أيها الزائر قبري .... أتل ماخط امامك

Tuesday, December 05, 2006

دعوة للثورة .. بين قوسين , وربنا انا زهقت

هذه التدوينة مافيهاش اي فن ... كتبتها خبط لزق من وحي القرف ... حسيت بالرغبة في الفضفضة
___________________________________
زهقت من التدوينات الطويلة التي اكتبها على مراحل , ربما على مدار اسبوعين حسب الانشغال ثم اسبوع اخر للسنتفة والحنتفة والاخراج والذي منه ... بجد هذه التدوينات ترهقني ... خايف التدوينة تقتصر على مجموعة قصص متعاصة ببعض الواقع الشخصي .... رغبة طارئة في ان اكتب عن نفسي تجتاحني اليوم ... رغم اني قليلا ما افعلها
معلهش اسمحولي اتثاءب واطقطق عمودي الفقري المتمرد .... تككك ... تكتكتك ... طراخ... تمام كدة
زهقت من كثرة الجدال مع الناس ... تصور انه ممتع جدا في بعض الاحيان ان توافق الناس على مفاهيمهم الغلط (من وجهة نظرك على الأقل) ... وتوافق وتوافق , وتظل توافق وتؤيد وتستحلب اليقين المضاد الذي ترفضه في قرارة نفسك لأنك تعبان ومنهك وتتمنى تنهي زجاجة البيبس في تلك الجلسة المنيلة بسلام
زهقت من عادة الاعلام ... الجواني والبراني واللي بالي بالك ... عادة الفرقعة المفاجئة , اللغط الذي يجيدون استثماره , التسخين على النار , ثم ينتهي الموضوع فجأة لأن امرا اخر قد اقتحم الكادر .... نفسي نتجاهل الاعلام تماما لمدة يومين بدون مشاركة أو متابعة ولو من باب العند فيه ... صدقوني , هايموتوا ويقعوا لوحدهم ... وربما ترحل الوجوه الشائخة والأفكار المملة فجأة .. بالجلطة أو بالذبحة ... ونكون قد حققنا انجازا فريدا في حياتنا الكئيبة تلك
زهقت من كلمة اننا شعب متدين بطبعه ... شعب متدين لأنه يلعن الممثلات والراقصات مع انه يتابعهم بنهم على الفضائيات , يكره الملابس العارية لدرجة انه يستمتع بانتزاعها من على الاجساد الحية بحجة انها لمومسات مستباحات, يقدس الشرف والنزاهة والأمانة وقادر باحتراف على اعادة تسمية الرشوة والمحسوبية والتدليس والسفالة الى مسميات جديدة اخف وطأة , يحج ويعتمر في اوقات الفراغ (يمكن هواية) ... ويعز الكيف والممنوع زي نن عينيه .... شعب متدين الأفكار , وسخ التعاملات , قذر التنفيذ
زهقت من جهاز الكمبيوتر الذي لابد يضرب وتعيد انزال الويندوز والتطبيقات الاساساية ... مع العلم بأنك ستعيد نفس الكرّة كمان اسبوعين
زهقت من محاولات فرض الرقابة الذاتية التي احاول بها كبح اغرب الافكار والخواطر التي تردني باستمرار ... مش عارف والله خايف من ايه بالظبط ... ومتى يتحول كل المخزون الاسود بداخلي الى طز عملاقة مربكة ؟
زهقت من تناول اغلب الموضوعات بسخرية .. في التدوين .. في البيت ... في العمل ... في كل الحياة ... مع انه اسلوب ناجح ومفضل ... بفكر اتركه (وغالبا سأفشل) ولو من باب التغيير ياأخي ... ايه دة؟
زهقت من عدم قدرتي على الانتظام في متابعة التدوين والمدونين ( الحبايب منهم , والزوار , والذين اكتشفهم صدفة) ... حفار القبور دة عايز علقة جامدة عشان يتعدل , لكنه غالبا مش هايتعدل لأنه مش بيده حاجة اصلا
زهقت من قالب المدونة الاسود .. وصورة البرفيل الغريبة ... بس خايف اغيرهم مش عارف ليه برضه؟
زهقت من التصريحات , والاخبار , والاعلانات , والأغاتي , وعروض المحمول , والنت البطيء , (والسريع وحياتك) , والأفلام , والكتب ..... و...و..و
اخذ نفسا عميقا .... حد يكبّر في ودني .... وحّد الله في قلبك ياأبو لوزة
انا زهقت من الارهاق ... وارهقت من كتر الزهق .... كنت ناوي اشعل ثورة عامة على الحكم ( ليه نظام البلد مافيهوش نظام فورمات أو زرار ريستارت أو حتى نعمل كويك لود من اخر محاولة عدلة عملناها في حياتنا؟) .... ... ياخسارة , تعبت قبل ماأتكلم عن نفسي , أو أكمل ثورتي ... استراحة قصيرة يمكن بكرة أكون احسن
ولنستكمل الثورة في يوم اخر

