أيها الزائر قبري .... أتل ماخط امامك

Saturday, May 20, 2006

ياريت تسهلها لي شوية ياأستاذ طارق

تلقيت دعوة بالبلوج السريع من ميشيل الغارق في مسنقعات الفحم للاجابة عن السؤال العويص والكاس الداير
امتى أحس اني بحب الحياة؟
والله هو سؤال صعب خصوصا لواحد من اللي بيحسوا باثم السعادة .. بس بعد تفكير ... خليني أسرد بدون ترتيب
لما ألاقي ناس مبسوطين وأعرف اني كنت السبب في انبساطهم
لما اسمع موتزارت في فيلم اصلاحية شاوشانك .. وأشوف المساجين مسحورين أمام الميكروفونات (ساعات بحس اني عايز أعيط وأحس يالتطهر ... مشيها حب للحياة برضه) 0
لما أدخل البلوج بتاعي وألاقي فيه 7 تعليقات مرة واحدة وأنا كنت نايم في العسل , أو لما ألاقي بلوجر ضايفني في قائمة مدوناته المفضلة
لما أحس ان ربنا راضي عني و أبقى مصلي كل الصلوات في الجامع .. بلاقي الحياة ماشية بسلاسة في الاتجاه المرغوب (بس الأكيد اني هاتوحل تاني وأرجع أكتئب لما أنغمس في حب الحياة) 0
لما اليوم يعدي وأنا اكتسبت فيه مهارة جديدة أو معلومة وألاقي حد بيبتسم ويقوللي ... انت كويس يافلان وبتتعلم بسرعة
لما شخص عزيز يتصل بي وقد خطرت على باله فجأة بعد شهور (ياسلام بقى لو قعدت معاه ع الكوفي شوب ومعايا شوكولاتة مورو وكانز بيبسي ... معقولة ياجدعان!!؟ ... الجنة ممكنة على الأرض؟ ) 0
لما مريض غلبان يدعيلي لمجرد اني ابتسمت في وشه وعاملته كانسان وطبطبت عليه (أمال فين الدكتور اللي بياكل العيانين؟) 0
bear share لما برنامج
يبقى شغال ومش قافلين عليه من السايبر كالعادة ,
الجديدة soundtracks فرصة بقى أنزل فيها كل ال
لما أكون مروّح من نوبتجية طويلة أكون خلالها ريحت العيانين وكتبت علاجهم مظبوط ويجيلي منهم حد يتابع معايا
لما حد يفتكرني بسؤال من عينة ... أمتى تحس انك بتحب الحياة
ياريت أكون كملت العدد القانوني ... التفكير في الحاجات أحيانا بيبقى صعب
أورّط مين معايا في الأسئلة دي؟.... أورط مين ؟ ..... مين؟
أحمد شقير , اّدم المصري , حائر في دنيا الله , أحلام , السهرودي , اياكش تولع ... وكل اسم في قائمة الهاربين من التربة ولم يمر بهذا السؤال المدوحس

29 comments:

bluerose said...

"لما أدخل البلوج بتاعي وألاقي فيه 7 تعليقات مرة واحدة وأنا كنت نايم في العسل , أو لما ألاقي بلوجر ضايفني في قائمة مدوناته المفضلة "

ضحكتني الجملة دي

بس تخيل يالصدفة شفت التدوينة بعد ما ضفت مدونتك عندي

ماما said...

