أيها الزائر قبري .... أتل ماخط امامك

Saturday, April 29, 2006

سور مدرسة البنات

كلمات عبيطة ع السور
جدار (1)
0
حسام (علامة قلب) رميساء .... تحته بشوية .... 0
ناجي (علامة قلب مغروز فيه سهم ) رميساء .... تحته بشوية تانيين .... 0
صلاح (قلبين في بعض وسهم) رميساء ... وتحت خالص ... 0
يوسف + رميساء = حمادة (الناس اللي بتجيب م الاّخر) 0
جدار (2) 0
مدرستي جميلة ... نظيفة ... متطورة .... منتجة
صورة لسيدة مبتسمة بثقة تحتها كلمة (ماما سوزان) 0
صور الأهرامات وبرج القاهرة مرسومة بسذاجة ومن بق أبو الهول تخرج كلمة ..(أنا الحضارة) 0
جدار (3) 0
فاضي تماما ... صباحا يحتكره بياع الخضار ... ويتحول مساءا الى مبولة رسمية للمزنوقين الحيارى (للجدار رائحة عجيبة هي مزيج من رائحة الورور الصابح , والنشادر .. الصابح برضه) 0
جدار (4) 0
ملصق مهتريء لمرشح لمجلس الشعب منذ 10 سنوات تقريبا وبخط مميز استشهاد بالاّية : (ومالنصر الا من عند الله) .. طب كان عامل دعاية ليه دة؟
أمك يارميساء مكتوبة بسبراي أحمر غلاوي ...وامضاء (حسام الجعر) 0 (...)
جدار (5) 0
ملصق متوسط الحجم .... (نحن فداك يارسول الله ) ... ستوديو عادل
فاكرين نكتة (ليفي) ينعى ولده ويصلح ساعات؟
جدار (6) 0
بخط عريض جدا ... ممنوع الكتابة على الحائط
___________________
على هامش التدوينة
اّسف مرة تانية لتأخري عن الرد أو التعليق أو حتى المرور على الجميع ... غصب عني والله ... أنا في أزمة اليومين دول ... ادعوا لي

28 comments:

مختار العزيزي said...

تدوينة لطيفة وعميقة ومختصرة لكنها محملة بالمعاني والقدرة علي عدم بلع الأشياء الملقاة في الحلق ...أحييك .بقولك ايه هو ستوديو عادل عنوانه ايه بالظبط؟

إ بـ ر ا هـ يـ م said...

و انت هتكتب عليها ايه رميساء دي شكلها جامده اوي

هوميروس said...

ربنا يعدي الازمة علي خير اولا
ثانيا جامدة التدوينة بتاعتك دي
تعرف اكبر فايدة لصورة السيدة الفاضلة ان اي كتاب بيبقي عليه اسمها مبيبقاش اغلي من 2جنيه
ربنا يخليها للقراء الغلابة اللي زينا

ادم المصري said...

ماشي يا فليسوف عصرك .. الواحد لما يحب يبعت لسياتكدعوة يعمل ايه ؟

السهروردى said...

إيه ياعم إكتشافات دى ، تعالى عندنا فى شارع المدارس فى الجيزة
حاجة تشرح الروح يعنى
كل اللى قلبك يحبه
لعلمك فى كتاب مخصص للموضوع ده بشكل عام من أول الحيطان لحد عربيات التاكسى و النقل و لحد كمان أبواب الحمامات بس مش فاكر إسمه

السهروردى said...

إيه ياعم إكتشافات دى ، تعالى عندنا فى شارع المدارس فى الجيزة
حاجة تشرح الروح يعنى
كل اللى قلبك يحبه
لعلمك فى كتاب مخصص للموضوع ده بشكل عام من أول الحيطان لحد عربيات التاكسى و النقل و لحد كمان أبواب الحمامات بس مش فاكر إسمه

shady said...

حلوة التدوينةدى
حلو وانت بتكتب من قلب الازمة
ههههه

mindonna said...

ظريفة اوي جدار 5 :)

ربنا يفك أزمتك

tamer said...

بوست جميل

ربنا يوفقك

الى الامام

Mariam Al Moatassem said...

طب ولو كان سور حديد ياترى حيبقى عليه إيه؟؟؟
هو بصراحة السور الحديد ده ليه ميزة وعيب في نفس الوقت
أولاً ميزته إنك ينفع تتشعبط عليه بمنتهى السهولة ولا كأنك قرد مسلسل، بس المهم محدش يشوفك وإلا ساعتها بقى يا حلو...
أما العيب فإن هدومك ممكن تشبك في الحديد وساعتها حيبقى شكلك وكأنك بلطجي لسة خارج من خناقة أو شحات لسة خارج من صفيحة زبالة مش فارقة
والله يا أخ ياريت تفكر لنا في حاجة نكتبها على السور الحديد
والسلام امانة

Mariam Al Moatassem said...

لماذا يوم للعمال؟..

لماذا لا نقوم نحن الشباب الذي تعطلت قواه وتيبست عضلاته وتوقف مخه، بالتحرك وتشغيل أنفسنا بأنفسنا.. لماذا لا نقوم بالعمل تحديداً في ذلك اليوم؟

فإذا كان العمال يرفعون شعار الإجازة والراحة في ذلك اليوم، فمن الممكن أن نرفع نحن شعار العمل وأن نطالب بحقنا في المشاركة داخل مجتمعاتنا؛ فالحياة فرص، والفرصة قد لا تأتي للإنسان إلا مرة واحدة فقط، ولكن هل ننتظر نحن الشباب تلك الفرصة التي نحلم بها أم نجاهد ونحاول الوصول إليها حتى ولو كان الطريق صعب؟!

