أيها الزائر قبري .... أتل ماخط امامك

Thursday, November 08, 2007

الأشياء الصغيرة التي لاتراها

يقولون ان كتابة اول سطر في المقالة تسهل كتابة باقي الموضوع .... نصيحة ممتازة للحائرين بشأن الكلمات المناسبة التي ينتون بها افتتاح مواضيعهم البائسة

ك (ماسبق مجرد استهلال .... عملا بالنصيحة ليس الا) 0

دوامة اكتئاب عنيفة خرجت منها ببعض الجروح والكسور والكدمات .. كدمات جعلتني اهجر الناس والتدوين والنت والكتب والذي منه ... واغرق باخلاص في مستنقع الذات

ايهما اكثر املالا .... سرد الشكوى , ام الاستماع لها ؟

كان من عواقب فترة الانقطاع السابقة اني فقدت الصلة بأصدقاء اعزاء التقيتهم عبر المدونات ... فترة انقطاع موحية بالندالة والنسيان ... فترة انقطاع ربما لايغفرها ذات الاعتذار المكرر السخيف الذي لاأجيد سواه

لكن العقاب الالهي اتاني سريعا
دون سبب وجيه سوى لحظة فراغ عابرة قمت بكتابة كلمة (حفار القبور ) على محرك البحث العظيم جوجول ... عناوين ذات صلة بي واخرى لا تهمني ... وجدت الاسم يستخدم في بعض المنتديات .. لكن صدمت عندما وجدت بعض تدويناتي منشورة تحت عناوين اخرى او بامضاءات اخرى

كانت صدمتي عندما وجدت سلسلة حكايات من مستشفى ابو جهل التعليمي منشورة بعنوانها الاصلي في منتديات متفرقة دون اشارة بسيطة للمصدر الأصلي ... على اعتبار ان مايكتب هنا ملكية عامة يمكن لمن شاء أن يهبر منها كيفما شاء , احدهم قام بنشرها تحت عنوان (مذكرات طبيب امتياز) ... وقام (وهو مايثير جنوني) بالتعديل والتنقيح والحذف على مزاجه بتكنيك الرقابة المصرية الشهير على اعتبار ان بعض الكلمات ابيح ويخدش الحياء أو ربما يثير حفيظة المتدينين

نفس تلك المقالات وجدتها منقولة على مواقع معروفة ك الديفيدي للعرب وعمرو خالد .. لم اكن اعلم ان المدونة يتيمة لهذا الحد لاصاحب لها ولا أب

تدوينة مطرقة العاهرات كذلك تعرضت لذات المصير حيث نسبها لنفسه شخص ما على مدونات مكتوب ... نقل مسطرة وحياتك ... نقل ساذج لأنه (وهو غير مصري بالمناسبة) ... يختار تدوينة زاخرة بمفردات بيئية محلية , ولهجة عامية خالصة .. امر لم افهمه او اتوقعه من الاساس

اعتقد ان بعض الاخوة الاعزاء قد خبروا ذلك الاحساس الأليم ربما بأكثر مني .. العزيز حائر في دنيا الله , والمتألق ميشيل حنا وبالطبع الأب الروحي أحمد شقير , وغيرهم كثير

لاأقارن نفسي بهؤلاء الأعزاء ... فما عانيت يعد امر امرا هينا مقارنة بما خبروه ... لكن ذلك الالم يمزق الصدر , ويحرق الاعصاب حقا ... اعتقد اني استحق هذا الألم على كل حال لعدم انتظامي في التدوين والمتابعة ... تخيل اني لم الحظ هذا الأمر الا منذ فترة قريبة نسبيا ... ربما لأني شخص مغيب كأهل الكهف ضعيف الملاحظة ... او اعاني مشكلة مزمنة في بؤرة التركيز

بدأت اكتشف بالفعل هذا العيب الخطير ... اني أركز على امور لاتثير اهتمام الاخرين عادة , واغفل بسببها عن التفاصيل الواضحة الزاعقة .. أغرق في خلفيات الصور ... الكومبارس الغلابة ... اللحن الخافت المدفون في عمق المقطوعة .... اختياراتي في الحياة نفسها تخضع لذات العيب ... هواياتي , قراءاتي , عملي , حتى عندما اكتب ... اختار اشياءا قد لاتهم الكثيرين ... انها امور خارج بؤرة تفكيرهم .. لكنها تملأ عالمي لحد الجنون