تعرف مهم قوى تحس بالرضا والتواءم مع الحياة ولو بشكل نسبى اى من شخص للتانى و من فترة للتانية، أو تحس ان ربنا معاك، جنبك، بيفتح لك الطريق، او على الاقل بينوره لك... ساعتها مش مهم تكون واصل للمنتهى اى لقمة احلامك وطموحاتك، يكفى على الاقل انك ماشى فى الاتجاة الصح.. متهيالى ده طعم الحياة واللى ممكن يوصلنا لأننا نحبها فيما بعد، او على الاقل ماناخدش قرار بالتوقف عن الحياة مش بمعنى الانتحار جسديا، ولكن التوقف عن التعايش وبداية مسلسل الاكتئاب والتذمر و... مفيش فايدة..
على فكرة مش بحكم انى عجوزة (ماما بالنسبه لكم) بديلكم وعظ ونصايح، بالعكس وخلينى اعترف لك انى بجد اتعلمت منكم كتير، اما دخلت عالم المدونات (مش كلكم طبعا) وبدأت اقرا، مدونه توصلنى للتانيه، بجد قدرة مذهله على السرد والبوح، الرصد والتحليل، تفاصيل كتير ومشاعر صادقة،وحتى الافكار الغريبة واللى انا مختلفة معاها، مقدرتش امنع نفسى من الانبهار بها، عندكم جراة يمكن ماتوفرتش لنا (لجيلنا)،،، مش حابة اطول بس حبيت من عندك انت (مدونتك بالتحديد) اسجل اعجابى بكتير منكم، حتسالنى ليه اشمعنى انا، مش عارفه يمكن لانى حسيت انها مدونتى او بتعبير ادق زى بيتى اللى ممكن ارحرح فيه وافضفض،(والله مش بجاملك)، كمان ماتخافش من ناويه اسرقها منك ولا اشاركك فيها ولا حتى ايجار جديد ولا مفروش، انا بس حاسمح لنفسى اعلق بين الحين والاخر (تسمح لى؟؟؟)ويمكن اخرج بره النص (معلش اعملى استثناء ماما بقى)يمكن لانى معنديش الجراة اعمل مدونه واقول زيك اللى نفسى اقوله
مرة تانية خالص تحياتى لك انت ايها الطبيب / الحكيم، حب الدنيا زى ماهى بحلوها ومرها، اقبلها زى ماهى بس بدون استسلام، يعنى عافر علشان تتحقق بس اوعى فى يوم تنسى انك انسان، مع انى متاكده انك بتحمل من صفات هذا الاسم الكتير فانت شخص شديد الانسانية...

placebo said...

أشاركك الراى فى حاجات كتير من دى خاصة موضوع لمل عيان يستريح على علاجى برده...بس كمان:
1-لما حد من البلوجرز اللى بحبهم ينزل حاجه
2-لما ابقى فى البيت لوحدى وأعمل طبق نودلز وبعديه كوباية نسكافيه و يبقى معايه كتلب حلو

أيوه خدامه said...

و النبى يا حفار ياخويا ماخبيش عليك الموضوع ده نسيتو من زمان ... مش عارفه ازاى و ليه- لأ
و ماظنش كمان انى كنت عارفاه أصلا
يابنى موضوع حب الحياه و السعاده و الحاجات الأستفزازيه دى ليها ناسها - ساعات أقعد فى نادى ولا مطعم أو كافيه و أسمع لك الست من دول ترقع الضحكه اللى هى - معرفش ياخويا بيضحكوها ازاى و ليه اصلا - و ربنا يا حفار نفسى و من الحاجات اللى دعيتها ليلة القدر أنى أحب الحياه و تحبنى و نبقى سون فاسون أنا و هى بس مش عارفه ليه الدور ماجاش, القصد يا حفوره بيستهيألى كده ان الكآبه اللى بقينا فيها سببها الدماغ الوسخه اللى مش عايزه تنام لحظه ولا تبطل ور.
البيت - الشغل - العيال - الراجل المنيل على عينو (يسترك سيبنى اتبحبح) الشغاله اللى طفشت - وحياتك لو مالقيناش حاجه نقلق عليها هندور على مشاكل عيال الجيران
احنا كده الستات المصريين أهالينا ماعلموناش ازاى نعيش الحياه - ازاى نحبها و تحبنا او على رأى سيمبا هاكونا ماتاتا
اتعلمنا يا حفار ياخويا نفوت و تننا نفوت و نصهين لما جابو مناخيرنا فى التراب ( داخليا و خارجيا و شرفك) الوليه من دول فى الدنمارك ولا هولندا تسيب البيت هى و صحابها فى خروجه دوريه و ينعل أبو التخين هما يصرفو نفسهم لاهوأنا كنت الجرية بتاعت أبوهم (بالدنماركى طبعا) و تدور تتصرمح و ترجع بمزاجها شايف الحريه يا مبارك (مش مبارك اللى فبالك) أما هنا فى مصر المحروسه الست مننا محصلتش خدامه و ياريت ياخدونا بالبكالوريوسات بتاعتنا أهى واكله شاربه نايمه معززه مكرمه أجازه اسبوعيه و محدش يقدر يقولها هتجوز عليكى يا عرة النسوان و لا روحى و انتى طالق
ياعمى خليها على الله و لما تعرف تحب الحياه يسترك ابقى خد بايدى