37 comments:

Anonymous said...

أيوة كدة عفارم عليك
شوية تدوينات على فترات قصيرة تتكلم وتعك فيها براحتك
وماتنساش كل شهر كدة تدينا تدوينة فيها الزبد

ووحد الله في قلبك يا ابو لوزة
:)

بعدك على بالى said...

و لما بتكتب خبط لزق بيطلع الكلام كده؟


اقترح عليك تكتب كده كل يوم لانى بصراحة لم اشعر بفرق بيم "الحنتفة" و التلقائية، انت هو انت ، اسلوبك/ شخصيتك هم بصمتك الخاصة.... ده اولا

ثانيا بضم صوتى لصوتك قى اعلان ثورتك وبرشحك لقيادتها وكلنا خلفك... نفس زهقك والطز الكبيرة اللى نفسى اقف فى ميدان عام واقولها

تعرف .. انا كمان زهقت من كثر تحيتك والاثناء على ماتكتبه لانه جميل، و بيعبر عننا بس برضه مش قادرة اتوقف انى مقولش جميل ورائع .. بس عارفه ليه

Ayat said...

نفسى الشعور طغى عليا إمبارح وانا فى الشارع، كنت على وشك الصريخ ملعون أبو الدنيا كلها .. بس قلت أستنى شوية .. حنتفتك فى الكلام هايلة جداً .. بس تلقائيتك المرة دى عدت ..و بالمناسبة أجدع طز ممكن تتقال هى اللى تبقى جواك بقناعة تامة إنه فعلاً طز فى كل الأشياء .. هتلاقى نفسك كوووووول
بس وحد الله المرة دى عندى يابو لوزة
:)
سؤال: هو أبولوزة ده إشارة لإيه، معلش؟

Anonymous said...

لسه الطيور بطن ، والنحليات بتزن والطفل ضحكه يرن مه ان كل البشر زهقانييييييييييييييييين

أشرف حمدي said...

هو ايه ده اللي مش مترتب ومالكش مزاج و و
انا ماشفتش تدوينة اصدق وأجمل من دي
أكتب كده علي طول والنبي
حقولك حاجة يمكن مالهاش علاقة بالموضوع قوي
انا بدأت التدوين بعد مرحلة عصيبة جدا من حياتي خسرت فيها شغلي بعد ان اغلقت الجريدة التي كنت اعمل بها وأخلصت لها طوال عام كامل لم أذق فيه طعم الراحة أو النوم للحظة . أنا كمان زهقت من كل حاجة وقررت اني ما ابطلش أكتب وأرسم حتى لو كان علي النت بدون مقابل
زهقت من الطب واللي بدعه . زهقت من الدكاترة ومن المرضى ومن اللون الأبيض
زهقت كتير من نفسي . نفس الخلقة اللي بشوفها كل يوم في المراية حاجة تقرف
زهقت من الشيشة ومن السجاير ولعب الجيمز
ياخوفي ازهق من التدوين كمان لأنه آخر شيء تبقى لي في هذه الدنيا
معلش زهقتك
!!

Ma 3lina said...

هوة ده المش مركز ده انت مديها احمرات و اخضرات لغاية لما جالى عمى الوان خصوصا مع الخلفية السوداء ربنا يسامحكككك

حلوة حكاية ال

restart & format

دى الدنيا كدة هتتظبط

بالنسبة للمدعو الكمبيوتر بتاعك فا حرااااام فورمات كل اسبوعين ده كدة حيحتضر مش حلو على ال
hard


يا ريت كل لمل تزها تكتبلنا كدة

Utopian said...

