقليتها مش تمام
بدليل المدونة المهلبية دى

حمدالله على سلامتك

Just Smile said...

الف سلامة يا برنس و مبروك يا سيدي فتة الكوارع

بعدك على بالى said...

عفاك الله وشفاك دائما وابدا....

افتقدناك جداااااااااااا

شغف said...

ده على فكرة لسه مش
resurrection
كامل

بس ارتعاش الحياة فيك من تاني ... بدايات حياة

يعني انت لسه في ما بين بين
مؤرجحا مابين موتك الأول و بعثك من جديد
ما تستعجلش حاجة
كله هايجي في وقته

Veeeva said...

ايه ده!! انا مش مصدقة انك أخيرا عبرتني

لولولولوليييي

NoOR said...

انا مش فاكر كتبتلك كومنت قبل كده ولا لأ لأني الزهايمر بهدلني والصراحه مش طايق النت ولا نفسي من ساعه ما عرفت ان احنا طلعنا ولا مؤاخذه قطيع واللي بيسوقه اهبل-فاهمني طبعا قصدي عالراجل بتاع البتاع دهوه-بس انت كتابتك جامده الصراحه

Polka Dotted said...

alf alf alf salama... enta 7'alas fil bye bye :D

كلبوزة لكن سمباتيك said...

سمدلة علي الحلامة
كالمعتاد مدونة تدعونا الي التفكير في كل سطر و كلمة
هي عدة مدونات متداخلة في بعض
---
لما تعرف ازاي تنزل لينك الاغنية ارجوك ابعتلي الطريقة او ابعتلي اسم المصحة اللي حتتعالج فيها
---
اشكرك لزيارتي و اضافتي
خالص تحياتي

Anonymous said...

الف حمدلله علي السلامة
عوداحمد

انت عايز الكود بتاع الموسيقي
؟؟

وجب يا باشا
:)) welcome back to real life :))

... said...

اختفيت تانى ليه

اوعى يكون اكتئاب

شريف محمد said...

ادم المصري
القلوب عند بعضها
ربنا يخليك يازعيم
متشكر جدا ... يارافع معنوياتي

اياكش تولع
ياباشا كفاية مرورك حتى لو تركت بروفيلك بدون تعليق
انا كنت بتكلم عن حركة مارس ( لأ بتاعة النيابات .. مش 9 مارس) .. والحمد لله ظهرت اخيرا نتيجة النيابات
فلتذهب موظفة الوزارة المذكورة في البوست الى الجحيم
تحياتي يازميل النضال

حلم
شكرا على سؤالك ... لاداعي للقلق , انا مش من النوع الذي -مهما اكتأب - يلقي نفسه من البلكونة عمدا ... ممكن اسقط سهوا فقط
أما الكوارع فهي معلقة واحدة تذوقتها من باب الفضول ... شكرا مرة أخرى

just smile
شكرا

بعدك على بالي
والله انا ايضا افتقدتكم جميعا ... انما ايه موضوع (أرجو ألا أكون تجاوزت حدودي بهذا التوصيف) في الرد اللي فات ... اذا لم تخاطبيني بلقب صديقي .. أمال نكلم بعض ازاي ... ؟ مش معقول نتخاطب بحضرتك وسيادتك وجنابك ونمشي الأمور رسمي ... مش معقول بعد تعارف من فترة غير قصيرة ونتساءل (هوة احنا أصدقاء؟) ... خلي البساط أحمدي ... ودع الخلق للخالق ... ودعنا نرقص التويست ثانية
تحياتي دوما ... ياصديقتي (وأرجو ألا أكون تجاوزت حدودي بهذا التوصيف يافندم)
:)

شغف
انا مش مستعجل .. ومش قلقان
طول ما ابن رشد هو القاضي أنا مطمئن
...
لكن مش لازم انشر الورود مع عبير الصباح فجأة بعد أن كنت أردد في يأس ... وحدوووووووووووووه
حتى الانتقال مرحلي ... لكن مجرد القدرة على الدخول للمدونة والكتابة اعتبرته بعثا جديدا بعد أن كنت فكرت جديا في ترك التدوين والتفرغ للأكتئاب والجثث

اللي لسة بتتنفس
أنا أقدر ماأردش عليكي برضه؟!!
انما فرح مين اللي عندكو دة؟

نور
ألف سلامة عليك من الزهايمر ... وشكرا لك

بطابيط
الله يسلمك ... معاكش كمامة زيادة زي اللي انت لابسها؟

كلبوزة وكذلك سمباتيك (أصلي مش شايف تناقض)
الله يسلمك ... المرض دة معدي ياجدعان؟ ... لأ انا فعلا مش عارف كود الصوت ... ياريت ندور على حد يعالجنا
...حد عنده علاج يأهل النت؟
شكرا لك ايضا

ابيتاف
متشكر بعنف
انما فين الكود ؟ ... أرجوكي ..فيه اّخرين فوق يبحثون عن نفس الدواء
:)

أُكتب بالرصاص said...

تسلم إيديك على الحفرة دي

أحب الكلامات الموجزة الي عاملة زي الحقنة


تحياتي مرة اخرى

;