kalam said...

الله يا دكتور
موضوع الصلاه فى الجامع ده عندك حق فيه والله
والله الصلاه دى افضل علاج نفسى فى الكون
يا رب يسعدك دايما
ويكتر من امثالك
ويقلل من امثال اللى بياكلوا العيانين

ميشيل حنا said...

شكرا على الاستجابة
الحاجات اللي بتفرحك زي الحاجات اللي بتفرحني
وده يدل على انك من هواة الاكتئاب زيي!

ماما said...

الاخت ايوة خدامه
جزء كبير من كلامك صح لو فكرنا بس نبص للكباينه من النص الفاضى، حاولى تعكسيهاكده، وبصى ان عندك مثلا جوز(رغم انه ممكن يكون ضل الحيطه افضل منه، بمعنى وجوده زى عدمه لكنه موجود والشكل ده أى المنظر الاجتماعى ده بيحميكى من حاجات كتير حتى ممكن يحميكى انت شخصيا) عندك مثلا اولاد ربنا يخليهم لك ممكن يكونوا مقرفين وخسارة فيهم الخدمة والهدمة زى ما بيقولوا، متعبين ومش بيريحوا مسلمين وواخدين الحياة كده تحت بند ليه تتعب اكتر لما ممكن ماتتعبش وماهى ماما موجوده حتتصرف وتعمل اللازم فى كل شىء مش بدءا من تنظيف الحجرة (لان الخدامه زى عندك خلعت لحد بيدفع لها اكتر) انتهاءا بمجموع زباله وتضطرى تشتغلى اضعاف زى الحمارة(مع الاعتذار للحمير) علشان تجيبى فلوس وتدخليه اى داهيه تضمن له مستقبله اللى هو منيل طبععا واسود ( ماحنا شافين الصورة بطاله وهبل وعيشه منيله) القصد رغم انهم كده بس برضه نعمه،وكبيرة كمان وغيرنا محروم منها، وكفايه انه هدف بعيش علشان احققه، مش مهم حانجح ولا لا، او حانجح قد ايه، بس يكفى انى عايشه بهدف..
برضه مش بديلك موعظه ولا نصايح بس من واقع تجربتى اللى هى سوده ومهببه على كافه المستويات يعنى بمبه من كله،الحياة الخاصة والعمليه و... لكن اتعلمت ابص للى فى ايدى واحاول ابلعه على انه كويس حتى لو هو عكس كده، صدقينى وده بجد احيانا بخجل من رحمة ربنا على لانى مش بعطيه حقه رغم كل اللى ادهولى ( واللى هو زى ماحكيت لك) بمعنى تكفى قدرتى على الصمود وتحمل الحياة بثبات، صحيح احيانا بطق لكن وفى نفس اللحظه بلاقى رساله من ربنا ، اشارة كده تشعرنى انه جنبى ومعايا ، والله ماكلام وخلاص، ويوم الموقف العظيم جايز تشوفى ده بنفسك اما كل حته فينا تنطق باللى عملناه وقلناه، اقسم لك انى اكاد احيانا احس بيد الله( مش بالمعنى المادى) بتحنو على وتطبطب على ، ساعتها بس ورغم كل اللى انا فيه بحس بطعم الحياة وبحبها، بحس ان لى معنى وقيمه وهدف ورساله ( ده الى جانب اهداف ورسائل اخرى لازم نعيش علشانها)
على فكرة انا مش حد متطرف دينا ولا حتى منتمى للدكاكين دى، ولا ماشيه على المسطرة فيما يتعلق بالعبادات، (مش بقولك بخجل من ربنا لأنى مش بديله حقه وهو بيعطينى اكتر مما استحق) انا بس عرفت ربنا بقلبى بعد ما اخد بيدى وخلانى اشوف واحس وافهم اشاراته ورسايله وانه فعلا موجود..
اسفه لك وللاطاله ولكم من هنا وبالاخص صاحب الدار وعارفه ان الرساله دى كانت موجهه له مش لى لكن اعذرنى للتدخل(شكلك حتخاف منى بجد لاستولى على البلوج)...
تحياتى للجميع وعفوا.. والحياة رغم كل مافيها من عبث وسخف حلوة وتستحق تتعاش..