يا مساء الزهق :)
ده ايه توارد الخواطر ده..أصلس لسه كنت مطلع زهقي في زمايلي في الشغل و روحت كملت عليهم في البيت..قلتلهم حرام عليكم بأه، لو انتو عاجبكوا الخلاط ده أنا قررت أطلع من الخلاط!!!!

و علي فكرة اخر مدونه ليه كان كلها زهق برده...
http://chaotic-utopia.blogspot.com/

Anonymous said...

شمرت الهدوم
وحضرت المقشة
ولبست الكوتش
وكتبت وصيتي
وقلت أهو طالع الثورة مع حد تاني
ألاقيك تصدمني في الآخر وتقولي نخليها يوم تاني
طب أقول لشعبي إيه
؟

محمود عزت said...

فضفض يا دكتور فضفض
إلا صحيح !
إنت نايب إيه و فين ؟!
محسوبك طالب سادسة قصرعيني
هي النيابة مملة ؟!

admelmasry said...

يا دكتور ...يا بحق وحقيق

احب اقولك .. خرج كل اللي جواك

لدرجة انك لو حبيت تبكي ابكي

مش عيب


العيب .. هو اللي احنا عايشين فيه من زمان

العيب اننا ما نبكيش ع الحال دا بدل الدموع دم


انا بصراحه مش هاعرف اواسيك ولا حاجة لاني محتاج اللي يواسيني انا كمان


ياعني الحال من بعضه


يلا ... سلام

كلبوزة لكن سمباتيك said...

يعني لو مكنتش ذاكرت و مجبتش مجموع و مدخلتش طب مش كان بقى احسن؟
ماله الترزي الافرنجي؟
ايافة و نزاهة و يفتح وقت ما يحب بعد ما ياخد الاستمورننج و يعوج الطربوش
و زباينه كلهم نواعمي لا دم و لا زروطة
و اهو كله خياطة
فكر تغير المسار يا ابو الفهاريت و انت توستريح
مش تبقى تيجي!

eldoctor said...

لسه فى تعليق سابق كنت يقولك يارب تصبر و تستحمل...
لازم كل فترة تبعد عن الجو .. عارف فى الدول المحترمة .. بعد 4 شهور دكتور العناية المركزة بيطلع من العناية ... هو و كلالطاقم الطبى .. اجازة اسبوع .. او يغير مكان العمل .. علشان ما يجيلوش اكتئاب .. اما فى بلادنا ... بيبعتوه دورة فى ترب الغفير .. علشان قلبه يبقى جامد..

أشرف حمدي said...

بمناسبة الموضوع
ياريت تشوفوا بوست جديد ليا علي مدونتي
http://caricatooz.blogspot.com/

Anonymous said...

ولا يهمك
عادي بكرة تتوقف عن ادراك الزهق
من كتر الطين اللي عالحواس

Lion king said...

واضح ان الزهق بقى حاله عامة كل البلوجريه مالهم كدة
اتمنى ان ربنا يزيح عننا

Lion king said...

واضح ان الزهق بقى حاله عامة كل البلوجريه مالهم كدة
اتمنى ان ربنا يزيح عننا

Lion king said...

واضح ان الزهق بقى حاله عامة كل البلوجريه مالهم كدة
اتمنى ان ربنا يزيح عننا

شــغــف said...

"استراحة قصيرة يمكن بكرة أكون احسن

ماعتقدش .. نطلع ثورة احسن , اقولك على حاجه افضل , فشلت انى اعملها ..

خليك ماشى مع اهلك , اهلك بالذات, سيبهم واقف فجأة فى الشارع , اقع على الارض وقولهم مش لاعب ..

رجل من غمار الموالى said...

عادى يا باشا
الزهق عندنا كلنا
هو برضه حد مبسوط وفرحان يدحل على المدونات
ومعظمها بيتكلم فى السياسة والفلسفة
كل المدونين ..زهقانين
ربنا يكون فى عون الناس

Anonymous said...