شكة بسيطة ياأستاذ ... مجرد كانيولا
اضحك كثيرا عندما اتذكر ... ان حتى التخصص الذي اخترته هو التخصص المنسي في كل المحافل ... التخدير , التخصص الذي ينساه البعض ويكرهه الاخر باعتباره الخطر الكامن الذي لايفكر فيه سوى شخص جريء, ميت القلب ويكره سعاد نصر لحد الجنون ... دعك من انه التخصص الذي لايحب الناس ان يختاره ابناءهم لمجرد انه يخلو (حسبما يعتقدون) من مفردات السماعة والبالطو الابيض والعيادة , وكل المتلازمات المصاحبة للدكتور العقر النشيط المرسوم بكفاءة في كتب المطالعة الابتدائية , صورة كلاسيكية لاتتغير مهما تطور الوعي .. حتى عملي كان خارج بؤرة التفكير التقليدية .. وكذا هواياتي , وافكاري , وهواجسي الخفية التي تلح عل طوال الوقت

خد نفسا واملأ صدرك بالهواء ... سيبدأ التخدير الان

لكني عرفت مغبة التفكير المستغرق في امور فلسفية او هلامية في غير الاوقات الرسمية ... عرفت ذلك عندما صدمت تقريبا من ميكروباص متوحش اثناء فترة تأمل الحّت علىّ اثناء عبور الطريق ... واقسمت بعدها ان اكون كالاخرين ...سأرقب الطريق بحماس وتحفز , وسأفتح عيني على الغادي والرائح , سأكون وغدا سافلا طويل اللسان , والأهم اني سأسب العابرين الشاردين الذين كنت يوما ما أحدهم ... ولأترك التفكير الهلامي والتأمل لفترة المساء والسهرة ... بالطبع فشلت في المداومة على هذا التغيير الجديد وعدت لذات الحالة الشاردة

المشكلة الحقيقية التي اكتشفتها ان كل مفردات عملي تدفعني دون وعي لحالة استرخاء شبيهة بحالات التنويم االمغناطيسي ... صوت معدل النبض على مونيتور العمليات .. شكل رسم القلب المنتظم... صوت انتفاخ جهاز الضغط كل بضع دقائق ثابتة ... حركة جهاز التنفس الصناعي , شهيق ....زفير .. حركة تكرارية متتابعة بانتظام مادامت الامور على مايرام ... وعندما يستقر عالمك الخارجي على وتيرة واحدة .. تتثاءب خلاياك معلنة فترة سبات مؤقتة مالم تقتحمها المصائب مبددة استقرارك الداخلي وتسامحك مع الكون

ديمومة الأمور .... ونوم لذيذ

تعرف شيئا.. عندما اعيد تأمل الحياة من خارج عباءة الذات , ارى بوضوح اننا نحيا في نفس الديمومة المغرية بالنعاس ... فقط تختلف مفردات التنويم بغرفة العمليات من المونيتور وجهاز التنفس الصناعي .. الى عالم ارحب نسبيا ...بنفس مفردات الحياة الازلية , نفس الوجوه التي حولنا لاتتغير ... تحكم اعلامنا وقوانيننا ومصائرنا وحتى ايماننا الذي حسبته الأمر الوحيد المنزه عن السلطان

لازال اليوم هو هو ... اشراقة الصباح ... معركة المواصلات .... صراع أكل العيش ... حضور , انصراف ... ختم دخول , ختم خروج ... صباح , مساء .... اجازة , لا اجازة .... شهيق زفير .... شهيق زفير .... شهيق زفير

نشرة الاخبار الابدية بذات التتر ... لازال فلان مذيعا ... ولازال علان شيخا ... ولازال ترتان وزيرا .... ولازال (م.م) صامدا في وجه الزمن والشائعات دون تغير كالأهرامات وابو الهول والمعابد .... شهيق زفير ... شهيق زفير .... شهيق زفير

الاعلانات التجارية بنفس تيمات مخاطبة الغرائز الاستهلاكية ... ونفس الصوت العميق الدافيء الذي يعدك بشلالات اونو الدافئة , وشقة فخمة في الرحاب , وصلاحية مدى الحياة , ومزّة مضمونة عندما تستعمل اكس الاسر وكلوز اب و بريل كريم وجيليت الأفضل للرجال.... الخ , اضف اليها حمّى السحب وخربشة الكروت ومسابقات ال0900 ... شهيق زفير ... شهيق زفير ... شهيق زفير

معاركنا الثقافية والعلمية والدينية ... العولمة , نظرية المؤامرة , نحن و الاخرون , الحجاب وحرية المرأة , الفتاوي المستحدثة , سقف الابداع ,نقل الاعضاء .... عناوين غليظة تثير شهية الاعلام لعرضها ومناقشتها بذات الاسلوب العقيم الذي يذكي الجدال المتحجر .. ويرفع الاصوات في مشاجرة همجية نتابعها على الفضائيات بشغف وماسوشية لاتختلف عن رغبتنا الدفينة في مشاهدة معارك الشوارع وحوادث الطريق بسلبية وبلادة ونحن متكئين على الارائك في بيوتنا المكيفة... موجة معارك تلتهمها اخرى ... ثم اخرى ... ثم اخرى ... شهيق زفير ... شهيق زفير ... شهيق زفير
معركة الجرائد ... معركة الاحزاب ... معارضة , قومية .... وطني ,اخوان (مفيش اختيارات؟) انتخابات و مظاهرات واعتقالات واستنكار , ثم هدوء مؤقت تحضيري لسلسة اخرى من نفس الاحداث السابقة ( طبق الأصل العلقة اللي فاتت ... لاقلم زاد ولا قلم نقص) ...شهيق زفير ... شهيق زفير ... شهيق زفير