حائر في دنيا الله said...

أهلا يعم الدكتور
>لما ألاقي ناس مبسوطين وأعرف اني كنت السبب في انبساطهم <

دا سبب كفاية يعم الدكتور وكمان فيلم مساجين شاوشينك, الفيلم دا لذيذ بكل معنى الكلمة,
شكرا على الزنقة اللي وضعتني فيها مع الحياة بس أحاول ألاقي حته أحب فيها الحياة..

ادم المصري said...

نفسي اعرف ان وانت بتكتب بتبقي شارب ايه ؟

بلاش دي لا تتفهم غلط .... واكل ايه ؟


الكلام ده بتجيبوه منين ؟


حيرتني معاك يا اخي

ملك said...

انت بجد روحك حلوه
ربنا يكرمك

451 فهرنهايت said...

بلوروز
متشكر جدا ... لأنك - لحظيا - خلتيني أحب الحياة

ماما
الاكتئاب , لذة الشجن , الحزن الخفيف الموجود في خلفية الحياة ... مش مناهج للتعامل في الدنيا .. لكنها المشاعر التي اعتدت تأمل الحياة من خلالها ... ربما لايماني أن كل لحظة متعة خلفها ألم ما ... على الأقل الألم يأتي نتيجة لنهاية المتعة نفسها واختفاء تأثيرها المرخي المهديء
لكن تعاملي الشخصي في الحياة خاضع للمود بدرجة كبيرة ... وككل مواليد الجوزاء , هذا المود متقلب بشكل مخيف ... وان كان الاكتئاب هو الطاغي في معظم الأحيان ... مش مسألة انتحار ويأس ... لكن احنا مش في الجنة ... والحياة ليست بالألوان كما في كتب الوزارة وأفلام الكارتون ...وغدا لن يكون أفضل لأننا بكينا على المخدة بحرقة هذا المساء.. ليس لأنك كنت نبيلا كريما محترما ستجد المقابل الموازي , وليس الكذاب مفقوسا ملعونا , والحق والباطل أحيانا يفقدون الفروق , المفاهيم تتداخل .. التخاريف .. العقد النفسية ...هناك من (يشتغلنا) باستمرار أكاد أقسم..الحلال والحرام...أناس عنيفين غليظي الأصوات في خضم هذه المهلبية الفكرية.. الحياة معقدة ومؤلمة والتفكير بهذا الشكل يصيبني بالصداع ... أريد الصراخ دوما (طفوا النور .. عايز انام)...ماعلينا
المديح محرج عموما ... مش عارف أقولك ايه... بجد أنا سعيد وياريت زياراتك تظل مستمرة ... وخدي راحتك في التعليق
بس نصيحة ... ياريت تعملي مدونة فعلا ... لأن أي مخزون عندك من الأفكار والمشاعر يستحق انك تشاركي فيه الناس ... ومالهاش علاقة بالجرأة
جربي بس