يا ريت فورمات للحياة او شت داون معنديش مانع

Anonymous said...

الحالة دي عندها انقراف مزمن
قد يؤدي الي انهيار تدريجي في المستوي العقلي
مما قد يسبب صدمة نتاوية عنيفة
انت حالك يا اخي زي ناس كتير
لكن انت تتميز عنهم باخراج الضغط علي صفحات مدونتك
عسي الله يفك ضغطنا كلنا
يا نروح الجنة و نستريح

shady said...

زهقت من تناول اغلب الموضوعات بسخرية .. في التدوين .. في البيت ... في العمل ... في كل الحياة ... مع انه اسلوب ناجح ومفضل ... بفكر اتركه (وغالبا سأفشل) ولو من باب التغيير ياأخي ... ايه دة؟



يجيلك ضغط تفطس يا معلم خاليك ساخر عامل ساخر فما الدنيا إلا مسخرة كبرى ولو حطيت النقط ما فيش مشكلة

Ayat said...

عزيزى حفار القبور، ليست محاولة منى لإقتحام زهقك والله بس من فضلك و أرجوك تقولى جبت قطعة الموسيقى دى منين؟ أو اسمها ايه؟ او مين اللى مألفها؟ كانت اول مرة اسمعها امبارح بس لانى دايما كنت بفتح مدونتك من الشغل و هناك مافيش سماعات .. فضلت اسمعها من الساعة 12 لحد 2.30 .. ارجوك ارجوك لا ترد لى طلبى و اكون لك جزيلة الشكر .. شكرا مقدماً

Anonymous said...

ياله خمسة زهق:

مسلسل الانتحار في المستشفى العام
بالاسماعيلية

صغار اطباء التكليف و الامتياز انقذوا المريض العجوز الذى تمكن من إلقاء نفسه من الشباك و اجروا الاشعات و الفحوصات و العروض اللازمة فى حين ان الطبيب النوباتجي ( د/ ناصر نصحى) غير متواجد بالعتاية المركزة او بالمستشفي و حضر بعد الحادث بساعة. وذلك حسب الشهود من اقارب المريض و الممرضات والا طباء. الاحد الموافق 26 نوفمبر 2006

احدث المفاجآت هي ان احد الأطباء الاخصائيين الباطنيين ( د/ ناصر نصحى) فى المستشفي الاسماعيلية العام لم يباشر المريض / محمود محمد صباح يوم الاحد و المصاب بعدة امراض داخل العناية المركزة و ترك الامر للاطباء الامتياز و التكليف واكتفى بمرور روتينى في خمس دقائق و ترك النوباتجية حيث انه بالعناية والعيادة في نفس الوقت صباحا و مش فاضى للمرضى الغلابة.

( لاحظ انه سبق الاهمال من نفس الطبيب اخصائى الباطنة ومعه اخصائى اخر يدعى ابراهيم موريس -اخصائى الباطنة- في اخراج مريض قلب اسمه عم حسن ..من العناية المركزة للشارع مباشرة و تو فى خلال ساعات لان الدكتور لا يعرف الفرق بين الحالات الحرجة و غير الحرجة للقلب و ذلك بلسان حاله حيث قال ان الادارة تحتم خروج المريض من العناية للشارع مباشرة وذلك في جريدة صوت الامة سنة 2005)
هذا و لان المريض ضرير وفقا لكلام اهل المرضى فان الدكتور/ ناصر لم يكلف نفسه معاناة تكليف الممرضات قولا او كتابة بالاوامر الخاصة بالطبيب برعاية المريض لرعاية الخاصة لحالته الحرجة مما ادى الي انتحاره من الدور الثانى.

هذا و قد افاد المدير المسئول( الدكتور/ ابوزيد محمد ابو زيد) مخاطبا اهل المرضى: بانه ما لوش لازمه الدوشة لان المريض لم يمت؟!!