وعندما استمرت حياتنا - بمعجزة ما - بنفس الوتيرة , نفس الريتم , نفس التمبو لم نعد نتساءل عن حقيقة ماحولنا , غرقنا في مستنقع الذات ... اصابنا داء النعاس الذي لايوقظنا منه سوى مصيبة طارئة او ميكروباص متوحش ينهب الطريق اثناء عبورنا الشارد قبل ان نعود مخلصين لنفس حالة السبات .... ذات الديمومة التي تنال من وعينا... ديمومة جهاز التنفس الصناعي ... ديمومة الحياة ... شهيق زفير , انقباض انبساط , موجب وسالب , ميلاد وموت ........ 0

الخوف الحق .. اننا نمر بالتدهور البطيء دون ان نلاحظ .. غرقنا في بحر التنويم حتى الثمالة , بنج زائد كما يحلو لطرشجية الاعلام تسميته ... تتدهور كل علاماتنا الحيوية , المونيتور يطلق انذارا مستمرا ... هناك مؤشرات مخيفة على رسم القلب ... لازالت مرحلة التنويم مستمرة ... خطر الموت يملأ المكان برائحة يميزها العارفين ... لازال الانذار مستمرا ... يبدو اننا كنا بحاجة لطبيب تخدير جيد ... او ربما لم نكن بحاجة الى واحد من الأصل
نغلق الغاز المخدر ونوقف جهاز التنفس الصناعي

فتح عينيك ياأستاذ ... 0
هل حقا لازال في الوعي بقية ؟
حمدا لله ع السلامة ....... 0
ياأستاذ .. أستاذ ..!!!! 0

34 comments:

Anonymous said...

Welcome back to the cyber world.
Gemini

Anonymous said...

حمدا لله على سلامتك يا دكتور انا افتكرتك مت والله بس بصراحة انا ماكنتش بياس منك معرفش ليه انا اللي رميت طوبة كل حاجة تانية في حياتي كل يوم اول حاجة اتصفحها بعد البريد هي مدونتك ليه معرفش يمكن لاني بحسدك فعلا انا بتعذب بكل الكلام اللي انت ببتقوله بدون ما اقدر اقوله ولا اكتبه حاجة مثيرة للشفقة مش كده كل يوم بطمن على مدونتك عشان خايفة يكون صوتي راح حتى الاوقات اللى مبتقاش كاتب حاجة جديدة بقرا مواضيعيك القديمة!!!!!!!!!!! عالم فاضية مش كدة لاو حياتك عالم عندها اكتئاب مزمن ومش عارفة تعمل حاجة غير انها تدور على حد يكون صوتها فاكر الساحرة الشريرة في قصة عروس البحر الصغيرة قصة الاطفال بتاعة هانز كريستيان اندرسن بتصعب عليا اوى اكيد كانت بتدور على صوتها ومش لاقياه متبقاش تغيب اوى كده تاني لاني بخاف يكون صوتي راح حمدالله على سلامتك تاني .......الا قولي متعرفش دكتور نفساني كويس

Anonymous said...

صحيح سمعت اغنية حاتم فهمي مفيش حاجة حلوة اوي اسمعها هتعجبك

رفقة عمر said...

السلام عليكم
حمدالله على سلامتك انا امبارح كنت لسه هنا وكان لسه مش موجود البوست دة
الحمد لله انك حضرتك بخير
ولا تتخيل كنت سعيدة قد ايه بزيارتك جدا
واشكرك على كلامك الجميل اللى رفع من روحى المعنويه جدا جزاك الله خيرا
وياريت تسعدنى بجد بزيارتك لان المدونين المحترمين مثلك بجد بتشرفنى زيارتهم جدا وبتسعدنى
وبخصوص سرقه مواضيعك دة دليل نجاح وان كلامك واسلوبك مميز جدا جدا
تفتكر فيه حد يسرق شئ مش ليه قيمه
اللى بيسرق بيسرق اشياء ثمينه وقيمه
المرة دى لم يذكروا المصدر ان شاء الله المرة الجايه يكون النشر فى جريدة كبيره ويذكروا المصدر
وكمان نشوفك ان شاء الله
على العاشرة مساءا او القاهره اليوم
وان شاء الله هايكون قريبا جدا
اتمنى لك كل توفيق وونجاح وتحقيق كل ما تتمناه اللهم امين يارب العالمين

Unknown said...