بلاسيبو
لما الواحد ياكل مايشتهيه ومعاه كتابه المفضل ... مافتكرش انه بيفكر في حب الحياة ساعتها ... لأن أكيد الدنيا بتختفي من حواليه وبيبقى في عالم تاني خالص

أيوة خدامة
كل هذا السخط بداخلك ... بس برضه بتدخلي مدونات وتعلقي وتفضفضي بسخرية ... وبترفضي وبتتغاظي و شايفةالحياة مدهونة دوكو اسود ... الخ
مادام ماانتحرتيش واحتفظتي بصفات الرفض الاّدمية .. يبقى جواك جزء لسة بيحب الحياة لاشعوريا .. وعنده أمل خفي مستتر ان بكرة ممكن يكون أفضل ... يبقى جواك جزء خايف من ربنا ومؤمن برحمته بس بينسى ان رحمة ربنا يتلحقه في مواقف كتير .. لكننا كالعادة نتذكر الشيء المتسلط الطاغي ... مادمتي مؤمنة ان الفيلم خلص .. مروحتيش ليه؟ لأنك مستنية في صبر خجول الجزء التاني .. يمكن يكون أحسن
الظاهر ان كلنا - رغم كلامنا - فينا جزء يعشق الحياة ويطلب الاستزادة منها رغم قرفها
ربنا يفرج كربك .. ويجلي نعمه أمام عنيكي .. وياستي ... خادم القوم سيدهم

كلام
دي الصلاة اللي بذمة .. انما نقر الديكة وفض المجالس والشعائر ..... ياريت ندور على علاج للسرحان في الصلاة ... وياريت نلاقي طريقة لكسر روتين العادة ... والله الواحد مكسوف من الحكاية دي

ميشيل حنا
والله عندك حق .. مش كتير قوي اللي بيحبوا كيوبريك ويسمعوا مزيكة أفلام
انما هواة الاكتئاب ... ماتعدش
الظاهر ان الاكتئاب هو اللي بيدي الواحد حافز للكتابة .. لو كان سعيد هايبخل بمشاعره دي على الناس ... هياكل التفاحة لوحده
لا ياعم ... خليني مكتئب أحسن

حائر في دنيا الله
شد حيلك يازعيم ... ومستني الاجابة

اّدم المصري
لاشارب ولاواكل
حيرتك في ايه بس؟ ... مستني بوستك القادم تلتقط فيه الكرة دي مني
اّسف والله عشان اتحاد المدونين .. عايز أكتب والله بس مستني وقت أختلي فيه بالجهاز ودماغ رائق ... قريت شروط نشر البوست والتنسيق بيننا .. بس كنت أفضل ان الموضوع يبقى في ايد واحد يتحكم في عرض البوستات عشان المواضيع تاخد حقها ... ولا ايه؟

ملك
ربنا يخليك ياباشا ... متشكر جدا وربنا يكرمنا جميعا

أيوه خدامه said...