أكد اقارب المرضى ان الدكتور ناصر قام بتوثيق المريض بطريقة غير ادمية وان ادارة المستشفي ارتكبت خطأ قانونياً وانسانيا تجاه المريض بحرمانه من العرض علي الطبيب النفسى في نفس يوم الاصابة او اليوم التالى لوجود اصابة بالمخ من عدمه بعد السقوط من الدور التانى بالعناية


و عجبا لان المفروض ان يتدخل الوزير كما حدث فى حالة اللمريض عاطف محمد عبدالمنعم الذى ألقي بنفسه من الدور الثالث في مستشفي النيل للتأمين الصحي 2006 فبراير .

وياتى العجب نظرا لقيام مريض اخر بالانتحار فى نفس المستشفي قبل عدة شهور!!!!.



الرجا من الوزير عدم الاكتفاء بالتقارير القادمة له لان المدير و الاطباء يسوون كل شيء و كله تمام - مشى حالك -ما لوش لازمه الدوشة-

..............



ومع ذلك كله فان المدير يقود المستشفى بنفس طريقة (( مشى حالك البدائية)) وما زال يقوم بتعيين اطباء تكليف و اخصائيين غير مدربيين وغير مؤهليين علميا فى اماكن حساسة بالمستشفى مثل الكلى و العناية المركزة و الموتى يتساقطون يوميا........
ما زالت شكاوي المواطنين من اهالي الاسماعيلية من عدم وجود انضباط بالمستشفي‏ العام . فمطلوب اذا من الاستاذ الدكتور/ حاتم الجبلي وزير الصحة ان يفحص الاهمال بكافة صوره فى هذا المستشفى. الرجا تلافي هذا القصور ومحاسبة المقصرين واتخاذت الاجراءات القانونية اللازمة .

ان ضعف مستوي الأطباء العلمى و العملي داخل هذه المستشفى هو السبب في تكرار الاهمال وقصورهم في تطبيق خطط العلاج المعمول بها عند استقبال واخراج الحالات الحرجة والخطيرة داخل العناية والباطني و العمليات الجراحية..

يلاحظ ان اختيار الاطباء الاداريين لا يعتمد علي اية من هذه الشروط و المسابقات المتعارف عليها في اي مستشفى. بل يتم حسب المعرفة والمصلحة مع المدير و وكيل الوزارة بمديرية الشئون الصحية بالاسماعيلية د/ محمد الشرقاوى بالرغم من تعيين كوادر من الاطباء الحاصليين على الدراسات العليا من دكتوراة و ماجستير و مشرفات تمريض حاصلات على بكالوريوس و ماجستير الا ان المدير يعيين في ادارة الوحدات العلاجية دون اعلان او مفاضلة قانونية و كله بالواسطة ولا ايه مش عارف؟؟

ان تطبيق بروتوكول او خطة العلاج المعتمدة داخل المستشفيات وإخضاع الأطباء بمختلف تخصصاتهم الطبية إلى دورات تأهيلية تمكنهم من أداء مهمة مباشرة الحالات الخطيرة من دون تقصير وذلك من خلال تشكيل لجنة لهذا الغرض. ......... وليس كما حدث حيث اختار المدير بعض اصدقائه للدورات بطريق المواراة حيث اخفى اوراق التدريب المفترض نشرها و قام بنشرها بعد فوات موعد التقدم للاعلان حتى يستطيع استخراج الاموال اللازمة في الخفاء لاصدقائه الاطباء المقربيين له فقط!!!!!!!!!
الرجا من الوزير عدم الاكتفاء بالتقارير القادمة له لان المدير و الاطباء يسوون كل شيء و كله تمام - مشى حالك -ما لوش لازمه الدوشة-

..............

يلاحظ الان انه تجري عملية فبركة للاوراق بواسطة الاخصائى النوبتجي لذلك اليوم حتي لا يظهر سبب عدم مروره (حيث كان بالعيادة ثم انتقل لزيارة منزلية وعاد للتوقيع 1:3 ظهرا).

يلاحظ انه لم يقوم باية عروض للاعصاب علي مدى يومين كاملين الاحد والاثنين للمريض الذى كان في حالة عصبية سيئة .

وقد قام نفس الاخصائى بالتعاون مع بعض الزملاء بنقله للقسم الداخلي المجانى الاربعاء التالى للتخلص من مشاكل اهل المريض. و يلا حظ ان الطبيب المقيم هو الذى قام بكتابة العلاج له و رفالاخصائي الدكتور ناصر كتابة العلاج في تذكرة الباطنة اطلاقا متبرءا من المريض او متخلصا منه.......!!!