ياااااااااه ده حضرتك خدرتنى بجد

معقولة قربت على سنة فى التدوين واول مرة اكتشف الكنز ده النهاردة بس؟؟؟
!!!!!

انا مصدومة من الاسلوب والكلام والمنطق بجد ما شاء الله عليك

مخبيش عليك انا قبل ما اقرا البوست ده كنت مهيسة جامد وعايشة لحظات من الطفولة بس بعد ما قريته حسيت انى شوفت الناس اللى حواليا وانا من ضمنهم ماشين فى سبات كأننا اموات

المعنى اللى قلتله ده فكرنى بحديث او مقولة مش عارفة ان الناس كلهم اموات وإذا ماتوا إنتبهوا .. يعنى لما نموت بجد حنعرف الحقيقة

سبحانك يارب بعد التهييس اللى كنت فيه ده كله دلوقتى مش عارفة احوش دموعى ومش عارفة ابطل تفكير فى حالنا

ربنا يخرجنا من الدنيا دى على خير

ومن ضمن صدمتى بردو ازاى قربت على سنة بدون واول مرة اعرف مدونة حضرتك النهاردة وازاى الأعداد هنا مش بالملايين؟؟

بجد مدونتك تستحق الزيارة والقرائة والتقدير والإحترام .. حضرتك شرف لعالم التدوين اصلا

انا مش بجامل فى اللى بقوله لانى مش بعرف اجامل من الاساس بس بجد كلام حضرتك ابهرنى وخلانى ازعل انى مش من زوار المدونة دى من زمان

بجد جزاك الله خيرا على كل حرف كتبته وربنا يسعدك ويباركلك ويوفقك دايما يارب

تحياتى وخالص إحترامى وتقديرى

Anonymous said...

ازيك يا باشا و الله واحشنا جدا
و كويس انك رجعت تكتب تانى على البلوج بتاعتك

بالنسبة لموضوع حقوق الكتابة بتاعتك فانت ممكن لو حبيت تغلس على الناس دول فهي خطوات بسيطة قوى
حصلت معايا فى شغلى - مع انى كنت واخد مقالات و كتبت مصدرها و لينك للمصدر بس برده كان هيطلع عينى-
بص يا ابو الدكاترة انت هتبعت الاول لصاحب البلوج او المنتدى او غيره رسالة بالانجليزى تقوله فيها ان فيه تشابه بين المحتوى المنشور عنده و المحتوى اللى نشرته انت قبله بفترة و تقوله انك بتديله مهلة زمنية قول 3 ايام مثلا لتصحيح الوضع و الا هتلجأ للطرق القانونية
طبعا الباشا اكيد هيطرمخ و يسيبك دمك محروق
تروح بعدها هتلاقى ان مصدر دخل الموقع اللى سرقك هو اعلانات جووجل ادسنس
google adsense
و اصلا جووجل ادسنس بتستنى للمعلنين العرب على شعرة
فتروح انت زى الباشا داخل على الموقع ده
http://www.google.com/dmca.html
و شوف بقى الخطوات و كده

نصيحة تانية
حاول تحط على البلوج فووتر
footer
دليل لأنك مش موافق على النقل بدون الاشارة للمصدر
http://creativecommons.org/
على الموقع ده انت هتلاقى ازاى تحط اتفاقية حماية ملكية فكرية ليك

عاجبنى قوى توصيفك لحالة الاغتراب اللى بتمر بيها
و انا مش عايز اظهر بمظهر المنصح المرشد الاعلى بس
حلو الكلام اللى بين السطور بس الاحلى لما يبقى ما بين الناس
و اظن انك فاهمنى
;-)
اسف على الاستعجال فى كتابة الرد و اتكلم معاك قريب

بعدك على بالى said...

لم يبق من زمن الحكاية يا صديقى إلا بضعة كلمات، لا مجال فيها للاحلام ، لم يعد امامنا الا ان نلغى حواسنا ونختم بالشمع الاحمر على ابواب ذاكرتنا وامانينا ، لا وسيله امامنا غير ان نمضى / نستهلك ما تبقى من ايامنا ونحن نجول بالزوايا ونردد مع هوراشيو فى حواره مع صديقة هاملت"هناك أشياء بين السماء والأرض تلخبط النافوخ"، لامجال للبحث عن الكينونه وبالتبعيه اثباتها، فنحن من استسلمنا لتحويل كل "شىء" و"معنى" الى مجرد سلعة تباع فى الاسواق، وعندما نتحول الى سلعة على رقعة السوق المهوله نصبح مثل قطعة شطرنج لايمكننا تقرير مصيرنا،فجميعنا وفقا لمنظومه "البرمجه" مسيرون وفق أهواء اللاعبين..