اعزائى ماما و فهرنهايت
و ربنا أخجلتمونى و أكاد أتفطر حرجا لما لقيتكو اهتميتو بالكومينت بتاعى - و فجأتان و بدون مقدمات ابتسمت و فشخت تمى و دى حاجه محصلتش من زمان - انتو عارفين انى استفدت درس مهم جدا فى حب الحياه من حضراتكم : و هو أهتمام الأخر بك و التواصل معك - حقيقي متعه أهو انا لا اتشرفت بيكو قبل كده و مع ذلك اديتونى وقت و تركيز و دعوة جميله أوى يا حفار (و دى الدعوه المستجابه بظهر الغيب ان شاء الله) يبقى خدو عندكو بقى : حب الحياه فى التواصل مع الأخر و فهم معاناته و المحاوله لفك كربه
كلامك صح يا ماما (باستثناء الحيطه اللى قلتها احسن و الحمايه و الكلام ده ) اما بالنسبه للصحه و الستر و القدره على انتقاء هدف و السعى وراء تحقيقه و فوق ده كله رحمات ربنا بينا و ايده اللى بتطبطب على كتفى و جحودى بنعمه عليا اللى لا تعد و لا تحصى فخدى دى و النبى : اموااااااااااه

إياكش تولع said...

أخخخخخخ

انت كدة زنقتنى يا عم فهرن.....عالعموم مردودالك:)

بس فعلا مافيش أحسن من ان الواحد يكون سبب فى رسم ابتسامة على وش اى حد....شعور جميل فعلا

السهروردى said...

تشكر يا معلم على التوريطة الحلوة دى بس أعذرنى أنا المرة دى لأنى ماليش فى الكلام ده
بحس شوية بالإستهلاك فى النوعية دى من الأسئلة- مش الناس اللى بتجاوبها-زى أسئلة أين ترعرعت سيدتى؟
صباحك زى الفل
:)

ماما said...

حفار قد ايه انت كائن انسانى رائععععععع وشديد الانسانية جدااااااااا
كلامك و جعنى واثر فى جدا، زى كلام ايوة خدامه بجد حبيتها جدا، وبجد اكتر نفسى اتواصل معاكم اكتر، دورت على اميل لك فى بلوججك مالقيتش ، عارفه انك مشغول ويمكن مش حابب نتواصل الا هنا ، عموما انا فكرت كتير اعمل مدونه بس زى ماقلت بتراجع فى اللحظه الاخيرة، يمكن خايفه اكتب وانتظر التواصل فمحدش يعبرنى والحياة مش متحمله مزيدا من التجاهل، وفى اخر مرة قررت لقيتنى محتاسه فى التكنولوجيا شويه وفى اختيار اسم و... تفاصيل كتيرة ،،، يمكن اقدر اتشجع، يمكن اتجرأ واقلع القناع، واكشف عن اللى جوايا، كلامك بجد اثر فى جدا.. وحاجات كتير...عرفت كمان ليه التوافق ده بينا لانى انا كمان برج الجوزاء...
تحياتى يا طبيب الانسانية القادم لنا بوعى وحب وامان وطمأنينه،و يارب اشوف ابنى زيك كده فى عقلك ورجاحة تفكيرك ويابخت اهلك بيك.. مش بحسد عينى مش مدورة
تحياتى...

Ahmed Shokeir said...

جميل أوي إن الواحد يكتشف إنه بيحب الحياة ، ممكن يكون بيحبها بس مش مكتشف ده لكن إكتشاف أسباب حبه لها بيزيده حبا لها وبيخلي حتى بعض الحاجات الصغيرة اللي مش متوقعة تكون سبب رئيسي في حبه للحياه وده يأكد إن مش الاحلام الكبيرة بس هي سبب حب الحياة ولكن ممكن أمور غير مكلفة وغير مرهقة تكون من اسباب حبنا للحياه
وغالبا معظم إكتشافاتك من النوع ده وده يدل على رقة شخصيتك وعدم إرهاق الآخرين في كيفية التواصل معك

شكرا على التاجنج وهاأعمله قريبا جدا

ليا بس إستفسار على الاسم المستعار لأحد أصحاب التعليقات وهو أيوه خدامة
هو غيه الموضوع بالظبط

أيوه خدامه said...