اهل المريض قاموا باخراجه نظرا لموقف الاخصائي المتعنت الذى رفع من قلبه الرحمة و موقف الادارة المتخاذل.

ملائكة الرحمة حقا

الرجا من الوزير عدم الاكتفاء بالتقارير القادمة له لان المدير و الاطباء يسوون كل شيء و كله تمام - مشى حالك -ما لوش لازمه الدوشة-

..............

و عجبا لان المفروض ان يتدخل الوزير كما حدث فى حالة اللمريض عاطف محمد عبدالمنعم الذى ألقي بنفسه من الدور الثالث في مستشفي النيل للتأمين الصحي 2006 فبراير .

وياتى العجب نظرا لقيام مريض اخر بالانتحار فى نفس المستشفي قبل عدة شهور!!!!.

ومع ذلك المدير يقود المستشفى بنفس طريقة (( مشى حالك البدائية)) وما زال يقوم بتعيين اطباء تكليف و اخصائيين غير مدربيين وغير مؤهليين علميا فى اماكن حساسة بالمستشفى مثل الكلى و العناية المركزة و الموتى يتساقطون يوميا........
ما زالت شكاوي المواطنين من اهالي الاسماعيلية من عدم وجود انضباط بالمستشفي‏ العام . فمطلوب اذا من الدكتور حاتم الجبلي وزير الصحة ان يفحص الاهمال بكافة صوره فى هذا المستشفى. الرجا تلافي هذا القصور ومحاسبة المقصرين واتخاذت الاجراءات القانونية اللازمة .

ان ضعف مستوي الأطباء العلمى و العملي داخل هذه المستشفى هو السبب في تكرار الاهمال وقصورهم في تطبيق خطط العلاج المعمول بها عند استقبال واخراج الحالات الحرجة والخطيرة داخل العناية والباطني و العمليات الجراحية..

يلاحظ ان اختيار الاطباء الاداريين لا يعتمد علي اية من هذه الشروط و المسابقات المتعارف عليها في اي مستشفى. بل يتم حسب المعرفة والمصلحة مع المدير و وكيل الوزارة بمديرية الشئون الصحية بالاسماعيلية د/ محمد الشرقاوى بالرغم من تعيين كوادر من الاطباء الحاصليين على الدراسات العليا من دكتوراة و ماجستير و مشرفات تمريض حاصلات على بكالوريوس و ماجستير الا ان المدير يعيين في ادارة الوحدات العلاجية دون اعلان او مفاضلة قانونية و كله بالواسطة ولا ايه مش عارف؟؟

ان تطبيق بروتوكول او خطة العلاج المعتمدة داخل المستشفيات وإخضاع الأطباء بمختلف تخصصاتهم الطبية إلى دورات تأهيلية تمكنهم من أداء مهمة مباشرة الحالات الخطيرة من دون تقصير وذلك من خلال تشكيل لجنة لهذا الغرض. ......... وليس كما حدث حيث اختار المدير بعض اصدقائه للدورات بطريق المواراة حيث اخفى اوراق التدريب المفترض نشرها و قام بنشرها بعد فوات موعد التقدم للاعلان حتى يستطيع استخراج الاموال اللازمة في الخفاء لاصدقائه الاطباء المقربيين له فقط!!!!!!!!!
الرجا من الوزير والنقابة عدم الاكتفاء بالتقارير القادمة له لان المدير و الاطباء يسوون كل شيء و كله تمام - مشى حالك -

..............

Anonymous said...

a shivering sensation ...
al hayaaah 3la ard la yahkomhaaa ay sheeee2222!!!
radwaatefa@yahoo.com
radwaatefa@hotmail.com

شريف محمد said...