عفوا لم أتعمد فتح جراح ابدعت فى رصدها عبر هذا النص المميز والتعبير عنها بلغتك الساخرة شديدة المرارة والوجع، كما لا انصحك بمواجهة كل هذا العفن، و تأسيس حياة لا نكتفى فيها "بالنهى عن المنكر"، ولكن تتحدد تفاصيلها "على المعروف" (المستحيل بعينه) أنا فقط أطالبك بألا تسقط ، فهذا هو النجاح الوحيد
ليس مهما أن تعيد صياغة مفرداتك أومجمل تفاصيلك أو أو، لن تعينك على النجاه، فقط أوقف القلب عن النبض وتوابعه من احساس ومشاعر و ألم وحزن على مجمل مايدور حولنا ، لقد تعلمت مؤخرا أن ننبض لتحيا غير أن ننبض لنعيش.. كن مثل قطعة البلاستيك لا مجال فيها لادراك التفاصيل أو الوعى بها...


تحياتى ايها الحكيم
وعفوا للاطاله يا رفيق


البستانى الصبور

adhm said...

تقريبا المدونة الوحيدة اللى استحمل لاخرها وهى بخلفية سودة
ومش عارف لية لغاية دلوقتى
اكيد اكيد فية سبب خفى
او مش خفى
جارى البحث عن سبب للمتابعة مش موضوعنا
لما اعرف بالظبط حاقولك
المهم
مين ميم ميم دة
انا عارف حة ميم

تخاريف خاصه! said...

تدوينه متميزة فعلا..

وهى الحياه ايه الا شهيق..وزفير..؟؟

تحياتى ع البلوج الرائع..
..

وارف said...

اولاً حسبي الله ونعم الوكيل في كل من يسرق الافكار ولا ينسبها الى صاحبها الاصلي او على الاقل يوجه شكراً خاصاً
ثانياً اتمنى الا أكون انا المقصود بالاتهام لأني أشرت الى مدونتك في مقالتي
http://waref.blogspot.com/2006/01/1.html
الوجه الآخر للعملة الرخيصة
والله العظيم انا أرسلت اسم المدونة واللينك فقط ولم اقل انهم بتوعي
ثالثاً سيبك من الكلام ده كله انت رجل سكرة وكلامك زي العسل، والمرة الجاية اشتغلوا بالأيزوفلورين علشان الأستاذ يقوم :)

Unknown said...

ايه الجمال ده تسلم ياريس
بوست عميق
اهنيك عليه
و متعلش نفسك علي اللي حصل في البوستات اللي اتنسخت
هو ده اخرهم
انما انت الاصل

... said...

أيها العائد
أحببت أن اكتب لك من خلال غيامات التيه المحاصرة لأرحب بك وانفى عنك تهمة الندالة
اكتب لك وانا الامس الكيبورد..من بعد طول معاملة لبلوجر من خلال شاشة الموبايل الحمقاء التى اتعامل معها باعتبارها نوت بوك
وارقب من خلالها كل ما يجرى وكانى اتلصص على التدوينات والردود وأكتب كانى أرسل اس ام اس لكل البشر
لا اعلم هل بلوجر هو ما احالنا لمتلصصين على الحياة غارقين فى تفاصيل خاصة بكل واحد فينا ام هو قام بتجميع مرضى التوحد فى بوتقة واحدة
لا ادرى اين العلة
ولا اظنك ستخبرنى يا طبيب
ما علينا
احببت ان اطيب خاطرك
وارحب بعودتك المشوبة بالحزن على المسروق
لا أدرى هل هناك ما سرق منى
لا اتابع غير سرقات الاخرين
ربما دخلوا البيت وتركوا لى كيبورد اضافى رأفة بحالى
:)
لكن نصيحة من طيارة تطير عاليا
الرؤية من بعيد مؤلمة لحد بعيد
واظنك خبرت بنفسك ان تخرج خارج الذات المنغلقة قليلا فماذا رأيت يا مسكين غير احتضار جماعى؟؟

اظن يجب عليك تغيير اسوداد التامبلت فربما جعل هذا الردود اكثر تفاؤلاً

تحياتى

spellz said...

الاكتآب علينا نحن طلبة و خريجى طب حق

بحب بوستاتك قوى حاول تكتب اكتر لو سمحتت

M.Shalan said...

مبروك

Anonymous said...

ندويناتك تغسل روحي بالثلج و الماء البارد,تعجز كلماتي حقا عن و صف كم الصفاء الذي ينير روحي و عقلي عندماأقرأكلماتك

استمر

استمر

Anonymous said...