كلاكيت تالت كومينت:
ماما العزيزه أنا كمان حبيتك و من القلب للقلب - ثانيا الأخ أحمد شقير بص بقى يا مبارك (برضو مش اللى فى بالك) بقى أيوه خدامه دى انت مافهمتهاش لأنها مش بتتقرى دى لازم تتشاف و دى حته من فيلم عربى أثرى من الحفريات و كانت الفنانه لبنى عبد العزيز (مشهد ليل داخلى)و النبى خش معايا الكادر ده : بتقولها بمنتهى الحرقه و من قلبها لما البطل كان بيقولها انتى طلعتى نزلتى خدامه (ثم هوى على وجهها بقلم سينمائى)من اللى بيطرقع ولا يحسبش - ثم تمطرقت لبنى على الأرض ثم اعتدلت فى جلستها و دلفت تنظر الى البطل فى حقد شديد و هى تتحسس مكان القلم و قالت بمنتهى الفخر أيوه خدامه.. الخدامه دى أشرف من ناس كتير عاملين بهوات .. فهمت الليله بقى سيادتك لو تخيلت المشهد و الطريقه و الصوت اللى طالع مالحته الجوانيه : أيوه خدامه- ياوعدى - فاللى حصل انى من يومها تقمصت الدور و كده
أما لو قريت الكومينت الأول بتاعى هتفهم ان الست المصريه أشرفلها تبقى خدامه للأسباب المذكورة سلفا

ماما said...

ايوة خدامة..
والله دمك زى العسل و شربات (بكسر الشين على طريقة ريا وسكينه) .. امال فين الاكتئاب.. مانتى فله اهه و على راى حفار القبور مادام بتقدرى تدخلى مدونات وتعلقى يبقى لسه حاسه ان الفيلم ماخلصت(معلش ياحفار اقتباس)
تحياتى لك وياريت نتواصل اكتر
بالمناسبه احمد شقير عنده مدونه خاصة .. جميله برضه زى هنا وحتلاقى نفسك فيها... وعقبال مانعمل احنا كمان مدونات .. اصلى بفكر فى كلام حفار بجد..
تحياتى للجميع

Ahmed Shokeir said...

أيوه خدامة
ده إنتي طلعتي حكاية .. ده الموضوع كبير فعلا وانا مش واخد بالي

فعلا أحسن م الشرف مافيش
شكرا ع التوضيح

ولامؤاخدة يافهرنهايت قلبناها تشات

تمر حنه said...

( أنا أيوه خدامه)عزيزى فهرنهايت - ماما - أحمد شقير
أنا عملت بلوج خاص بى - أحب أشوفكم هناك و الأخرين و هيا نتواصل و تعرفوا بعض عذاباتنا نحن النسوه

Ahmed Shokeir said...

مبروك ياتمر حنة .. بلوج جامد بجد .. انا عملت تنويه عنه في البلوج عندي

change destiny said...

حفار قبور ازاي و انت بتعشق الحياة؟

451 فهرنهايت said...

أيوة خدامة
حتى اهتمام الاّخرين بك وبتعليقك استكترتيه على نفسك؟
عموما مبروك التدوينة الجديدة ... وان شاء الله هازورها قريب , والناس كلها هاتتواصل معاكي وتهريكي تعليقات وأراء

اياكش تولع
حبيب قلبي ... دي محبة والله مش زنقة .. يلا يابطل مستني ردك

السهرودي
يمكن يكون سؤال استهلاكي فعلا من عينة (ايه بداية مشوارك الفني؟ .. وسمعنا غنوة بصوتك ..الخ) بس اجابته ممكن تخليك تفكر في معاني بسيطة جدا تجعلك تحيا رغم سواد التجربة وعنائها .. الصندوق الخشبي الثمين الذي يحتضن ذكرياتك والذي تفتحه من اّن لاّخر خلسة وانت وحيد وبردان... و صباح العسل