هل يتساوى الشاب الذي يعمل والشاب الذي لا يعمل؟ هل سنظل نلعن الظلام والجهل وتخلف الحكومات ولومها بعدم توفير فرص عمل للشباب أم سنبدأ رحلة تحديد الهدف والبحث والسعي حتى نصل لما نريد؟!

هل ننتظر من يقدم إلينا الفرصة على طبق من ذهب أم نخلق نحن فرصتنا بأنفسنا؟
ما الذي يجعلنا ساكنين ولا نتحرك للبحث؟!

451 فهرنهايت said...

مختار العزيزي
شكرا ... عموما عنوان الاستوديو أنا نسيته .. بس تلاقيه مكتوب ع الجدار برضه

ابراهيم
ياعم مالناش دعوة بيها .. بس واضح انها مطلب جماهيري عريض

هوميروس
شكرا ياريس ... وعقبال مايحطوا صورتها على الشقق والعربيات والسلع الاستهلاكية , قول اّمين

اّدم المصري
بس كدة؟!! ابعت ياسيدي ع العنوان التالي
bayto4@hotmail.com

السهرودي
ياسيدي .. دي جدران مدارس متواضعة المستوى في الأرياف ... بس العقلية واحدة في الحالتين

شادي
ماشي ياعم ... دعواتك برضه

ميندونا
شكرا ... واللهم استجب

تامر
شكرا جزيلا

مريم المعتصم
السور الحديد عادة لايصلح الا لتعليق اليفط الدعائية أو المنافقة أو المنددة ...عموما البزابيز الحديد المدببة غي السور تصلح أيضا لتعليق المعارضبن والمتظاهرين ... ممكن يكتبوا ساعتها "السور كامل العدد" 0
مافهمتش التعليق التاني بصراحة .. يعني عايزة ايه؟

حائر في دنيا الله said...

قولي يدك
الجدار دا أنا شفته فين قبل كده
شفته فين قبل كده

زرعته الحكومة في عقولنا والناس كبروه واهتمو بيه

kalam said...

ربنا يفرج كربك ان شاء الله

تدوينه هايله

Anonymous said...

كتابة جميلة و بلوج تحفة(عبدالله احمد) رسام كوميكس في جريدة الدستور

المواطن المصري العبيط said...

جدار 7

في الوسط: لافتة باللون الأخضر الزرعي قطعت شريطين من طرفيها اليمين واليسار مما جعلها تبدو مثل قرنين لصاحب الصورة، وقد كتب عليها من أعلى: الحاج سيد أبو نهلة يقول نعم للرئيس مبارك، ثم يظهر في الخلفية صورة الرئيس مبارك في ابتسامته البلهاء، وفي أسفلها: فكر جديد

تحت - مش قوي يعني - بين طرف الصورة وباقي الحائط: (... أم الرئيس، وفلسطين عربية حرة)، امضاء: الاسلام هو الحل، وعنه: أحمد المجاهد

تحت خالص: خليط من البول والبراز، وكلب يعبر جوار الحائط فيرفع رجله اليسرى، ليقوم بدوره في إكمال اللوحة البولية

فوق خالص: ممنوع الاستمناء على الحائط

قلم جاف said...

"حفار القبور".. مش عارف ليه التسمية دي بتفكرني بعبارة أمل دنقل : المدى أضرحة! :-)

مدونة شديدة

mariamagdolen said...

بجد الفكرة مطروخة بشكل كويس اوى بجد حلوة

ميشيل حنا said...

بوست رائع. برافو.

manora said...

انا اول مرة اجى المدونة هنا
بجد مدونة رائعه..
و البوست ده تحفة فعلا

وخصوصا
يوسف + رميساء = حمادة (الناس اللي بتجيب م الاّخر)

فعلا واد مخلص
تحياتى لك

change destiny said...

كنت فاكرة اني البني ادم الوحيد اللي بتمشي تتفرج على اللي الناس بتكتبه

محمود عزت said...

جميل!

كلمة عالحيطة
أقف
أكتب قصيدة!

:)

Anonymous said...

Your site is on top of my favourites - Great work I like it.
»

BaTaBeeT said...

!!!في حد اساسا يحب واحدة اسمها رميساء

نكتة (ليفي) ينعى ولده ويصلح ساعات... بجد ضحكت مووووووووت

Anonymous said...

Super color scheme, I like it! Good job. Go on.
»

المزاجنجي said...

عم الحفار انت حفرت في اعماق اعماق مخي وابشرك بقى ان انا اول واحد ممكن يقطع عنك استمتاعك بكل الجدران دي لاني وبفضل من الله مع شوية المعية في القريحة بتاعتي تفتق ذهني عن مشروع وهو قيد التنفيذ الان واسمه (مصر الجمبلة ) على غرار ( مصر الجديدة ) وبيساعدني فيه الجميل الرائع دكتور صلاح العناني كمشرف فني والجمعية المصرية للتنمية الإنسانية كمشرف عام منفذ وهي الجهة التي من حقها ان تخاطب الحكومة بعمل تجميل فني وادبي وعلمي لاسوار مدارس القاهرة كلها ولما يتنفذ المشروع ده ها تشوف بقى مصطفى كامل ومحمد فريد والفريق عزيز المصري وكل ابطال مصر ورمزها من اول التاريخ الفرعوني مرورا بالاسلامي وانتهاءً بالعهد الحديث كمان ممكن المشروع يتطور ليشمل مدارس الجمهورية كلها ودعواتك

كنوز said...

hei just want to be a friend i am a pharmacist but living now in finland
keep up the good work

radwa a. fouad said...

el heeetan wel kalam elly 3aleeha.howa elly beygeeb men el akher!!
radwa

;