حمدا لله على سلامتك يا دكتور

وانا كنت بزور المدونة على فترات متوقع اني الاقي بوست جديد
وكنت بزعل لما الاقي مفيش جديد واقول ربما انت مشغول

ربما اكون انا اخر من يتكلم بشأن الاكتئاب
ولكن
خذها خبرة مني
لا تستسلم للاكتئاب.. لسبب واحد
هو أنك أفضل وأقوى من هذا
فد لا يحسن الفرد تقدير ذاته أحيانا
لكن يجب عليك ان تذكر نفسك دائما بأنك إنسان مكرم وان لك خالقا لن ينساك
ومهما ضاقت حلقاتها فرجت

عارف انا خرجت من دوامات الاكتئاب اللي كنت اعاني منها طوال فترة الدراسة وشاركت في وضع لبنات وتأسيس هذا الموقع
www.almoarekh.com
ومن خلاله وفقني الله لمعرفة ناس
تتشرف بأنك تنتمي معهم لنفس البلد
رغم كل الظلام هناك أمل في بزوغ الفجر

Anonymous said...

صديقي قالها مدحت صالح
الزمن ده في كذا بلياتشو, الزمن لاطشه قفا,حرقه بجاز.
كلنا بنلعب على حبال الدنيا شداها لينا بنحاول نمشي بشويش عشان مانوقع يمكن ده اللي مخلينا في سبات او غيبوبة
يا صديق احنا حافظين مش فاهمين
تحياتي لك
وربنا يرزقك ببصلة تفوقك
سلام

شريف محمد said...

اول مرة ارد من سنة تقريبا
من باب البر بالوعد القديم الذي قطعه فوزي يوما

الانونيموس gemini , تخاريف خاصة , spellz , m.shalan , اسلام امين , tigereye , رانيا

متشكر جدا على اهتمامكم ومتابعتكم ... واسف على التأخير

mai
يارب افضل عند حسن ظنك ... مش عارف مين حاتم فهمي دة انما نبقى ندور عليه ... يمكن يطلع احسن من الدكاترة النفسيين .. بالمناسبة انا اعرف اتنين كويسين ... اي خدمة

رفقة عمر
متشكر جدا على كل هذا الثناء الجميل ... صعبة حكاية العاشرة مساءا دي مع واحد يهوى المقابر ... ع العموم ربنا يسمع منك

انسانة
شرفتيني بزيارتك وتعليقك وكلامك الذي لااستحقه (لا انا مش بعمل فيها متواضع) .. مادام خرجتي من التهييس .. فدة كفاية

فؤادوف
اول مرة تعملها وتعلق
شكرا على النصيحة ... مفكرتش جديا في حكاية الملكية الفكرية دي قبل كدة... من باب الكسل او النية الطيبة ... جاري السعي في الموضوع .. وان شاء الله نتقابل قريب

بعدك على بالي
كنت قلتلك زمان عن الناس اللي احرقتهم مشاعرهم ... التيار العنيف اللي بيسري في اجسادهم كصدمة الكهرباء عندما تصدمهم الحياة صدمات عنيفة تلهب اعصابهم الحساسة.. وبعد فترة قرروا ان ينتزعوا (فيشة احساسهم) ... فلا يتألمون او يبكون ... ويبقون - كما تقولين - كقطعة البلاستيك .. مرنة ... صماء .. والاهم .. قابلة لاعادة التشكيل
البعض يفضل الالم النبيل ( او حتى العنيف) على الحياة بعيون مصمتة مطمئنة ... اعتقد اني سأترك الاختيار للزمن قبل ان اقرر نزع الفيشة

تحياتي ايها البستاني الصبور النبيل

ادهم
ايه الفرق بين (ميم ميم) و (حة ميم) و(ميم حة ميم)؟
مجرد اختزال مختصر من واقع البطاقة ياصديقي

وارف
لا طبعا لم اقصدك انت يازمل ... كلامي كان عن التدوينات اللي جمعها احدهم تحت اسم من تأليفه دون استئذان ودون رابط ...عملا بنظرية (دي بتاعة الشعب)
على فكرة الهالوثان مش متوحش اوي أو له انياب وبيعض العيانين زي مابيقولوا بتوع البيت بيتك واخواتها .. انما طبعا فيه الاحسن منه
وبعدين ماله البنج الموضعي .. كل الناس بترفضه للاسف وبتطلب ان تغيب عن الوعي خلال العملية ... خلاص .. همة احرار

dr amr
نورتني ياريس ... ماجيتش انت الاسبوع دة خالص ... شد حيلك

حلم
تصدقي بقة شبه مستحيل اغير هذا التمبلت الاسود ... تعود , ادمان , احساس بالألفة ... كله جايز
الرؤية من بعيد توضح الأمور ... ادمان التفكير بتلك الطريقة شبيه بادمان لون التمبليت
مبروك العودة للكيبورد ... احسن من شاشة الموبيل و النمنمة ووجع القلب
الأهم من دة كله .. انك برأتيني من الندالة

تحياتي

Anonymous said...