ردود جماعية

عادي ياجماعة ... مود مذبذب ... حالتي ساعة الرد الان ليست افضل , انما ادي احنا لسة عايشين ... وربنا يفرج عن الجميع

me
للي سألتني عن ابو لوزة ( انا شخصيا لاأعرفه ) ... عديها دي مجرد اسم مش اكتر

وسألتني عن المقطوعة ... وهي مقطوعة اخرى من فيلم قائمة شندلر للموسيقار الأسطوري جون ويليامز بعنوان
stolen memories

اشرف حمدي رجل الاسنان والكاريكاتير

فيه مشكلة عجيبة عندما احاول التعليق عندك ... هو انا لازم اكون مسجل على جوجل ولا ايه النظام؟

حائر في دنيا الله

اسف على الاحباط اللي تسببت فيه لك

لكن الشعوب المرهقة لاتشعل الثورات
هواة التأجيل لايشعلون الثورات
الزهق لوحده ... على مايبدو ليس كافيا الا لاشعال تعميرة جديدة
....
:) ... يلا ياريس كل عام وانت بخير

العزيزة الكلبوزة السمباتيك

سامحيني ... اصبحت ادخل على النت خطفا ... مش طناش والله ... لكن ضروري جاي
:)

الأنونيموس المولع بالتكرار

مش عارف ليه بتتعامل مع المدونة على انها موصلة مباشرة على السادة المسئولين لدرجة تكرار مسلسل مستشفى الاسماعيلية العام في البوستات السابقة ... ياريس , انا مش صاحب سلطة ... والحكاية اللي بتقولها تكرار ممل بيحصل يوميا في مستشفيات المخروبة لدرجة اننا للأسف بطلنا نندهش او ننتقد , ونكتفي (كما أفعل انا الان) بمصمصة الشفايف وطرقعة الاصابع ونقول ... عادي ياجماعة

طيب ... كيف نتعامل مع هذا ال (عادي) مادمنا زهقنا منه واحترفنا التعامل معه؟

السؤال مش ليك على فكرة ... لكنه للسادة المسئولين الذين - ابدا - لايدخلون على هذه المدونة

يلا ياجماعة وكل عام وانتم بخير جميعا بمناسبة عيد اللحمة المبارك
:))

بعدك على بالى said...

كل سنة وانت طيب وعام سعيد وعيد أجمل

تحياتى

reham said...

كل سنة و انت طيب

وارف said...

انت بتحب الموضوعات من النوع ده
وانا احب اسمع تعليقك يا برنس
على امل تغير شوية من المود بتاعك
http://waref.blogspot.com/2006/12/blog-post.html

Malk Almasria said...

كل عام وانت بخير
وعيد مبارك

Anonymous said...

سرني مع بداية العام الجديد
ان اتعرف على مدونه رائعه وقلم جميل
بنتظار البقيه من الثوره
كن بخير

Ayat said...

يارب تكون قضيت أجازة جميلة .. و ياربت تكون خرجت من مود مش قد كده لمود قد كده و نص وتلاتربع :) ... أشكرك بشدة على إسم المقطوعة اللى لفيت عليها السبع لفات لحد ما لقيتها ... أشكرك

أحمد الشمسي said...

الكلام اللي اتقال سواء منك أو من المعلقين يخليني أسرع بكتابة مذكراتي عن فترة الامتياز والتي أبدأها بفصل: مقدمة في علم الهنجمة.. العناية المركزة نموذجا!
الظاهر ان اي حد يتعرف على نظام الصحة من قريب لازم دماغه تلف...

Anonymous said...

كل ده ريستارت انت رحت تعمل ريستارت من العتبة و لا اية؟


خلي بالك في ريحة بنج مفحفحة في المدونة البلوجرية اتلطشوا

فكرت في سبوبة الترزي؟

Anonymous said...

انا عاجبني الكلام جدا وحاسه بيه اوىزكان عندى سوءال لو الواحد كان زهقان وقال ماشى على الغلط مش ممكن مع الوقت يبقى الغلط صح عنده زي الاخرينزياريت تستمر

Bahz.Baih said...

مش فايق بصراحه أقرا كل التعليقات بس بشاركك الزهق المرهق

انا نفسى زيك كده الاقى زرار ريستارت للبلد أو كنترول زد لليوم 6 أكتوبر سنه 81

مش لوحدك و أوعدك لو نزلت حاجه جديده هقراها .. بعد فتره

Anonymous said...

روعة روعة
ماعنديش غير كدة

;