ماما
انا اكتشفت اني تقريبا عملت الايميل لمجرد التسجيل على المواقع التي أحبها .. خصوصا بعد أن هجرت الشات منذ فترة مملولا ولا أحتفظ سوى بايميلات أصحابي رفاق السوء والظلام .. وطبعا هي لا لزمة لها (ماهم متلقحين ع القهوة) ... بس من خلال البلوج تعرفت على أصدقاء اّخرين اكتشفت فيهم جوانب متنوعة من الجمال والانسانية وخفة الدم مماأغناني عن التقاط الأصدقاء عن طريق الايميل والشات ... أكرر نصيحتي لك بخصوص التدوين .. وشكرا على كلامك الرقيق

شقير باشا
تشكر يازعيم .. وزي ماقلت للسهرودي .. هذه الأشياء البسيطة هي صندوقي الأثير الذي يضم كل عزيز علي والذي يشعرني أن الحياة ليست مغمورة في الطين والمجاري الى هذا الحد ... ومستني التاج

change disteny
هوة اللي بيحفر القبور بيندفن فيها؟

حــلم said...

ماشى ياعم

بجد كل ما ادخل هنا

انشرح :)


الوانك حلوة اوى

روقاااان

batman said...

ana 7abait el 7ayah lama sebt masr .. oksem belah eni a3adt shahr henaa fe america kont ba7lam eni lessa fe masr we mesh ader atla3 menha we kont basara7' wna nayem men kedah ..we tes2alooni emta be7eb el 7ayah a2olokom..lama shoft merati mestanyani fel matar ...lama mesket awel moratab (men 3'aseel el se7oon )fe 7ayati we kan 3aliah el ema .. lama tala3at tasree7 el 3amal we mesket awel sho3'lana mo7tarmah ...lama shoft el talg beynzel le awel marrah fe 7ayati .. lama shoft manzar el gebal fe colorado we me3'ateeha el talg .. lama shoft el 3'zlan we heya me3adeya 3al bait elli ana feeh .. lama tele3et a3la gabal hena we salait rak3itain lel lah shokr .. lama akalt ana we meraty sandwtichat ta3meya hena fe denver le awel marra lama sebt masr.. lama gebt 3arabeya we tala3at el ro7'osah .. lama ro7ot ma7al be2alah 3arabi we eshtarait shay el wezah we kanakah met3'ateyah bel meena we ma3mool 7alwani el e7'wan we molo7'eyah we wara2 3enab we fool madshoosh lezoom el ta3meya (tab3an ana elli 7a3melohom la2en el madam americeyah)..ana walahi maftekershi ay la7zah 7elwah fe masr 7atta lama etgawizt aw lama et7'aragat kan feeh dayman shee2 beynaked 3alayah eih howa m3arafshi

Anonymous said...

Nice idea with this site its better than most of the rubbish I come across.
»

Anonymous said...

Very best site. Keep working. Will return in the near future.
»

radwa atef fouad said...

lama aboss mala2eesh nass !!!
ana we rabenna we ay gameel aw wehesh..rabena khala2oo..ellla el nasss!!!

انوشه said...

ممكن احس ان انا بحب الحياه لما احس ان انا بعمل حاجه مفيده لما احس انا علاقتي كويسه مع ربي واكتر حاجه بتحسسنس بالاكتئاب والحزن لما اعمل ذنب كمان الدنيا بتسودو(تقريبا ده حال الناس كلها اليومين دول) لما احس ان ما بقاش في حاجه اسمها مباديئ وقيم وسمه الناس كلها اليومين دول التشاؤم تخليك مش طايق روحك ولا طايق حد بس ببقي سعيده اوي لما اكون سبب في سعاده حد او رسم البسمه علي وجهه او اقدر اخفف من المه وبمووووووووووت لما بشوف حد ادامي بيتالم
علي العموم انا اول مره ادخل المدونه دي ولسه مكتشفاها النهارده بس حاسه انها بتقول اللي انا عايزه اقوله وشكلي هحبها اوي

;