انا عرفت انك بعت تعليق من صديق مشترك
اصل بينى و بينك كنت كتبت التعليق بعد ما قمت من النوم و قبل فنجان قهوة الصباح
على فكرة انا مبدئيا ضد حكاية الملكية الفكرية و الاستغلال اللى بيتعمل بأسمها بس فى نفس الوقت انا مع الحقوق الادبية و الاخلاقية و خلافه و ما علينا

انا علقت علشان انا لقيتك قايل ان حقوقك الادبية اتسرقت لكن ماقدرش احكم على باقى الكلام لأنك بتتناول ظروف موضوعية بنمر بيها من منظور ذاتى او بصياغة ادبية زى مطرقة العاهرات
يعنى هاعلق اقولك ايه ؟
كل اللى اقدر اقولك عليه انى باستمتع بقرائة قراءتك لذاتك و اللى بحت بيها على صفحات مدونتك .. تقدر تقول عليها لذة التلصص لبعض تفاصيل حياة انسان تانى من بين فتحة شبابيك تدويناته

اما باقى التفاصيل اللى كتبتها حوالين تفاعلك مع الواقع الموضوعى فأنا مش مختلف معاك فيها

يعنى لا اختلاف يدعو للنقاش
لكن ممكن انصحك مع انى اصغر منك بأنك لازم تنقل مشروعك الادبى او الفكرى او حتى التأمل - زى ما انت عايز
الى فضاءات اخرى غير الواقع التخيلى او متوازى معاه

اظن و معظم زوار مدونتك اللى سبقونى فى التعليقات بيظنوا برده ان اسلوبك جميل فى تناول المواضيع و اسلوبك القصصى هايل

فانا نصيحتى ليك انك ممكن تبقى مشروع ادبى هايل فبلاش تتجاهل ده

سلامى ليك

كلبوزة لكن سمباتيك said...

وحدة واحدة يا ملواني
انت عامل زي البلونة المليانة مية لما تفرقع بتغرق الدنيا
يا سيدي حمدا لله على السلامة \
محدش نساك و لا حاجة و كلنا بننقطع و نرجع عادي جدا

بالنوسبة للبوستات اللي اتلطشت فده برضه عادي جدا مفروض تنبسط لانها لولا انها مواضيع مميزة مكنتش اتنشلت


بالنوسبة بقى لتخصص التخدير فده تخصص هايل و لولا انك دخلته كان زمان لسه الناس بتتخدر بالشاكوش على دماغها
و لو اني ما زلت شايفة انك لو كنت اشتغلت ترزي حريمي كنت اتسنجفت احسن من كده

شهيق زفير انا الهث و انا اقرا مقالك اتمنى اصل لاخره و لا اريد حتى استمتع بكل ما فيه



فنان يا ولدي

Amr said...

أسلوبك يشبه أسلوب دكتور أحمد خالد توفيق كثيرا, لدرجة أني أول ما أبتديت أقرأ حسيت أني بقرأ ليه فعلا.
بس فعلا اسلوبك جميل, بس مليان كئابه.

بالمناسبة مقلات دكتور أحمد موجودة هنا: http://www.rewayty.com/Public/Articles.aspx

هشام علاء said...

الغفلة داء البشر يا باشا

الغفلة حتى تصاب بصدمة تفيقك لمل يوجد حولك بالفعل

ولكن فى عالمنا الحالى لم نعد نعرف هل الغفلة افضل ام الواقع المؤلم

تحياتى للك على المدونة و انا اعتقد ان سبب نجاح مدونتك هو القدرة العالية على التعبير عما بداخلك بدرجة عالية من الوضوح

لا تحزن من سرقة المقالات و دايما يبقى الاصلى اصلى و مادمنا نكتب معظمنا تحت اسماء مستعارة فلا يوجد فارق كبير وممكن تعمل موضوع الفوترر اللى يمنع الكوبى من الصفحة بتاعتك لتمنع تكرار ذلك

تحياتى ليك و ارجو ان تتحفنا بمقالاتك العميقة باستمرار

السينيور said...

انا اول مرة ازور المدونة بتاعتك

لكن واضح انها ان شاء الله مش هتكون اخر مرة

البوست بتاعك جامد اوي

طريقتك واسلوبك في الكتابة مميزين فعلا

ومتزعلش على البوستات اللي بتتنقل عشان ده معناه ان اسلوبك مميز وناجح

تحياتى يا استاذى العزيز

Anonymous said...

معالي الدكتور المحترم
يخرب بيتك يخرب بيتك ألف مرة
عندنا في الصعيد بيقولوا يلعن أبو الزين في عيلتك ودة مدح والله مش ذم والمقصود ان الزين في عيلتك جنبك يبقى صرماتي , انت فنان وموهوب وابصم لك وانا بحكم عملي كاستشاري أوراكل قديم ومهندس أصلا مش سهل ان حاجة تلفت نظري لكن بصراحة قرأت لك مطرقة العاهرات ويومها أجبرتني انا واعوذ بالله من كلمة انا ان أكتب تعليق وأقول لك فيه انك رائع رائع وبعدين كنت مستعجل البوست اللي بعده فأرسلت لك باستعجل دون جدوى والآن بعد مرور شهرين أو أكثر رجعت أفتكرك بإبداعك وأخش تاني عشان أقرأ القنبلة الجديدة بتاعتك طبعا تعليقي على الحرامية اياهم ان مافيش حل والسرقة كما تعلم تطال كل سيء مش هقولك حتي رسائل الدكتوراة لأ دا حتى الرسائل السماوية فمعلش بس اعلم ان انت الأصل وكمان الموهبة عندك انت واعتقد دا كفاية
وبعدين انا عايز اسألك انت ما حاولتش تكتب زي ممتاز القط ومحمد ابو الحديد ومعكرم مش محمد احمد والناس دي والله انت لو كتبت في الأخبار وللا الأهرام هيروحوا يشتغلوا عجلاتية وللا انت خايف دماغك تلف وتبقى تبع السلطة
ولك التحية
مهندس مصري أصلي متغرب في السعودية

Che_wildwing said...

تعرف
لا متعرفش

تفتكر انا ههعرف
برضوا انا معرفش

تفتكر حد يعرف
مظنش

بعد حقنة البنج دي فعلا
لم يعد في العقل بقية

Anonymous said...

شاركونا من جديد
http://who-is-wael-abbas.blogspot.com/

Anonymous said...

at least ive found onther anesthtest here on blogger ive liked your style in writing and ive like ,ore your topic معنى ان تكون طبيب تخدير it descrobed us litrally hope that we can be in touch by the way i got a blog 2 and by coencedence they pear the same style lol hoep u drop by and leave a comment www.falastine.blogspot.com

DR - LION said...

at least ive found onther anesthtest here on blogger ive liked your style in writing and ive like ,ore your topic معنى ان تكون طبيب تخدير it descrobed us litrally hope that we can be in touch by the way i got a blog 2 and by coencedence they pear the same style lol hoep u drop by and leave a comment www.falastine.blogspot.com

رفقة عمر said...

السلام عليكم
ليه مش فيه جديد
اتمنى يكون المانع خير

Anonymous said...

مش تبارك لوائل عباس حبيبك يا عم
http://who-is-wael-abbas.blogspot.com/

مطرح ما ترسى....دقلها said...

تحياتى على بوستاتك الرائعة...

انت استاذى المفضل
والعزيز

أطباء said...

بعد إذنك يادكتور ياريت تعرف الناس بينا حتى نستطيع توحيد الأطباء جميعا
وشكرا

دعوة عامة

أطباء بلاحقوق تدعوكم لحضور مؤتمر القاهرة في نقابة الصحفيين الدور الرابع والذي يناقش مشاكل حركات المطالبة بزيادة الأجور
مواعيد ندوة أطباء بلاحقوق هي :
1- يوم الجمعة بالتعاون مع حركة تضامن من الساعة 6 مساء إلى الساعة 7 والنصف .
2- يوم السبت بالتعاون مع جمعية الحق في الصحة من الساعة 3 والنصف إلى الساعة 5 والنصف .

نرجو الحضور والمشاركة

وشكرا ..................

Anonymous said...

ياللي عل اكتافكم دبورة
ونفوسكم دايما مغرورة
ماتقولشي عملتوا الاسطورة
اسطورة تحكيها الاجيال

اسمعوا مني

ده الكلمة في زوري محشورة
واهي ممكن تبقى من الأمثال

أغلبكوا كلاب مسعورة
وبنهش لحومنا مسرورة
وبربط القيد والأغلال

بسببكوا بلادنا مقهورة
وعيون أولادنا مكسورة
وكنوز أراضينا مطمورة
وبقينا بشر الأحوال

اصحى ياظالم
وامسح عن عينك الشبورة
عمايلكوا السودة المسحورة
في نحوركم راجعة ومدحورة
والحق ده ناسه منصورة
والأرض هترجع معمورة
ولافيها مكان للأندال

Anonymous said...

سعدت كثيراً بالإبحار في مدونتك الراقية واستمتعت بما بين السطور ....
وصلت الرساله يادكتور

يشرفني زيارتك لي وأهديك لوحاتي وخصوصاً عظمة الكرسي
http://atefzromba.jeeran.com/

عاطف محمد زرمبه
فنان تشكيلي

;